Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 15:1-19

LI TI ATËNË NI

  • Aye so Asa asara ti kiri na tâ vorongo (1-19)

15  Yingo ti Nzapa aga na ndö ti Azariah molenge ti Oded.  Tongaso, lo gue lo wara Asa, na lo tene na lo: “Asa, mo na azo ti mara ti Juda na ti Benjamin kue, ala mä mbi si! Jéhovah ayeke na ala na ngoi kue so ala ngbâ na lo.+ Tongana ala gi lo, lo yeke zia si ala wara lo.+ Me tongana ala dö lo ala zia, lo nga kue lo yeke zia ala.+  Giriri, teti angu mingi* azo ti Israël ayeke lani na tâ Nzapa pëpe, ala yeke na mbeni prêtre ti fa ye na ala pëpe nga ala yeke na ndia pëpe.+  Me na ngoi so ala yeke na yâ ti ye ti kota vundu, ala kiri na mbage ti Jéhovah Nzapa ti Israël, ala gi lo na lo zia si ala wara lo.+  Na ngoi ni so, mbeni zo alingbi pëpe ti tambela ti gue na mbeni ndo sân ti gi bê ti lo,* ndali ti so wusuwusu ayeke na popo ti azo ti akodro kue.  Mara ayeke futi mbeni mara nga gbata ayeke futi mbeni gbata, ndali ti so Nzapa asara si mara ti aye ti vundu nde nde kue ayengi azo.+  Me ti ala, zia ala sara ye tongana koli nga zia bê ti ala awoko pëpe,*+ ndali ti so ala yeke wara ande futa ti peko ti kua ti ala.”  Gï so Asa amä atënë so nga na atënë ti prophétie ti prophète Oded, lo zi mbeto na yâ ti lo, na lo futi afungo yanda na sese ti mara ti Juda kue,+ ti Benjamin kue nga na yâ ti agbata so ayeke na ndo so ahoto ayeke dä na Éphraïm, so lo sara bira si lo mû ni. Lo kiri lo leke gbalaka ti Jéhovah so ayeke lani na devant ti véranda ti da ti Jéhovah.+  Lo bungbi nga azo kue ti mara ti Juda, ti Benjamin nga na awande so alondo na sese ti Éphraïm, ti Manassé nga na ti Siméon+ si aga asara kodro na popo ti ala. Gbâ ti awande so akpe sese ti tanga ti amara ti Israël ague na mbage ti Asa na ngoi so ala bâ so Jéhovah Nzapa ti lo ayeke na lo. 10  Na ota nze ti ngu 15 ni ti komandema ti Asa, ala kue abungbi na Jérusalem. 11  Na lango ni so, ala mû abagara 700 nga na ataba 7 000 na popo ti aye so ala gbu na bira, ala yâa na sandaga na Jéhovah. 12  Ala te nga mbele ti gi Jéhovah Nzapa ti akotara ti ala na bê ti ala kue nga na âme*+ ti ala kue. 13  Zo kue so agi Jéhovah Nzapa ti Israël pëpe, a yeke fâ lo, atâa lo yeke kota zo wala kete zo, koli wala wali.+ 14  Ala deba na Jéhovah na kota go, ala dekongo na ngia nga ala hûru atrompette na adidi. 15  Bê ti azo ti mara ti Juda kue ayeke na ngia ndali ti deba ni, ndali ti so ala deba na bê ti ala kue nga bê ti ala apusu ala ti gi lo, na lo zia si ala wara lo.+ Jéhovah angbâ ti sara si ala duti na siriri na akodro kue so angoro ala.+ 16  Gbia Asa azi même Maacah,+ âta ti lo, na kota ndo ti lo ti mama ti kodro,* ndali ti so lo sara mbeni yanda so gï na bango ni bê ti zo ason. Lo sara ni ti tene azo avoro ni legeoko na yongoro yanda.*+ Asa adë yanda so na sese, lo fâ yâ ni kete kete na lo zö ni na yâ ti Popo-hoto ti Cédron.+ 17  Me ando so ayeke na nduzu na Israël angbâ.+ Ye oko, na yâ ti gigi* ti Asa kue, lo sara na Nzapa na bê ti lo kue.*+ 18  Lo mû argent, lor nga na akungba nde nde so lo na babâ ti lo azia ni nde ndali ti kua ti Nzapa, lo ga na ni na yâ ti da ti tâ Nzapa.+ 19  Bira ayeke dä pëpe juska na ngu 35 ni ti komandema ti Asa.+

Kete tënë

Na Hébreu: “alango mingi.”
Na Hébreu: “zo alingbi ti sigi wala ti kiri na kodro na siriri pëpe.”
Na Hébreu: “zia si maboko ti ala anze pëpe.”
Wala “wali so ayeke kota zo.”
Na Hébreu: “alango.”
Wala “lo mû bê ti lo kue na Nzapa.”