Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 11:1-23

LI TI ATËNË NI

  • Komandema ti Roboam (1-12)

  • Azo ti mara ti Lévi ague na Juda (13-17)

  • Sewa ti Roboam (18-23)

11  Tongana Roboam asi na Jérusalem, hio lo bungbi aturugu ti mara ti Juda nga na ti Benjamin+ ti gue ti sara bira na azo ti Israël, si komandema ni akiri na lo Roboam.+ Wungo ti akpengba turugu* so lo bungbi ala ayeke 180 000.  Na pekoni, Jéhovah atene na Shémaïah+ zo ti tâ Nzapa, atene:  “Tene na Roboam molenge ti Salomon, gbia ti Juda, tene nga na azo ti Israël kue so ayeke na sese ti Juda nga na ti Benjamin, mo tene:  ‘Jéhovah atene: “Ala gue ala sara bira na aita ti ala pëpe. Zia zo oko oko akiri na yanga-da ti lo, ndali ti so mbi la mbi sara si ye so asi so.”’”+ Tongaso, ala mä yanga ti Jéhovah, ala kiri na yanga-da, na ala gue pëpe ti sara bira na Jéroboam.  Roboam asara kodro na Jérusalem, na lo sara angangu gbagba na terê ti agbata so ayeke na Juda.  Lo sara ngangu gbagba na terê ti Bethléhem,+  Étam, Técoa,+  Beth-Zur, Soco,+ Adullam,+  Gath,+ Maréshah, Ziph,+  Adoraïm, Lakish,+ Azécah,+ 10  Zorah, Aijalon+ nga na Hébron.+ Agbata so kue, so ayeke na sese ti Juda nga na ti Benjamin, ayeke na yâ ti angangu gbagba. 11  Lo sara si agbata so ayeke na yâ ti angangu gbagba akiri akpengba, na lo zia akota zo ti komande na ndö ni nga lo zia na yâ ni kobe, mafuta nga na vin. 12  Lo zia nga na yâ ti agbata nde nde kue akota vala nga na alikongo. Lo sara si agbata so akiri akpengba ngangu. Lo ngbâ ti komande na ndö ti azo ti mara ti Juda nga na ti Benjamin. 13  Aprêtre na azo ti mara ti Lévi so ayeke na sese ti Israël kue azia sese ti ala na ala gue na peko ti Roboam. 14  Azo ti mara ti Lévi azia ando ti tengo pere ti anyama ti ala nga na ando ti ala,+ ala gue na sese ti Juda nga na Jérusalem, ndali ti so Jéroboam na amolenge ti lo azi ala si ala sara kua ti prêtre na Jéhovah pëpe.+ 15  Na pekoni, Jéroboam azia aprêtre ti lo wani na ando so ayeke na nduzu,+ lo zia ambeni ti sara kua ndali ti asioni yingo so akpa angasa*+ nga ndali ti amolenge ti bagara so lo leke.+ 16  Azo ti mara ti Israël kue so aye gï ti nzere na lê ti Jéhovah Nzapa ti Israël, ala mû peko ti azo ti mara ti Lévi na Jérusalem ti mû sandaga na Jéhovah Nzapa ti akotara ti ala.+ 17  Na yâ ti ngu ota, ala sara si komandema ti gbia ti Juda akpengba nga ala mû maboko na Roboam molenge ti Salomon, ndali ti so, na yâ ti ngu ota, ala sara ye tongana ti so David na Salomon asara. 18  Na pekoni, Roboam amû Mahalath ti ga wali ti lo. Babâ ti Mahalath ayeke Jérimoth so ayeke molenge ti David. Mama ti lo ayeke Abihaïl, molenge ti Éliab+ so ayeke molenge ti Jessé. 19  A si na mbeni ngoi, Mahalath adü na lo amolenge ti koli: Jéush, Shémariah na Zaham. 20  Na pekoni, Roboam amû Maacah âta ti Absalom+ ti ga wali ti lo. Maacah adü na lo Abijah,+ Attaï, Ziza na Shélomith. 21  Roboam aye Maacah âta ti Absalom mingi ahon tanga ti awali ti lo.+ Lo yeke na awali 18 so ayeke ti kozo ndo nga na ambeni wali 60 so ayeke ti use ndo. Lo dü amolenge ti koli 28 nga na amolenge ti wali 60. 22  Roboam azia Abijah molenge ti Maacah mokonzi na popo ti aita ti lo ti koli, ndali ti so lo ye ti tene lo la lo ga gbia na peko ti lo. 23  Me lo sara ye na ndara, lo tokua* ambeni molenge ti lo ti koli na yâ ti akodro nde nde kue ti Juda na ti Benjamin, so ti tene na yâ ti agbata kue so ayeke na ngangu gbagba,+ lo mû na ala gbâ ti aye nga na gbâ ti awali.

Kete tënë

Na Hébreu: “aturugu so a soro ala.”
Na Hébreu: “ndali ti angasa.”
Wala “kangbi yâ ti.”