Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 10:1-19

LI TI ATËNË NI

  • Israël asara ngangu-li na Roboam (1-19)

10  Roboam ague na gbata ti Sichem,+ ndali ti so azo ti Israël kue ague kâ ti zia lo gbia.+  Gï so Jéroboam,+ molenge ti Nébat, amä tënë ni (andâ na ndembe ni so, lo ngbâ ti sara kodro na Égypte ngbene ye so lo kpe Gbia Salomon),+ lo londo na Égypte lo kiri.  Na pekoni, a tokua ndo a iri Jéroboam, na lo na azo ti Israël kue ague na ndo ti Roboam. Ala tene na lo:  “Babâ ti mo azia nengo joug na ndö ti go ti e.*+ Me tongana mo yapu kua ni kete na mo zi nengo joug so lo zia na ndö ti e so, e yeke sara kua na mo.”  Lo tene na ala: “Ala gue; na peko ti lango ota, ala kiri aga abâ mbi.” Tongaso azo ni ague.+  Gbia Roboam ague awara terê na a-ancien* so asara kua lani na babâ ti lo Salomon na ngoi so lo ngbâ na fini. Lo hunda ala, lo tene: “Ti ala, ala ye mbi tene nyen na azo ni?”  Ala tene na lo: “Tongana mo sara nzoni na azo ni, mo zia ngia na bê ti ala nga mo tene mbeni tënë so adë bê ti ala, ala yeke sara kua na mo lakue.”  Ye oko, Roboam ake wango so a-ancien* amû na lo, lo gue lo wara terê na amaseka-koli so lo na ala akono legeoko, so ala yeke fadeso awakua ti lo.+  Lo hunda ala, lo tene: “Ti ala, ala ye e tene nyen na azo so ahunda mbi, atene: ‘Mo peut ti yapu joug so babâ ti mo azia na ndö ti go ti e so’?” 10  Amaseka-koli ni atene na lo: “Azo so atene na mo, atene: ‘Babâ ti mo azia nengo joug na ndö ti go ti e, me e ye si mo sara si a yapu’, mo gue mo tene na ala, mo tene: ‘Babâ ti mbi ason lani na ndö ti ala, me mbi, mbi yeke son ahon lo. 11  Babâ ti mbi azia nengo joug na ndö ti go ti ala, me mbi, mbi yeke sara si a kiri a ne ahon ndö ni. Babâ ti mbi apika ala na zaza, me mbi, mbi yeke pika ande ala na zaza so a zia ambeni ye na yanga ni.’” 12  Jéroboam na azo ni kue aga na ndo ti Roboam na ota lango ni, tongana ti so gbia atene lani, atene: “Ala kiri aga abâ mbi na ota lango ni.”+ 13  Me gbia akiri tënë na ala sioni sioni. Tongaso Gbia Roboam ake wango so a-ancien* so amû na lo. 14  Lo tene na ala tënë so amaseka-koli so atene na lo, lo tene: “Mbi yeke zia nengo joug na ndö ti go ti ala, na mbi yeke sara si a kiri a ne ahon ndö ni. Babâ ti mbi apika ala na zaza, me mbi, mbi yeke pika ande ala na zaza so a zia ambeni ye na yanga ni.” 15  Gbia ake ti mä azo ni, ndali ti so tâ Nzapa+ la asara si aye ni asi tongaso, si tënë so Jéhovah atokua lani Ahijah,+ zo ti kodro ti Shilo, ti tene na Jéroboam, molenge ti Nébat, asi biani. 16  Tongana azo ti Israël kue abâ so gbia ake ti sara ye so ala hunda, ala tene na gbia ni, atene: “E yeke wara nga mbeni nzoni ye na lege ti komandema ti David la? Nga mbeni ye ayeke dä so e lingbi ti wara ni na peko ti molenge ti Jessé? Azo ti Israël, zo oko oko ague na terê ti anzapa ti lo. David, bâ ndo na ndö ti da ti mo wani!”+ Ge, azo ti Israël kue akiri na ndo* ti ala.+ 17  Me Roboam angbâ ti komande na ndö ti azo ti Israël so asara kodro na yâ ti agbata ti Juda.+ 18  Gbia Roboam atokua Hadoram,+ so ayeke na ndö ti azo so a mû ala ti sara akua ti ngangu, ti gue ti bâ azo ti Israël, me ala kue abo lo na tênë, ala fâ lo. Gbia Roboam awara lege ti monté na ndö ti puse ti mbarata ti lo, lo kpe lo gue na Jérusalem.+ 19  Azo ti Israël angbâ ti sara ngangu-li na ahale ti David juska laso.

Kete tënë

Wala “asara e pasi.”
Na Hébreu: “atente.”