Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 1:1-17

LI TI ATËNË NI

  • Salomon ahunda ti wara ndara (1-12)

  • Kota mosoro ti Salomon (13-17)

1  Komandema ti Salomon molenge ti David angbâ gï ti kpengba ti gue na ni. Jéhovah Nzapa ti Salomon ayeke na lo, na lo sara si Salomon akiri aga kota mingi.+  Salomon atokua ndo a iri azo ti Israël kue, amokonzi ti azo saki oko saki oko na amokonzi ti azo ngbangbo oko ngbangbo oko, ajuge, amokonzi kue ti azo ti Israël kue nga na amokonzi ti ahale ti akotara ti ala.  Na pekoni, Salomon na congrégation ni kue ague na ndo so ayeke na nduzu na Gabaon,+ ndali ti so tente ti bungbi so a leke ni ndali ti tâ Nzapa ayeke kâ. Tente ti bungbi so la Moïse wakua ti Jéhovah aleke lani na yâ ti benyama.  Andâ David ague lani na Kiriath-Jéarim,+ lo mû Sanduku ti tâ Nzapa lo ga na ni na ndo so lo leke ndali ni. Lo leke mbeni tente ndali ni na Jérusalem.+  A zia na devant ti tabernacle ti Jéhovah gbalaka ti cuivre+ so Bézalel,+ molenge ti Uri so ayeke molenge ti Hur, aleke lani. Salomon na congrégation ni kue ayeke gue na gbele ni ti sambela.*  Salomon ayâa asandaga na gbele Jéhovah. Lo zö anyama 1 000 na sandaga na ndö ti gbalaka ti cuivre+ so ayeke na terê ti tente ti bungbi ni.  Nzapa asi na Salomon na bï ni so na lo hunda lo, lo tene: “Nyen la mo ye ti tene mbi mû na mo?”+  Salomon atene na Nzapa: “Mo fa tâ ndoye mingi na babâ ti mbi David,+ na mo zia mbi gbia na peko ti lo.+  Ti fadeso, Jéhovah Nzapa, sara ye alingbi na zendo so mo mû lani na babâ ti mbi David,+ ndali ti so mo zia mbi gbia na ndö ti mbeni kodro so azo ni ayeke mingi tongana fuku ti sese.+ 10  Mû na mbi ndara nga sara si mbi hinga ndo+ si mbi fa lege nzoni na azo so.* So azo ti mo ayeke mingi so, zo wa la alingbi ti fâ ngbanga ti ala zo wa?”+ 11  Na pekoni, Nzapa atene na Salomon: “So ye so la agbu bê ti mo mingi so, na mo hunda pëpe mosoro, gloire wala kuâ* ti awato ti mo, nga mo hunda pëpe ti duti na fini aninga, me mo hunda ti wara ndara nga ti hinga ndo si mo fâ yâ ti ngbanga ti azo ti mbi so mbi zia mo na ndö ti ala,+ 12  mbi yeke mû na mo ndara na hingango ndo. Mbi yeke mû nga na mo amosoro nga na gloire, mara ni so mbeni gbia so aga kozo na mo wala so ayeke ga ande na peko ti mo ayeke na ni pëpe.”+ 13  Salomon alondo na devant ti tente ti bungbi so ayeke na ndo so ayeke na nduzu na Gabaon,+ lo kiri na Jérusalem, na lo komande na ndö ti Israël. 14  Salomon angbâ lani ti bungbi apuse ti mbarata nga na ambarata.* Lo yeke na apuse ti mbarata 1 400 nga na ambarata* 12 000.+ Lo zia ala na yâ ti agbata so a yeke bata apuse ti mbarata dä+ nga na ando so ayeke nduru na gbia na Jérusalem.+ 15  Gbia asara si argent na lor ayeke mingi na Jérusalem tongana atênë+ so ayeke mingi na Jérusalem, nga lo sara si akeke ti cèdre ayeke mingi tongana akeke ti sycomore so ayeke na Séphélah.+ 16  Ambarata ti Salomon alondo na Égypte,+ nga bungbi ti azo ti gbia so ayeke dë buze ayeke vo ambarata ni na gros.*+ 17  Ngere ti puse ti mbarata oko so a mû na Égypte a ga na ni ayeke lê ti nginza ti argent 600, nga ngere ti mbarata oko ayeke lê ti nginza ti argent 150. Me ala yeke kä peko ni na agbia kue ti azo ti mara ti Heth nga na agbia ti kodro ti Syrie.

Kete tënë

Wala “ayeke gue kâ ti hunda Nzapa.”
Na Hébreu: “si mbi tï na devant ti azo so ti gue na ala nga ti kiri na ala.”
Wala “âme.”
Wala “azo ti kpengo na mbarata.”
Wala “azo ti kpengo na mbarata.”
A lingbi nga ti tene “na Égypte nga na Kue; azo ti dengo buze ti gbia ayeke vo ala na Kue.” Kue aye peut-être ti sara tënë ti sese ti Cilicie.