Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 7:1-20

LI TI ATËNË NI

  • Élisée asara tënë ti hunzingo ti kota nzara ni (1, 2)

  • A wara gbâ ti kobe na yâ ti camp ti azo ti Syrie (3-15)

  • Prophétie ti Élisée aga tâ tënë (16-20)

7  Élisée atene: “Mä tënë so Jéhovah atene. Jéhovah atene: ‘Kekereke na l’heure tongaso na yanga ti gbagba* ti Samarie, ngere ti séa* ti pendere farine ayeke duti sicle* oko, nga ngere ti kilo 10 ti lê ti orge ayeke duti sicle oko.’”+  Na mango tënë so, kota zo so gbia azia bê ti lo kue na ndö ti lo atene na prophète Élisée: “Même tongana Jéhovah azi afenêtre ti yayu, ye tongaso* alingbi biani ti si?”+  Élisée atene: “Mo yeke bâ ande ni na lê ti mo,+ me mo yeke te ni pëpe.”+  Ambeni zo ti buruma osio ayeke na yanga ti gbagba ti gbata ni.+ Ala sara tënë na mba ala tene: “E yeke ngbâ ge ngbii ti kui ngbanga ti nyen?  Tongana e tene: ‘E lï na yâ ti gbata ni,’ e yeke kui ndali ti so kota nzara ayeke na yâ ni.+ Tongana e ngbâ nga ti duti gï ge, e yeke kui. Tongaso e gue na yâ ti camp ti azo ti Syrie. Tongana ala ke ti fâ e, e yeke ngbâ na fini. Me tongana ala ye ti fâ e, ala fâ e.”  Tongaso, na lakui so ndo ayeke gue ti vuko, ala gue ala lï na yâ ti camp ti azo ti Syrie. Na ngoi so ala si na terê ti camp ni, zo oko ayeke dä pëpe.  Jéhovah asara si aturugu ti Syrie amä go ti apuse ti mbarata nga na ambarata ti bira, ala bâ atene a yeke gbâ ti aturugu la.+ Ni la zo oko oko atene na mba ti lo, atene: “Gbia ti Israël afuta agbia ti azo ti mara ti Heth nga na agbia ti azo ti Égypte ti ga ti sara bira na e!”  Hio, ala londo ala kpe na lakui ni so, ala zia atente ti ala, ambarata ti ala nga na akororo ti ala. Ala kpe ti bata fini* ti ala, na camp ni kue angbâ gï tongaso.  Na ngoi so azo ti buruma so asi na terê ti camp ni awe, ala lï na yâ ti mbeni tente ni, ala komanse ti te ye nga ti nyon ye. Ala mû argent, lor, nga na abongo so ayeke na yâ ni ala gue ala honde ni. Ala kiri, ala lï na yâ ti mbeni tente ni, ala mû aye so ayeke na yâ ni ala gue ala honde ni.  A si na mbeni ngoi, ala tene na mba, atene: “Ye so e sara so ayeke nzoni pëpe! A yeke nzoni e gue e fa nzoni tënë so na amba ti e. Tongana e gue hio pëpe si e ngbâ juska ndo ahan, a lingbi ti punir e. E gue e sara tënë ni na azo ti da ti gbia.” 10  Ala gue ala iri azo so ayeke bata yanga ti gbagba ti gbata ni, ala tene na ala: “E gue fade na yâ ti camp ti azo ti Syrie, me zo oko ayeke kâ pëpe, e mä nga go ti zo pëpe. Gï ambarata na akororo so a kanga ala la ayeke dä, nga atente ni angbâ gï tongaso.” 11  Hio, agarde ti yanga ti gbagba ni adekongo airi ndo, na a sara tënë ni na yâ ti da ti gbia. 12  Hio, gbia ni alondo na bï lo tene na awakua ti lo: “Pardon, mbi yeke fa na ala ye so aturugu ti Syrie asara na e. Ala hinga so nzara asara e,+ ni la ala zia camp ti ala ala gue ahonde terê ti ala na yâ ti ngonda, ala tene: ‘Ala yeke sigi ande na yâ ti gbata ni ti ga, e yeke gbu ala na fini lê ti ala, na pekoni e yeke lï na yâ ti gbata ni.’”+ 13  Me mbeni wakua ti lo atene: “Ambarata oku angbâ na yâ ti gbata ni. Pardon, mo soro azo oku, mo tokua ala ti bâ tâ ye so apassé kâ. Tongana azo ni ague kâ, peut-être ala yeke kui. Me tongana ala ngbâ ge, e na ala kue e yeke kui. E tokua ala e bâ.” 14  Tongaso, ala mû apuse ti mbarata use na ambarata na terê ni, na gbia atokua azo ni na yâ ti camp ti aturugu ti Syrie. Lo tene na ala: “Ala gue abâ ndo kâ.” 15  Ala mû peko ti azo ni juska na Ngu ti Jourdain. Na ndö ti lege ni, ala bâ gbâ ti abongo nga na akungba so aturugu ti Syrie atuku ni na ngoi so ala yeke kpe kirikiri. Azo ti tokua ni akiri afa peko ni na gbia. 16  Azo ni asigi na yâ ti gbata ni ala gue agbu aye na yâ ti camp ti aturugu ti Syrie. A yeke tongaso si ngere ti séa ti pendere farine aga sicle oko, nga ngere ti séa use ti lê ti orge aga sicle oko, a lingbi na tënë so Jéhovah atene.+ 17  Gbia ni atokua kota zo so ayeke mû maboko lakue na lo so ti bâ ndo na ndö ti yanga ti gbagba ni, me azo adö yâ ti lo kâ juska lo kui, a lingbi na tënë so prophète atene na gbia na ngoi so lo ga na ndo ti lo. 18  Ye ni asi tâ gï tongana ti so prophète ni atene na gbia, atene: “Kekereke na l’heure tongaso, na yanga ti gbagba ti Samarie, ngere ti séa ti pendere farine ayeke duti sicle oko, nga ngere ti séa use ti lê ti orge ayeke duti sicle oko.”+ 19  Me kota zo ni atene na prophète Élisée: “Même tongana Jéhovah azi afenêtre ti yayu, ye tongaso* alingbi ti si?” Élisée atene: “Mo yeke bâ ande ni na lê ti mo, me mo yeke te ni pëpe.” 20  A yeke tâ ye so asi na lo la, ndali ti so azo adö yâ ti lo juska lo kui na yanga ti gbagba ni.

Kete tënë

Wala “agara.”
Séa oko alingbi na litre 7,33. Bâ na B14.
Sicle oko ane gramme 11,4. Bâ na B14.
Na Hébreu: “tënë so.”
Wala “âme.”
Na Hébreu: “mara ti tënë tongaso.”