Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 4:1-44

LI TI ATËNË NI

  • Élisée asara si mafuta ti mbeni wali-mua aga gbani (1-7)

  • Mbeni wali ti kodro ti Sunem ayamba Élisée nzoni (8-16)

  • Nzapa asara si wali ni adü mbeni molenge ti koli; molenge ni akui (17-31)

  • Élisée azingo molenge ni na kuâ (32-37)

  • Élisée asara si mbeni soupe aga nzoni (38-41)

  • Élisée asara si mapa aga gbani (42-44)

4  Wali-mua ti mbeni zo so ayeke oko ti azo so ayeke amolenge ti aprophète+ atoto na Élisée, lo tene: “Koli ti mbi, wakua ti mo, akui awe, na mo hinga so wakua ti mo ni akpe mbeto ti Jéhovah na yâ ti gigi ti lo kue.+ Fadeso, mbeni zo so bon ti lo ayeke na li ti mbi aga ti mû amolenge ti mbi use kue ti ga angbâa ti lo.”  Élisée atene na lo: “Nyen la mbi peut ti sara ndali ti mo? Nyen la ayeke na yâ ti da ti mo nyen?” Wali ni atene: “Ye oko ayeke na yâ ti da ti mbi wakua ti mo pëpe, gï mbeni ta ti mafuta.”+  Lo tene na wali ni: “Gue, mo hunda avoizin ti mo kue ti mû na mo ata so yâ ni ayeke senge. Hunda ni gbani.  Na pekoni, gue na yâ ti da, mo kanga yanga-da na ndö ti mo na amolenge ti mo. Tuku mafuta a si yâ ti ata ni kue. Ta so asi awe, mo mû ni mo zia ni nde.”  Wali ni azia lo ahon. Tongana lo kanga yanga-da na ndö ti lo na amolenge ti lo awe, amolenge ni aga na lo ata ni, na lo yeke tuku mafuta na yâ ni, lo yeke tuku mafuta na yâ ni.+  Tongana ata ni kue asi awe, lo tene na mbeni molenge ti lo, lo tene: “Ga na mbi mbeni ta ni.”+ Me molenge ni atene: “Ata ni kue la.” Ge, mafuta ni aga encore ape.+  Tongaso, lo gue na ndo ti Élisée, prophète ti tâ Nzapa, na Élisée atene na lo: “Gue mo kä mafuta ni, na mo futa bon ti mo ni. Mû tanga ti nginza ni, mo bata na amolenge ti mo.”  Mbeni lâ, Élisée ague na gbata ti Sunem,+ na lo wara mbeni wali so ayeke mbeni kota zo. Wali ni avoro yanga na lo ti ngbâ kâ ti te kobe.+ Lakue tongana lo yeke hon na ndo so, lo yeke gue na ndo ti wali ni ti te kobe.  Tongaso lo tene na koli ti lo, lo tene: “Mbi hinga so koli so ayeke ga ge lakue so ayeke mbeni prophète. 10  Pardon, zia e leke mbeni kete chambre na lo na ndö ti li ti da.+ E zia gbogbo, table, ye ti duti nga na ye ti yongo lampe dä. Tongaso lakue tongana lo ga na ndo ti e, lo lingbi ti lango kâ.”+ 11  Mbeni lâ, lo ga lo gue na yâ ti chambre so ayeke na ndö ti da ni, lo lango kâ. 12  Lo tene na wakua ti lo Guéhazi,+ lo tene: “Iri wali ti Sunem+ so.” Tongaso, lo iri lo, na wali ni aga aluti na gbele lo. 13  Élisée atene na Guéhazi: “Pardon, hunda lo, mo tene: ‘So mo mû ngoi ti leke aye so kue ndali ti e so,+ nyen la mbi peut ti sara ndali ti mo?+ Mo ye si mbi sara tënë ti mo na gbia+ wala na mokonzi ti aturugu?’” Me wali ni atene: “Mbi yeke na popo ti azo ti kodro ti mbi, ye oko asara mbi pëpe.” 14  Tongaso, lo hunda ndo, lo tene: “Nyen la a peut ti sara na lo?” Guéhazi atene: “Lo yeke na molenge pëpe,+ nga koli ti lo aga mbakoro awe.” 15  Hio lo tene: “Iri lo ge.” Tongaso, lo iri wali ni, na lo ga lo luti na yanga-da. 16  Lo tene: “Na ngu ti peko, na oko ngoi so, mo yeke gbu ande mbeni molenge na kate ti mo.”+ Me wali ni atene: “Kota zo, mo yeke prophète ti tâ Nzapa. Mo handa mbi wakua ti mo tongaso pëpe.” 17  Me na ngu ti peko, wali ni amû ngo, lo dü mbeni molenge ti koli tâ gï na ngoi ni so, tongana ti so Élisée atene. 18  Molenge ni akono. Mbeni lâ, lo gue na ndo ti babâ ti lo so ayeke na terê ti azo ti fango alê ti kobe. 19  Lo yeke tene na babâ ti lo, lo tene: “Aï, li ti mbi! Li ti mbi!” Tongaso babâ ni atene na mbeni wakua ti lo, lo tene: “Mû lo, mo gue na lo na mama ti lo.” 20  Lo mû molenge ni, lo kiri na lo na mama ti lo. Lo duti na ndö ti genou ti mama ti lo juska na midi, na pekoni lo kui.+ 21  Mama ni ague azia lo na ndö ti gbogbo ti prophète ni,+ lo kanga yanga-da na ndö ti lo na lo hon. 22  Lo tokua ndo na koli ti lo, lo tene: “Pardon, tokua na mbi mbeni wakua nga na mbeni kororo. Zia mbi gue hio na ndo ti prophète ni si mbi kiri.” 23  Me koli ni atene: “So laso ayeke fini nze+ wala lâ ti sabbat ape so, mo gue ti bâ lo ngbanga ti nyen?” Wali ni atene: “Mbi gue ti bâ lo senge.” 24  Tongaso lo leke ye na ndö ti kororo ni, na lo tene na wakua ni, lo tene: “Gue hio! Tongana mbi zi yanga na mo pëpe, mo ku mbi pëpe.” 25  Tongaso, lo gue na ndo ti prophète Élisée na Hoto ti Carmel. Gï so prophète ni abâ lo yongoro kâ, lo tene na wakua ti lo Guéhazi, lo tene: Wali ti Sunem so la ayeke kâ so. 26  Pardon, kpe loro na devant ti lo, mo hunda lo, mo tene: ‘Mo yeke senge? Koli ti mo ayeke senge? Molenge ti mo kue?’” Lo hunda wali ni, na lo tene: “E kue e yeke senge.” 27  Tongana lo si na terê ti prophète Élisée na ndö ti hoto ni, hio lo tï lo gbu gere ti lo.+ Guéhazi aga nduru na lo ti pusu lo yongoro, me Élisée atene: “Zia lo, ndali ti so bê ti lo ason ngangu,* me Jéhovah afa ye oko na mbi na ndö ni pëpe.” 28  Wali ni atene: “Seigneur ti mbi, mbi hunda lani ti wara molenge? Mbi tene na mo mbi tene: ‘Mo handa mbi pëpe!’”+ 29  Hio, lo tene na Guéhazi: “Kanga yongoro bongo ti mo na gbe ti yâ ti mo,+ mû keke ti mbi na mo gue. Tongana mo tingbi na zo na lege, bara lo pëpe. Nga tongana mbeni zo abara mo, mo kiri tënë na lo pëpe. Gue mo zia keke ni na ndö ti lê ti molenge ni.” 30  Mama ti molenge ni atene: “Ti tâ tënë ni, so Jéhovah ayeke na fini nga so mo kue mo yeke* na fini, mbi yeke zia mo ti hon pëpe.”+ Tongaso, lo londo, lo na wali ni ague. 31  Guéhazi asi kâ kozo na ala, na lo zia keke ni na ndö ti lê ti molenge ni. Me molenge ni asara terê ti lo pëpe.+ Tongaso, lo kiri lo tingbi na Élisée na lo tene na lo: “Molenge ni azingo pëpe.” 32  Tongana Élisée alï na yâ ti da ni, lo bâ kuâ ti molenge ni na ndö ti gbogbo+ ti lo Élisée ni. 33  Lo kanga yanga-da na ndö ti lo na molenge ni na lo komanse ti sambela Jéhovah.+ 34  Na pekoni, lo gue lo monté na ndö ti gbogbo ni lo lango na ndö ti molenge ni. Lo zia yanga ti lo na ndö ti yanga ti molenge ni, lê ti lo na ndö ti lê ti molenge ni nga maboko ti lo na yâ ti maboko ti molenge ni. Lo ngbâ gï na ndö ti molenge ni ngbii terê ti molenge ni akomanse ti mû wâ.+ 35  Na pekoni, Élisée alondo atambela na yâ ti da ni, lo gue kâ lo ga ge. Lo kiri lo monté na ndö ti gbogbo ni lo lango na ndö ti molenge ni. Molenge ni angasi fani mbasambala, na pekoni lo zi lê ti lo.+ 36  Élisée airi Guéhazi, na lo tene na lo: “Iri wali ti Sunem ni.” Tongaso, lo gue lo iri wali ni, na wali ni aga alï na terê ti lo na yâ ti da ni. Lo tene na wali ni: “Mû molenge ti mo.”+ 37  Wali ni aga atï na gere ti lo, akpo li ti lo na sese na gbele lo, na pekoni lo mû molenge ni, lo sigi lo gue. 38  Élisée akiri na Guilgal. Na ngoi ni so, kota nzara amû ndo na yâ ti kodro ni.+ Azo so ayeke amolenge ti aprophète+ aga aduti na gbele lo, na lo tene na wakua ti lo:+ “Mû kota tawa mo sara soupe na amolenge ti aprophète so.” 39  Mbeni zo na popo ti ala ague na yâ ti ngonda ti fâ akugbe ti kasa. Lo wara mbeni vigne na lo fâ lê ni gbani asi yâ ti bongo ti lo. Lo kiri na kodro, lo fâ yâ ni kete kete na lo tuku ni na yâ ti soupe ni. Me lo hinga ye so lo zia na yâ ti soupe ni so pëpe. 40  Ala mû soupe ni na azo, me gï so azo ni anyon ni, ala komanse ti dekongo, ala tene: “Aï prophète ti tâ Nzapa, sioni yorö ayeke na yâ ni!” Tongaso, ala peut ti nyon ni pëpe. 41  Lo tene: “Ala ga na mbeni farine na mbi.” Lo mû ni lo tuku ni na yâ ti tawa ni, na lo tene: “Ala mû ni na azo ni.” Na a sara sioni na zo oko pëpe.+ 42  Mbeni zo alondo na kodro ti Baal-Shalishah+ lo ga, lo mû na prophète Élisée mapa 20 so a sara na akozo lê ti orge+ nga na mbeni bozo so afini lê ti kobe+ ayeke na yâ ni. Élisée atene: “Mû ni na azo ni ti tene ala te.” 43  Me wakua ti lo atene: “Kobe ni so apeut ti lingbi azo 100?”+  Élisée atene na lo: “Mû ni na azo ni ala te, ndali ti so Jéhovah atene: ‘Ala yeke te ni na tanga ni ayeke ngbâ.’”+ 44  Na mango tënë so, lo mû ni na azo ni, ala te ni na tanga ni angbâ,+ a lingbi na tënë ti yanga ti Jéhovah.

Kete tënë

Wala “âme ti lo ayeke na vundu mingi.”
Wala “âme ti mo ayeke.”