Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 3:1-27

LI TI ATËNË NI

  • Joram aga gbia ti Israël (1-3)

  • Moab asara ngangu-li na Israël (4-25)

  • A kinda Moab (26, 27)

3  Na yâ ti ngu 18 ni ti komandema ti Josaphat gbia ti Juda, Joram+ molenge ti Achab aga gbia na Samarie na ndö ti azo ti Israël. Lo komande ngu 12.  Lo ngbâ ti sara ye so ayeke sioni na lê ti Jéhovah. Me sioni ti lo ni alingbi na ti babâ wala ti mama ti lo pëpe, ndali ti so lo zi pilier so babâ ti lo aleke ti tene a voro na Baal.+  Ye oko, lo ngbâ gï ti sara siokpari so Jéroboam molenge ti Nébat apusu lani azo ti Israël ti sara ni.+ Lo zia lege ni pëpe.  Mésa gbia ti Moab ayeke bata ataba, nga lo yeke mû ka akete taba 100 000 nga na akoli taba 100 000 so ade a fâ kuä ti terê ti ala pëpe na gbia ti Israël tongana impôt so lo doit ti futa.  Gï so Achab akui+ awe, gbia ti Moab alondo ti ke yanga ti gbia ti Israël.+  Tongaso, Gbia Joram alondo na lango ni so na Samarie lo gue lo bungbi aturugu ti Israël kue.  Lo tokua nga zo na Josaphat gbia ti Juda, lo tene: “Gbia ti Moab alondo ti ke yanga ti mbi. Mo yeke gue legeoko na mbi ti tiri bira na azo ti Moab?” Gbia Josaphat atene: “En, mbi yeke gue.+ Mbi na mo e yeke oko. Azo ti mbi ayeke azo ti mo. Ambarata ti mbi ayeke ambarata ti mo.”+  Lo hunda lo, lo tene: “Lege wa la e yeke mû ni?” Lo kiri tënë, lo tene: “E yeke hon na yâ ti benyama ti kodro ti Édom.”  Gbia ti Israël, gbia ti Juda nga na gbia ti Édom+ ahon. Ala mû mbeni lege so asara si ala ngoro ngorongo na yâ ti lango mbasambala. Ala wara ngu ndali ti azo ti yâ ti camp ni nga na anyama so ala ga na ni so pëpe. 10  Gbia ti Israël atene: “So ye ti mawa ti nyen! Jéhovah abungbi e agbia ota kue ti zia e na maboko ti azo ti Moab!” 11  Na mango tënë so, Josaphat atene: “Mbeni prophète ti Jéhovah ayeke ge ti tene e hunda Jéhovah ape?”+ Mbeni wakua ti gbia ti Israël atene: “Élisée,+ molenge ti Shaphat, so ayeke tuku lani ngu na maboko ti Élie* ayeke ge.”+ 12  Josaphat atene: “Tënë ti Jéhovah ayeke na yanga ti lo.” Tongaso, gbia ti Israël, Josaphat nga na gbia ti Édom ague abâ lo. 13  Élisée atene na gbia ti Israël: “Ti mo nyen na mbi?*+ Gue na ndo ti aprophète ti babâ ti mo nga na aprophète ti mama ti mo.”+ Me gbia ti Israël atene na lo: “Ên-ën, ndali ti so Jéhovah la abungbi e agbia ota kue ti zia e na maboko ti azo ti Moab.” 14  Élisée atene: “Ti tâ tënë ni, so Jéhovah ti aturugu so mbi yeke sara na lo ayeke na fini, tongana fade Josaphat+ gbia ti Juda ayeke ge pëpe, ka mbi yeke bâ lê ti mo pëpe nga mbi yeke sara sanka ti mo.+ 15  Ala ga na mbi mbeni zo ti pikango harpe.”*+ Gï so zo ni akomanse ti pika harpe ni, ngangu ti Jéhovah aga na ndö ti lo.+ 16  Lo tene: “Jéhovah atene: ‘Ala zi adû gbani gbani na yâ ti popo-hoto* so, 17  ndali ti so Jéhovah atene: “Pupu ayeke ya pëpe nga ngu-nzapa ayeke pika pëpe. Me yâ ti popo-hoto* so ayeke si ande na ngu.+ Ala nga na anyama ti ala kue ayeke nyon ande ngu ni.”’ 18  Me ye ni so ayeke ye oko pëpe na lê ti Jéhovah,+ ndali ti so lo yeke zia nga kodro ti Moab na maboko ti ala.+ 19  Ala doit ti futi agbata kue so ngangu gbagba ayeke na terê ni+ nga na agbata kue so ayeke pendere mingi. Ala doit ti dë anzoni keke kue na sese, ala kanga ali ti ngu kue nga ala mû atênë ala bi ni na yâ ti anzoni sese kue ti buba ni.+ 20  Na ndapre, na ngoi ti mungo sandaga ti lê ti kobe,+ mo ye ti bâ, ngu alondo na mbage ti Édom aga amû ndo ni kue. 21  Azo ti kodro ti Moab amä so agbia aga ti sara bira na ala. Tongaso, ala bungbi azo kue so alingbi ti yô aye ti bira,* ala zia ala na yanga ti kodro ni. 22  Tongana ala londo na kota ndapre, lâ ayeke su na ndö ti ngu ni, na azo ti Moab so ayeke na mbage kâ abâ ti ala so ngu ni abe tongana mênë. 23  Ala tene: “So mênë la! Azo ti agbia so la adoit ti fâ terê na popo ti ala na épée so. Azo ti Moab, e gue e mû aye ti ala!”+ 24  Na ngoi so azo ti Moab asi na yâ ti camp ti azo ti Israël, azo ti Israël akomanse ti fâ ala, na ala kpe.+ Azo ti Israël alï na yâ ti kodro ti Moab, ala ngbâ ti fâ azo ti gue na ni. 25  Ala kungbi agbata, zo oko oko abi tênë na yâ ti anzoni sese ni kue, juska tênë amû yâ ni kue. Ala kanga ali ti ngu kue+ nga ala dë anzoni keke kue na sese.+ Gï gbagba ti tênë ti Kir-Haréseth+ la angbâ. Me azo ti bingo atênë na mvingi angoro ni na ala kungbi ni. 26  Tongana gbia ti Moab abâ so a sö benda na ndö ti lo na yâ ti bira ni, lo mû na terê ti lo akoli 700 so ayeke na épée, lo na ala ague ti tiri ti tene ala si na ndo ti gbia ti Édom.+ Me ala wara lege pëpe. 27  Ni la lo mû kozo molenge ti lo so adoit ti ga gbia na peko ti lo, lo zö lo na sandaga na ndö ti gbagba ni ngbii lo gbi kue.+ Bê ti azo ason ngangu na terê ti azo ti Israël, tongaso ala zia lege ti sarango bira na lo, na ala kiri na kodro ti ala.

Kete tënë

Wala “so ayeke wakua ti Élie.”
Na Hébreu: “Ti mbi na mo nyen dä?”
Wala “zo ti pikango mozoko.”
Wala “ala kue so akanga ceinture na gbe ti yâ ti ala.”