Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 22:1-20

LI TI ATËNË NI

  • Josias aga gbia ti Juda (1, 2)

  • Aye so a fa ndali ti lekengo aye so abuba na yâ ti temple ni (3-7)

  • A wara mbeti ti Ndia (8-13)

  • Prophète-wali Huldah asara tënë ti sioni ye so ayeke si ande (14-20)

22  Josias+ ayeke na ngu miombe na ngoi so lo ga gbia. Lo komande na Jérusalem ngu 31.+ Iri ti mama ti lo ayeke Jédidah, molenge ti Adaïah zo ti kodro ti Bozcath.+  Lo sara ye so ayeke na lege ni na lê ti Jéhovah nga lo sara aye kue tongana ti so kotara ti lo David asara lani.+ Lo zia lege ni pëpe ti hon na mbage ti koli wala na mbage ti wali.  Na yâ ti ngu 18 ni ti komandema ti Gbia Josias, gbia atokua wakuasu Shaphan, molenge ti Azaliah so ayeke molenge ti Méshullam, na da ti Jéhovah.+ Lo tene:  “Gue na ndo ti kota prêtre Hilkiah,+ na hunda na lo ti bungbi nginza kue so azo ayeke ga na ni na yâ ti da ti Jéhovah,+ so azo so ayeke bata ayanga ti gbagba aro na maboko ti azo.+  Mû yanga na ala ti mû ni na azo so a zia ala ti bâ ndo na ndö ti kua so a yeke sara na yâ ti da ti Jéhovah. Azo ni so ayeke mû ni na azo so ayeke leke aye so abuba na terê ti da ni,*+  so ti tene, azo so ahinga ti sara kua ti maboko nzoni, azo ti lekengo da nga na amaçon. Ala yeke mû nginza ni ti vo na akeke nga na atênë so a dë terê ni pendere ti leke na peko ti da ni.+  Me a yeke hunda pëpe na azo so a mû nginza ni na ala ti fa peko ti ye so ala sara na nginza ni, ndali ti so ala yeke azo so a sara confiance na ala.”+  Na pekoni, kota prêtre Hilkiah atene na wakuasu Shaphan:+ “Mbi wara mbeti ti Ndia+ na yâ ti da ti Jéhovah.” Tongaso, Hilkiah amû mbeti ni na Shaphan, na lo to nda ti diko ni.+  Wakuasu Shaphan ague atene na gbia, atene: “Awakua ti mo asigi na nginza so ayeke na yâ ti da ni, ala mû ni na azo so a zia ala ti bâ ndo na ndö ti kua so a yeke sara na yâ ti da ti Jéhovah awe.”+ 10  Wakuasu Shaphan atene nga na gbia: “Prêtre Hilkiah amû na mbi mbeni mbeti.”+ Na pekoni, Shaphan akomanse ti diko mbeti ni na gbele gbia. 11  Gï so gbia amä atënë so ayeke na yâ ti mbeti ti Ndia ni, lo suru bongo na terê ti lo.+ 12  Na pekoni, gbia amû yanga na prêtre Hilkiah, na Ahicam+ molenge ti Shaphan, na Akbor molenge ti Micaïah, na wakuasu Shaphan nga na Asaïah wakua ti gbia, atene: 13  “Ala gue ala hunda Jéhovah ndali ti mbi, ndali ti azo ni nga ndali ti azo ti Juda kue na ndö ti tënë so ayeke na yâ ti mbeti so a wara ni so. Ngonzo ti Jéhovah alondo tongana wâ na terê ti e,+ ndali ti so akotara ti e asara ye pëpe alingbi na atënë kue so ayeke na yâ ti mbeti ni so a sû ni ndali ti e so.” 14  Tongaso, prêtre Hilkiah, Ahicam, Akbor, Shaphan nga na Asaïah ague na ndo ti prophète-wali Huldah.+ Lo yeke wali ti Shallum, molenge ti Ticvah so ayeke molenge ti Harhas, zo so ayeke bâ lege ti abongo. Huldah asara kodro na Jérusalem, na Use Quartier ni. Ala wara lo kâ na ala sara tënë na lo.+ 15  Lo tene na ala: “Jéhovah Nzapa ti Israël atene: ‘Ala tene na zo so atokua ala na mbi so, ala tene: 16  “Jéhovah atene: ‘Mbi yeke ga na ye ti vundu na ndö ti kodro so nga na azo ni, a lingbi na tënë kue so ayeke na yâ ti mbeti so gbia ti Juda adiko so.+ 17  So ala dö mbi ala zia nga ala yeke zö asandaga na ambeni nzapa nde+ ti son bê ti mbi na akusala ti maboko ti ala kue,+ ngonzo ti mbi ayeke londo tongana wâ na terê ti ndo so, nga bê ti mbi ayeke dë pëpe.’”+ 18  Me ti gbia ti Juda so atokua ala na mbi ti tene mbi hunda Jéhovah so, ala tene na lo, atene: “Âdu ti tënë so mo mä so, Jéhovah Nzapa ti Israël atene: 19  ‘Na ngoi so mo mä tënë so mbi Jéhovah mbi tene na terê ti ndo so nga na azo ni, so mbi tene ala yeke ga mbeni ye ti mungo kota mbeto na zo nga ye so a deba ni awe, tënë ni andu bê ti mo,* mo sara terê ti mo kete+ na gbele mbi, mo suru bongo na terê ti mo+ nga mo toto na gbele mbi. Tongaso mbi Jéhovah nga kue, mbi mä mo awe. 20  Ndani la mbi yeke sara si mo wu terê ti mo tongana ti akotara ti mo,* a yeke lu ande mo na yâ ti siriri nga mo yeke bâ ande pëpe aye ti vundu kue so mbi yeke ga na ni na ndö ti kodro so.’”’” Ala gue afa peko ti yanga ti lo na gbia.

Kete tënë

Wala “amur ni so asuru.”
Na Hébreu: “bê ti mo awoko.”
So ayeke mbeni fason ti tene so zo ni akui.