Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 2:1-25

LI TI ATËNË NI

  • A mû Élie na yâ ti mbeni kota pupu a hon na lo (1-18)

    1

    • Élisée amû bongo ti Élie ti prophète (13, 14)

  • Élisée asara si ngu ti Jéricho aga nzoni ngu (19-22)

  • A-ours afâ ambeni molenge-koli na Béthel (23-25)

2  Na ngoi so Jéhovah aye ti mû Élie+ na yâ ti kota pupu+ ti gue na lo na yayu,* Élie na Élisée+ alondo na gbata ti Guilgal+ ala yeke hon.  Élie atene na Élisée: “Pardon, mo ngbâ ge, ndali ti so Jéhovah atokua mbi na gbata ti Béthel.” Me Élisée atene: “Ti tâ tënë ni, so Jéhovah ayeke na fini nga so mo kue mo yeke* na fini, mbi yeke zia mo pëpe.” Tongaso ala gue na Béthel.+  Na Béthel, amolenge ti aprophète* aga awara Élisée, na ala tene na lo: “Mo hinga so laso Jéhovah ayeke mû wa ti mo ti hon na lo, si lo ngbâ mokonzi na ndö ti mo encore ape?”+ Lo tene: “En, mbi hinga. Ala duti kpô.”  Élie akiri atene na lo: “Pardon, Élisée, mo ngbâ ge, ndali ti so Jéhovah atokua mbi na gbata ti Jéricho.”+ Me lo tene: “Ti tâ tënë ni, so Jéhovah ayeke na fini nga so mo kue mo yeke* na fini, mbi yeke zia mo pëpe.” Tongaso, ala gue na Jéricho.  Na pekoni, amolenge ti aprophète so ayeke na Jéricho aga na terê ti Élisée, ala tene: “Mo hinga so laso Jéhovah ayeke mû wa ti mo ti hon na lo, si lo ngbâ mokonzi na ndö ti mo encore ape?” Lo tene: “En, mbi hinga. Ala duti kpô.”  Élie akiri atene na lo: “Pardon, mo ngbâ ge, ndali ti so Jéhovah atokua mbi na mbage ti Ngu ti Jourdain.” Me lo tene: “Ti tâ tënë ni, so Jéhovah ayeke na fini nga so mo kue mo yeke* na fini, mbi yeke zia mo pëpe.” Tongaso ala use kue ague.  Azo 50 so ayeke amolenge ti aprophète ague nga na peko ti ala, me ala luti yongoro ala yeke bâ Élie na Élisée so aluti na yanga ti Ngu ti Jourdain.  Élie amû bongo ti lo ti prophète,+ lo roulé ni na lo pika na lê ti ngu ni. Yâ ti ngu ni akangbi use, mbage na mbage, na ala use kue afâ ngu ni na ndö ti kuru sese.+  Gï so ala fâ ngu ni, Élie atene na Élisée: “Nyen la mo ye mbi sara na mo kozoni si a mû mbi a hon na ni?” Élisée atene: “Pardon, ngangu ti Nzapa so ayeke na ndö ti mo so,+ mbi lingbi ti wara ni fani use?”+ 10  Élie atene: “Mo hunda mbeni ye so ayeke ngangu mingi. Tongana mo bâ mbi na ngoi so a mû mbi na terê ti mo a hon na ni, a yeke si tongana ti so mo hunda. Me tongana mo bâ mbi pëpe, a yeke si pëpe.” 11  Na ngoi so ala yeke tambela na ala yeke sara lisoro, mo ye ti bâ, mbeni puse ti mbarata so wâ ayeke za na terê ni nga na ambarata so wâ ayeke za na terê ti ala+ aga akangbi yâ ti ala use. Mbeni kota pupu amû Élie ahon na lo na yayu.*+ 12  Na ngoi so Élisée ayeke bâ ye so asi, lo dekongo, lo tene: “Aï, babâ ti mbi! Aï, babâ ti mbi! So ayeke puse ti mbarata nga na azo ti kpengo na mbarata ti Israël la ape?”+ Na ngoi so Élie ahon awe, Élisée agbu bongo ti lo wani lo suru yâ ni use.+ 13  Na pekoni, lo mû bongo ti Élie ti prophète+ so atï na sese, lo kiri lo gue lo luti na yanga ti Ngu ti Jourdain. 14  Lo mû bongo ti Élie ni so, lo pika na lê ti ngu na lo tene: “Jéhovah, Nzapa ti Élie, ayeke na ndo wa?” Na peko ti so Élisée apika ngu ni, yâ ni akangbi use, mbage na mbage, na lo fâ ngu ni.+ 15  Tongana amolenge ti aprophète so ayeke na Jéricho abâ Élisée na ngoi so lo ngbâ yongoro, ala tene: “Yingo ti Élie aga na ndö ti Élisée.”+ Ala gue na devant ti lo, ala kuku, ala kpo li ti ala na sese na gbele lo. 16  Ala tene na lo: “E awakua ti mo e yeke na akpengba koli 50 ge. Pardon, zia ala gue agi wa ti mo. Hinga ape, yingo* ti Jéhovah amû lo ague abi lo na li ti mbeni hoto wala na yâ ti mbeni popo-hoto.”+ Me lo tene: “Ala tokua ala pëpe.” 17  Me ala ngbâ ti ha lo juska lo bâ gbä lo tene na ala: “Ala tokua ala.” Ala tokua akoli 50 so. Me ala gue agi lo na yâ ti lango ota gbä, ala wara lo pëpe. 18  Na ngoi so ala kiri ala ga ala wara Élisée, lo ngbâ na Jéricho.+ Lo tene na ala, lo tene: “Mbi tene fade na ala mbi tene ala gue ape-aa!” 19  Mbeni lâ, azo ti gbata ni atene na Élisée: “Kota zo, tongana ti so mo bâ, ndo so gbata ti e ayeke dä so ayeke nzoni,+ me ngu ni ayeke nzoni pëpe, nga sese ni ayeke nzoni pëpe.”* 20  Na mango tënë so, lo tene: “Ala zia ingo na yâ ti mbeni fini dû ti sembe, ala ga na ni na mbi.” Tongaso ala ga na ni na lo. 21  Na pekoni, lo gue na li ti ngu ni lo tuku ingo ni na yâ ni+ na lo tene: “Jéhovah atene: ‘Mbi sara si ngu ni aga nzoni awe. Zo so anyon ni ayeke kui encore ape nga mbeni wali so adü pëpe* ayeke duti dä encore ape.’” 22  Ngu ni angbâ nzoni juska laso, a lingbi na tënë ti yanga ti Élisée. 23  Lo londo kâ lo gue na Béthel. Na lege, ambeni molenge-koli asigi na yâ ti gbata ni, na ala komanse ti he lo.+ Ala tene: “Li-mbombo, mo gue! Li-mbombo, mo gue!” 24  A si na mbeni ngoi, lo bâ ala, na lo deba ala na iri ti Jéhovah. Na pekoni, amama ti ours use+ asigi na yâ ti gbako asuru yâ ti amolenge ni 42.+ 25  Lo gue juska lo si na Hoto ti Carmel,+ na pekoni lo londo kâ lo kiri na Samarie.

Kete tënë

Wala “na lê ti nduzu.”
Wala “âme ti mo ayeke.”
Tënë “amolenge ti aprophète” aye peut-être ti sara tënë ti mbeni ekole so ayeke fa ye na aprophète, wala mbeni bungbi ti aprophète.
Wala “âme ti mo ayeke.”
Wala “âme ti mo ayeke.”
Wala “na lê ti nduzu.”
Wala “pupu.”
A lingbi nga ti tene “asara si ngo ti azo na ti anyama ayeke tï tingo.”
A lingbi nga ti tene “ngo ti azo na ti anyama so atï tingo.”