Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 17:1-41

LI TI ATËNË NI

  • Osée aga gbia ti Israël (1-4)

  • Mungo kodro ti Israël (5, 6)

  • A gue na azo ti Israël na kodro-wande ndali ti so ala voro ambeni nzapa nde (7-23)

  • A ga na ambeni wande ti sara kodro na yâ ti agbata ti Samarie (24-26)

  • Azo ti Samarie abungbi vorongo Jéhovah na anzapa ti ala oko (27-41)

17  Na ngu 12 ni ti komandema ti Achaz gbia ti Juda, Osée+ molenge ti Élah aga gbia na Samarie na ndö ti azo ti Israël. Lo komande ngu gumbaya.  Lo ngbâ ti sara ye so ayeke sioni na lê ti Jéhovah. Me sioni ti lo ni alingbi pëpe na ti agbia ti Israël so akomande kozo na lo.  Salmanasar, gbia ti Assyrie, aga asara bira na Osée.+ Osée aga wakua ti lo na lo komanse ti futa na lo impôt so lo doit ti futa.+  Ye oko, gbia ti Assyrie amä so Osée amä terê na ambeni zo ti ke yanga ti lo, ndali ti so Osée atokua azo na So, gbia ti Égypte,+ nga lo futa pëpe na gbia ti Assyrie impôt so lo yeke futa ka ngu na ngu. Tongaso, gbia ti Assyrie akanga maboko ti lo na gere ti lo, na lo bi lo na da ti kanga.  Gbia ti Assyrie aga amû ndo na yâ ti kodro ni kue, lo gue juska na gbata ti Samarie na lo sara camp na terê ti gbata ni ngu ota.  Gbia ti Assyrie amû gbata ti Samarie+ na yâ ti ngu gumbaya ni ti komandema ti Osée. Lo mû azo ti Israël lo gue na ala+ na Assyrie, lo zia ala ti tene ala sara kodro na Halah, na Habor so ayeke na terê ti ngu ti Gozan+ nga na yâ ti agbata ti azo ti Médie.+  Ye so asi ndali ti so azo ti Israël asara siokpari na terê ti Jéhovah Nzapa ti ala, lo so asigi na ala na Égypte nga na gbe ti komandema ti Pharaon gbia ti Égypte.+ Ala voro* ambeni nzapa nde,+  ala sara ye alingbi na angobo ti amara so Jéhovah atomba ala na devant ti azo ti Israël nga ala mû peko ti angobo so agbia ti Israël azia na sese.   Amolenge ti Israël angbâ ti sara aye so ayeke na lege ni pëpe na lê ti Jéhovah, Nzapa ti ala. Ala ngbâ ti leke ando so ayeke na nduzu na yâ ti agbata ti ala kue, a londo na atour so asinziri ayeke luti dä ti bâ ndo, juska na agbata+ so ayeke na yâ ti ngangu gbagba.* 10  Na ndö ti akete hoto kue nga na gbe ti akeke kue so akugbe ni adü pendere,+ ala ngbâ ti leke ayanda ti tênë+ nga na ayongoro yanda.* 11  Na ando kue so ayeke na nduzu, ala yeke zö asandaga tongana ti amara so Jéhovah atomba ala lani na devant ti ala si ala gue asara kodro na mbeni ndo nde.+ Ala ngbâ gï ti sara aye ti sioni ti son bê ti Jéhovah. 12  Ala ngbâ ti voro afungo yanda,*+ atâa so Jéhovah atene na ala, atene: “Ala sara ye ni so pëpe!”+ 13  Jéhovah angbâ ti tokua na azo ti Israël aprophète ti lo kue nga na azo kue so ayeke fa peko ti avision,+ ti gboto mê ti ala. Lo tene: “Ala zia sioni lege ti ala,+ ala kiri na mbi. Ala bata acommandement ti mbi na andia ti mbi, so ti tene andia kue so mbi hunda lani na akotara ti ala ti bata nga so mbi fa na ala na lege ti awakua ti mbi aprophète.” 14  Me ala mä pëpe, nga ala ngbâ ti sara kpengba-li* tongana akotara ti ala so ayeke lani na mabe na Jéhovah Nzapa ti ala pëpe.+ 15  Ala ngbâ ti ke andia ti lo so ayeke fa lege na zo nga na mbele+ so lo te lani na akotara ti ala. Ala ke nga awango so lo mû na ala ti gboto mê ti ala,+ ala ngbâ ti voro ayanda so ayeke asenge senge ye+ na a sara si ala ga gï tongana ayanda ni.+ Ala sara ye tâ gï tongana amara so angoro ala, so Jéhovah atene na ala ti sara ye tongana ala pëpe.+ 16  Ala ngbâ ti sara ye ague nde na acommandement ti Jéhovah Nzapa ti ala. Ala leke astatue ti wen* use so akpa abagara+ nga na yongoro yanda.*+ Ala kuku nga na gbe ti aye kue so ayeke na yayu+ nga ala voro Baal.+ 17  Ala gbi*+ amolenge ti ala ti koli na ti wali, ala bâ mbadi+ nga ala gue abâ azo so ayeke fa ye so ayeke si kekereke. Ala ngbâ ti mû* terê ti ala ti sara ye so ayeke sioni na lê ti Jéhovah, ti son bê ti lo. 18  Ni la ngonzo agbu Jéhovah ngangu na terê ti azo ti Israël, na lo zi ala na lê ti lo.+ Lo zia mbeni mara angbâ pëpe, gï mara ti Juda awe. 19  Même azo ti mara ti Juda abata acommandement ti Jéhovah Nzapa ti ala pëpe.+ Ala nga kue amû peko ti angobo so azo ti Israël amû peko ni.+ 20  Jéhovah ake ahale ti Israël kue, lo zia kamene na lê ti ala nga lo zia ala na maboko ti azo ti nzi, juska lo zi ala na lê ti lo. 21  Lo zi azo ti Israël na terê ti ahale ti David, na ala sara si Jéroboam, molenge ti Nébat,+ aga gbia na ndö ti ala. Me Jéroboam asara si azo ti Israël ague yongoro na Jéhovah nga lo pusu ala ti sara kota siokpari. 22  Azo ti Israël angbâ ti sara asiokpari kue so Jéroboam asara.+ Ala zia lege ni pëpe 23  juska Jéhovah azi ala na lê ti lo, a lingbi na tënë ti lo so awakua ti lo aprophète kue afa peko ni.+ Tongaso, a gbu azo ti Israël na ngangu a gue na ala na kodro ti Assyrie,+ na ala ngbâ kâ juska laso. 24  Na pekoni, gbia ti Assyrie amû azo na Babylone, na Cuthah, na Avva, na Hamath nga na Sépharvaïm+ lo zia ala na yâ ti agbata ti Samarie na place ti azo ti Israël ti tene ala sara kodro dä. Ala komanse ti sara kodro na Samarie nga na agbata ni. 25  Na ngoi so ala komanse ti sara kodro kâ pan, ala kpe mbeto ti* Jéhovah pëpe. Tongaso, Jéhovah atokua abamara na popo ti ala,+ na ala fâ ambeni zo na popo ti ala. 26  A tene na gbia ti Assyrie, a tene: “Azo ti amara so mo mû ala mo gue mo zia ala na yâ ti agbata ti Samarie so, ala hinga pëpe tongana nyen la a yeke voro* Nzapa ti kodro ni. Ni la lo ngbâ ti tokua abamara na popo ti ala, na abamara ni afâ ala ndali ti so zo oko na popo ti ala ahinga pëpe tongana nyen la a yeke voro Nzapa ti kodro ni.” 27  Gbia ti Assyrie amû yanga, atene: “Ala mû mbeni prêtre so a gue na lo na kodro-wande so, ala kiri na lo kâ ti tene lo fa na azo ni tongana nyen la a yeke voro Nzapa ti kodro ni.” 28  Tongaso, mbeni prêtre so a mû lo na Samarie a gue na lo na kodro-wande so akiri asara kodro na Béthel,+ na lo komanse ti fa na ala tongana nyen ti kpe mbeto ti* Jéhovah.+ 29  Ye oko, azo ti mara ni oko oko aleke nzapa* ti ala wani, so ala zia ni na yâ ti ada ti vorongo anzapa so ayeke na ando so ayeke na nduzu, so azo ti Samarie aleke. Azo ti mara ni oko oko asara tongaso na yâ ti agbata so ala sara kodro dä. 30  Azo ti Babylone asara nzapa Succoth-Bénoth, azo ti Cuth asara nzapa Nergal, azo ti Hamath+ asara nzapa Ashima 31  nga azo ti Avva asara nzapa Nibhaz na Tartac. Azo ti Sépharvaïm ayeke zö amolenge ti ala na sandaga na Adrammélek nga na Anammélek, so ayeke anzapa ti ala.+ 32  Atâa so azo ni so akpe mbeto ti Jéhovah, ala mû asenge zo ti ga aprêtre na ando so ayeke na nduzu. Aprêtre ni asara kua ndali ti ala na yâ ti ada ti vorongo anzapa so ayeke na ando ni so.+ 33  Ala kpe mbeto ti Jéhovah, me ala voro anzapa ti ala gï tongana ti so ala yeke sara ka na yâ ti* akodro so a mû ala dä si a ga na ala so.+ 34  Juska laso ala ngbâ ti voro* anzapa so ala voro ândö. Zo oko na popo ti ala avoro* Jéhovah pëpe. Nga andia ti Jéhovah, ambela ti lo, Ndia so Moïse asû na mbeti nga na acommandement so lo mû na amolenge ti Jacob, so iri ti lo achangé aga Israël,+ mbeni zo ti sara ye alingbi na ni ayeke dä pëpe. 35  Na ngoi so Jéhovah ate mbele na ala,+ lo mû yanga na ala, lo tene: “A lingbi ala kpe mbeto ti mbeni nzapa nde pëpe, ala kuku na gbe ti ala pëpe, ala sara na ala pëpe nga ala yâa asandaga na ala pëpe.+ 36  Me a yeke Jéhovah so asigi na ala na kota ngangu ti lo nga na maboko ti lo so lo yôro+ ni la ala doit ti kpe mbeto ti lo,+ ti kuku na gbe ti lo nga ti yâa asandaga na lo. 37  Ala doit ti kpe mbeto ti mbeni nzapa nde pëpe, me ala doit ti sara kue ti sara ye lakue alingbi na andia ti lo so ayeke fa lege na zo, ambela ti lo, Ndia so Moïse asû ni nga na acommandement so Nzapa asara na mbeti ndali ti ala.+ 38  Nga a lingbi ala girisa pëpe mbele so mbi te na ala,+ na ala doit ti kpe mbeto ti ambeni nzapa nde pëpe. 39  Me Jéhovah Nzapa ti ala la ala doit ti kpe mbeto ti lo, ndali ti so lo la lo yeke zi ande ala na maboko ti awato ti ala kue.” 40  Me ala mä yanga ti lo pëpe, ala ngbâ ti voro* anzapa so ala voro ândö so.+ 41  Azo ti amara so akpe mbeto ti Jéhovah,+ me ala yeke voro nga ayanda ti anzapa ti ala so a leke ni na kode. Juska laso, amolenge ti ala nga na a-âta ti ala asara ye tâ gï tongana ti so akotara ti ala asara.

Kete tënë

Na Hébreu: “sara mbeto ti.”
So ti tene na ando kue, atâa azo ayeke na ando ni so mingi wala mingi pëpe.
Tënë ti Hébreu ni ge aye peut-être ti gue oko na mbeni tënë so aye ti tene “puru.” Zo ayeke tene tënë ni so na terê ti mbeni ye ti fa so lo ke ye ni bê oko.
Na Hébreu: “ala kpengba go ti ala.”
Wala “astatue so a tö wen aga ngu si a leke na ni.”
Na Hébreu: “Ala sara si amolenge ti ala ahon na yâ ti wâ.”
Na Hébreu: “kä.”
Wala “voro.”
Wala “angobo ti vorongo.”
Wala “voro.”
Wala “anzapa.”
Wala “alingbi na angobo ti.”
Wala “ti bata angobo ti.”
Wala “akpe mbeto ti.”
Wala “bata angobo ti.”