Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 16:1-20

LI TI ATËNË NI

  • Achaz aga gbia ti Juda (1-6)

  • Achaz apete goro na azo ti Assyrie (7-9)

  • Achaz asara mara ti gbalaka so ayeke na Damas (10-18)

  • Tënë ti kuâ ti Achaz (19-20)

16  Na yâ ti ngu 17 ni ti komandema ti Pécah molenge ti Rémaliah, Achaz,+ molenge ti Jotham so ayeke lani gbia ti Juda, aga gbia.  Achaz ayeke na ngu 20 na ngoi so lo ga gbia, na lo komande na Jérusalem ngu 16. Lo sara pëpe ye so ayeke na lege ni na lê ti Jéhovah Nzapa ti lo, tongana ti so kotara ti lo David asara lani.+  Me lo sara a-oko sioni ye so agbia ti Israël asara.+ Lo gbi+ même molenge ti lo,* lo mû peko ti asioni sarango ye ti azo ti amara+ so Jéhovah atomba ala lani na gbele azo ti Israël.  Lo ngbâ nga ti mû asandaga nga ti zö asandaga na ando so ayeke na nduzu,+ na li ti akete hoto nga na gbe ti keke kue so akugbe ni adü pendere.+  A yeke na ngoi ni so la si Retsin, gbia ti Syrie na Pécah, molenge ti Rémaliah so ayeke lani gbia ti Israël, aga ti sara bira na azo ti Jérusalem.+ Ala sara camp na terê ti Achaz me ala wara lege ti mû gbata ti Jérusalem pëpe.  Na ngoi ni so, Retsin gbia ti Syrie akiri na gbata ti Élath+ na azo ti Édom. Na pekoni, lo tomba aJuif* na yâ ti gbata ti Élath. Azo ti Édom ague na yâ ti gbata ti Élath, ala sara kodro dä juska laso.  Achaz atokua azo na Tiglath-Piléser,+ gbia ti Assyrie, lo tene: “Mbi yeke wakua ti mo nga molenge ti mo. Pardon, ga mo zi mbi na maboko ti gbia ti Syrie na gbia ti Israël so aga na bira na terê ti mbi.”  Achaz amû argent nga na lor so ayeke na yâ ti da ti Jéhovah nga na ti so ayeke na ando so a yeke bata mosoro ti da* ti gbia dä, lo tokua ni na gbia ti Assyrie ti pete goro na lo.+  Gbia ti Assyrie ayeda, na lo londo lo gue lo mû gbata ti Damas, lo gbu azo ti gbata ni lo gue na ala na kodro ti Kir,+ nga lo fâ Retsin.+ 10  Na pekoni, Gbia Achaz ague na Damas ti wara terê na Tiglath-Piléser, gbia ti Assyrie. Tongana Gbia Achaz abâ gbalaka so ayeke na Damas, lo tokua plan ni na prêtre Urie, lo fa na lo tapande ni nga na kode so a leke na ni.+ 11  Prêtre Urie+ aleke gbalaka+ ni alingbi na aye kue so Gbia Achaz angbâ na Damas si atokua ni na lo. Prêtre Urie ahunzi ti leke gbalaka ni kozo ti tene Gbia Achaz alondo na Damas akiri. 12  Na ngoi so gbia alondo na Damas akiri na lo bâ gbalaka ni, lo ga nduru na ni na lo yâa asandaga na ndö ni.+ 13  Lo ngbâ ti yâa na ndö ti gbalaka ni asandaga so a zö ni agbi kue nga na asandaga ti lê ti kobe. Lo tuku nga na ndö ni asandaga ti sämba nga na mênë ti anyama ti sandaga ti beoko. 14  Gbalaka so a sara na cuivre+ si ayeke na gbele Jéhovah na devant ti da ni, nga so ayeke na popo ti gbalaka ti lo na da ti Jéhovah so, lo zi ni lo zia na terê ti gbalaka ti lo ni na mbage ti nord. 15  Gbia Achaz amû yanga na prêtre Urie,+ atene: “Mo zö na ndö ti kota gbalaka+ ni sandaga ti ndapre so a zö ni agbi kue. Mo zö nga na ndö ni sandaga ti alê ti kobe ti lakui,+ sandaga ti gbia so a zö ni agbi kue nga na sandaga ti lo ti alê ti kobe. Mo zö nga na ndö ni asandaga so a zö ni agbi kue, asandaga ti alê ti kobe nga na asandaga ti sämba ti azo kue. Mo tuku nga na ndö ni mênë kue ti anyama so a zö ni agbi kue nga na mênë kue ti ambeni nyama so a yâa na sandaga. Me ti gbalaka so a sara na cuivre so, mbi yeke fa ye so a yeke sara ande na ni.” 16  Prêtre Urie asara ye kue so Gbia Achaz amû yanga na lo ti sara.+ 17  Gbia Achaz akungbi yâ ti acuivre so ayeke plat plat, so ayeke na popo ti acadre ti achariot,+ nga lo zi akota sembe so ayeke na yâ ni.+ Lo zi nga kota tawa so ayeke na ndö ti abagara so a sara ala na cuivre,+ lo zia ni na mbeni ndo so a sara sese ni na tênë.+ 18  Nga kpangba so a leke ni na da ti Jéhovah ndali ti lâ ti sabbat na porte so a leke ni ti tene gbia ahon dä ti lï na yâ ti temple so, gbia achangé place ni. Lo sara tongaso ndali ti gbia ti Assyrie. 19  Âdu ti tanga ti mbaï ti Achaz, tënë ti aye so lo sara, a sû ni na yâ ti mbeti ti mbaï ti agbia ti Juda.+ 20  Achaz akui, na lo wu terê ti lo tongana ti akotara ti lo. A lu lo na cimetière ti akotara ti lo na Gbata ti David. Molenge ti lo Ézéchias*+ aga gbia na peko ti lo.

Kete tënë

Na Hébreu: “Lo sara si molenge ti lo ahon na yâ ti wâ.”
Wala “azo ti Juda.”
Wala “yangbo.”
Ndani aye ti tene “Jéhovah amû ngangu na zo.”