Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 15:1-38

LI TI ATËNË NI

  • Azariah aga gbia ti Juda (1-7)

  • Andangba gbia ti Israël: Zacharie (8-12), Shallum (13-16), Ménahem (17-22), Pécaïah (23-26), Pécah (27-31)

  • Jotham aga gbia ti Juda (32-38)

15  Na ngu 27 ni ti komandema ti Jéroboam* gbia ti Israël, Azariah*+ molenge ti Amasiah+ so ayeke lani gbia ti Juda aga gbia.+  Lo yeke na ngu 16 na ngoi so lo ga gbia, na lo komande na Jérusalem ngu 52. Iri ti mama ti lo ayeke Jécoliah, zo ti Jérusalem.  Lo ngbâ ti sara ye so ayeke na lege ni na lê ti Jéhovah, tâ gï tongana ti so babâ ti lo Amasiah asara lani.+  Ye oko, ando so ayeke na nduzu angbâ,+ na azo angbâ ti mû asandaga nga ti zö asandaga na ando ni so.+  Jéhovah asara si gbia aga zo ti buruma,+ na kobela ni angbâ na terê ti lo juska na kuâ ti lo. Lo lango ti lo na yâ ti mbeni da nde;+ na ngoi ni so, Jotham,+ molenge ti gbia, la ayeke bâ lege ti da* ti gbia nga lo la lo yeke fâ ngbanga ti azo ti kodro ni.+  Âdu ti tanga ti mbaï ti Azariah,+ tënë ti aye kue so lo sara, a sû ni na yâ ti mbeti ti mbaï ti agbia ti Juda.  Azariah akui, na lo wu terê ti lo tongana ti akotara ti lo.+ A lu lo na terê ti akotara ti lo na Gbata ti David. Molenge ti lo Jotham aga gbia na peko ti lo.  Na ngu 38 ni ti komandema ti Azariah,+ gbia ti Juda, Zacharie+ molenge ti Jéroboam aga gbia na Samarie na ndö ti azo ti Israël. Lo komande nze omene.  Lo sara ye so ayeke sioni na lê ti Jéhovah, tâ gï tongana ti so akotara ti lo asara. Siokpari kue so Jéroboam molenge ti Nébat apusu azo ti Israël ti sara, lo zia lege ni pëpe.+ 10  Mbeni lâ, Shallum, molenge ti Jabesh, amä terê na ambeni zo ti fâ lo, na ala fâ lo+ na gbata ti Ibléam.+ Na pekoni, Shallum aga gbia na place ti lo. 11  Âdu ti tanga ti mbaï ti Zacharie, a sû ni na yâ ti mbeti ti mbaï ti agbia ti Israël. 12  A si tongaso ti tene tënë so Jéhovah atene si Jéhu afa peko ni aga tâ tënë. Lo tene: “Ahale ti mo+ ayeke duti na ndö ti trône ti Israël juska asi na molongo osio ni.”+ A yeke ye so asi. 13  Shallum, molenge ti Jabesh, aga gbia na yâ ti ngu 39 ni ti komandema ti Ozias+ gbia ti Juda. Lo komande na Samarie nze oko. 14  Ménahem molenge ti Gadi alondo na Tirzah+ lo ga na Samarie, na lo fâ Shallum+ molenge ti Jabesh na Samarie. Na peko ti so lo fâ lo, lo ga gbia na place ti lo. 15  Âdu ti tanga ti mbaï ti Shallum, tënë ti ye ti sioni so lo na ambeni zo amä terê si ala sara, a sû ni na yâ ti mbeti ti mbaï ti agbia ti Israël. 16  A yeke na ngoi ni so la si Ménahem alondo na Tirzah lo ga. Lo fâ azo kue ti Tiphsah nga na akete kodro ni, ndali ti so a ke ti zi yanga ti gbagba ni na lo. Lo fâ azo ti yâ ni nga lo suru yâ ti awali so ayeke na ngo. 17  Na ngu 39 ni ti komandema ti Azariah gbia ti Juda, Ménahem molenge ti Gadi aga gbia na ndö ti azo ti Israël. Lo komande na Samarie ngu 10. 18  Lo ngbâ ti sara ye so ayeke sioni na lê ti Jéhovah. Siokpari kue so Jéroboam molenge ti Nébat apusu azo ti Israël ti sara,+ lo zia lege ni pëpe na ngoi ti komandema ti lo kue. 19  Pul,+ gbia ti Assyrie, aga alï na ngangu na yâ ti kodro ti Israël ti sara bira. Ménahem amû na lo talent* ti argent 1 000 ndali ti maboko so lo mû lani na Ménahem si komandema ti lo aluti nzoni na ndö ti royaume ni.+ 20  Ti wara argent na maboko ti azo ti Israël, Ménahem ahunda ni na ngangu na maboko ti akota zo nga na azo ti mosoro.+ Lo mû sicle* ti argent 50 ndali ti zo oko oko na gbia ti Assyrie. Na pekoni, gbia ti Assyrie azia kodro ni lo kiri na ndo ti lo. 21  Âdu ti tanga ti mbaï ti Ménahem,+ tënë ti aye kue so lo sara, a sû ni na yâ ti mbeti ti mbaï ti agbia ti Israël. 22  Ménahem akui, na lo wu terê ti lo tongana ti akotara ti lo. Molenge ti lo Pécaïah aga gbia na peko ti lo. 23  Na ngu 50 ni ti komandema ti Azariah gbia ti Juda, Pécaïah molenge ti Ménahem aga gbia na Samarie na ndö ti azo ti Israël. Lo komande ngu use. 24  Lo ngbâ ti sara ye so ayeke sioni na lê ti Jéhovah. Siokpari kue so Jéroboam molenge ti Nébat apusu azo ti Israël ti sara, lo zia lege ni pëpe.+ 25  Mbeni lâ, Pécah,+ molenge ti Rémaliah, turugu so ayeke lakue na terê ti Pécaïah, amä terê na azo ti fâ lo, na lo fâ lo na Samarie na yâ ti ngangu tour ti da* ti gbia, lo na Argob nga na Ariéh. Pécah ayeke na azo 50 ti gbata ti Galaad na terê ti lo. Na peko ti so lo fâ Pécaïah, lo ga gbia na place ti lo. 26  Âdu ti tanga ti mbaï ti Pécaïah, tënë ti aye kue so lo sara, a sû ni na yâ ti mbeti ti mbaï ti agbia ti Israël. 27  Na ngu 52 ni ti komandema ti Azariah gbia ti Juda, Pécah+ molenge ti Rémaliah aga gbia na Samarie na ndö ti azo ti Israël. Lo komande ngu 20. 28  Lo ngbâ ti sara ye so ayeke sioni na lê ti Jéhovah. Siokpari kue so Jéroboam molenge ti Nébat apusu azo ti Israël ti sara, lo zia lege ni pëpe.+ 29  Na ngoi ti komandema ti Pécah gbia ti Israël, Tiglath-Piléser+ gbia ti Assyrie alï na yâ ti kodro ni na ngangu, lo mû ando tongana Ijon, Abel-Beth-Maacah,+ Janoah, Kédesh,+ Hazor, sese ti Galaad+ nga na Galilée, sese ti Nephtali+ kue. Lo gbu azo na ngangu lo gue na ala na kodro ti Assyrie.+ 30  Mbeni lâ, Osée+ molenge ti Élah amä terê na azo ti fâ Pécah, molenge ti Rémaliah, na lo fâ lo. Lo ga gbia na place ti lo na yâ ti ngu 20 ni ti komandema ti Jotham,+ molenge ti Ozias. 31  Âdu ti tanga ti mbaï ti Pécah, tënë ti aye kue so lo sara, a sû ni na yâ ti mbeti ti mbaï ti agbia ti Israël. 32  Na yâ ti use ngu ti komandema ti Pécah molenge ti Rémaliah gbia ti Israël, Jotham,+ molenge ti Ozias+ so ayeke lani gbia ti Juda, aga gbia. 33  Lo yeke na ngu 25 na ngoi so lo ga gbia, na lo komande na Jérusalem ngu 16. Iri ti mama ti lo ayeke Jérusha, molenge ti Zadoc.+ 34  Lo ngbâ ti sara ye so ayeke na lege ni na lê ti Jéhovah, tâ gï tongana ti so babâ ti lo Ozias asara lani.+ 35  Ye oko, ando so ayeke na nduzu angbâ, na azo angbâ ti mû asandaga nga ti zö asandaga na ando ni so.+ Lo la lo leke yanga ti gbagba ti da ti Jéhovah so ayeke na mbage ti nduzu.+ 36  Âdu ti tanga ti mbaï ti Jotham, tënë ti aye so lo sara, a sû ni na yâ ti mbeti ti mbaï ti agbia ti Juda. 37  Na yâ ti ngoi ni so, Jéhovah akomanse ti tokua Retsin, gbia ti Syrie, nga na Pécah,+ molenge ti Rémaliah, ti ga ti sara bira na azo ti Juda.+ 38  Jotham akui, na lo wu terê ti lo tongana ti akotara ti lo. A lu lo na terê ti akotara ti lo na Gbata ti David, kotara ti lo. Molenge ti lo Achaz aga gbia na peko ti lo.

Kete tënë

So ti tene Jéroboam II.
Ndani aye ti tene “Jéhovah amû maboko.” Na 2aG 15:13; 2Ch 26:1-23; És 6:1 nga na Zac 14:5, a iri lo Ozias.
Wala “yangbo.”
Talent oko ane kilo 34,2. Bâ na B14.
Sicle oko ane gramme 11,4. Bâ na B14.
Wala “yangbo.”