Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 aGbia 14:1-29

LI TI ATËNË NI

  • Amasiah aga gbia ti Juda (1-6)

  • Lo sara bira na Édom nga na Israël (7-14)

  • Tënë ti kuâ ti Joas, gbia ti Israël (15, 16)

  • Tënë ti kuâ ti Amasiah (17-22)

  • Jéroboam II aga gbia ti Israël (23-29)

14  Na yâ ti use ngu ti komandema ti Joas+ molenge ti Joachaz gbia ti Israël, Amasiah, molenge ti Joas gbia ti Juda, aga gbia.  Lo yeke na ngu 25 na ngoi so lo ga gbia, na lo komande na Jérusalem ngu 29. Iri ti mama ti lo ayeke Jéhoaddin, zo ti Jérusalem.+  Amasiah angbâ ti sara ye so ayeke na lege ni na lê ti Jéhovah, me tongana ti kotara ti lo David pëpe.+ Lo sara ye kue tongana ti so babâ ti lo Joas asara.+  Me ando so ayeke na nduzu angbâ,+ na azo angbâ ti mû asandaga nga ti zö asandaga na ando ni so.+  Gï so lo bâ so royaume ti lo aluti nzoni awe, lo fâ awakua ti lo so afâ lani babâ ti lo so ayeke gbia.+  Me lo fâ pëpe amolenge ti azo so afâ babâ ti lo ni, a lingbi na commandement ti Jéhovah so ayeke na yâ ti Ndia so Moïse asû na mbeti, atene: “A lingbi ababâ awara kuâ pëpe ndali ti ye so amolenge ti ala asara, nga a lingbi amolenge awara kuâ pëpe ndali ti ye so ababâ ti ala asara. Zo oko oko ayeke wara kuâ ndali ti siokpari ti lo wani.”+  Lo fâ azo ti Édom+ 10 000 na yâ ti Popo-hoto ti Ingo,+ lo mû gbata ti Séla na yâ ti bira,+ na iri ti gbata ni aga Jocthéel juska laso.  Na pekoni, Amasiah atokua azo na Joas, molenge ti Joachaz molenge ti Jéhu, so ayeke lani gbia ti Israël, lo tene: “Ga e sara bira na popo ti e.”*+  Joas gbia ti Israël atokua azo na Amasiah gbia ti Juda, lo tene: “Keke ti sisi so ayeke na kodro ti Liban atokua ndo na keke ti cèdre so ayeke na kodro ti Liban, lo tene: ‘Mû molenge ti mo ti wali na molenge ti mbi, ti ga wali ti lo.’ Me mbeni sioni nyama ti Liban ahon na terê ti keke ti sisi ni na lo dö yâ ni. 10  So mo sö benda na ndö ti azo ti Édom,+ baba alï mo. Gonda terê ti mo, me ngbâ na yâ ti da* ti mo. Ngbanga ti nyen mo yeke gi ye ti ngangu na ndö ti mo si mo na azo ti Juda kue atï?” 11  Me Amasiah ake ti mä tënë so.+ Tongaso, Joas gbia ti Israël ague, na lo na Amasiah gbia ti Juda asara bira na popo ti ala na gbata ti Beth-Shémesh,+ so ayeke na sese ti Juda.+ 12  Azo ti Israël asö benda na ndö ti azo ti Juda, tongaso zo oko oko akpe akiri na yanga-da* ti lo. 13  Joas gbia ti Israël agbu Amasiah gbia ti Juda, molenge ti Joas so ayeke molenge ti Achaziah, na gbata ti Beth-Shémesh. Na pekoni ala gue na Jérusalem, lo kungbi mbage ti gbagba ti Jérusalem ni ayo coudée 400,* a londo na yanga ti gbagba ni so a iri ni Yanga-ti-gbagba-ti-Éphraïm+ a si na ti so a iri ni Yanga-ti-gbagba-ti-Coin.+ 14  Lo mû lor na argent kue, akungba kue so ayeke na yâ ti da ti Jéhovah nga na ati so ayeke na yâ ti ando ti batango amosoro ti da* ti gbia. Lo gbu nga ambeni zo na ngangu ti tene a futa mbeni ye na lo awe si lo zi ala. Na pekoni lo kiri na Samarie. 15  Âdu ti tanga ti mbaï ti Joas, tënë ti aye so lo sara, angangu ye so lo sara nga na abira so lo sara na Amasiah gbia ti Juda, a sû ni na yâ ti mbeti ti mbaï ti agbia ti Israël. 16  Joas akui, na lo wu terê ti lo tongana ti akotara ti lo. A lu lo na Samarie+ na terê ti agbia ti Israël. Molenge ti lo Jéroboam*+ aga gbia na peko ti lo. 17  Amasiah,+ molenge ti Joas so ayeke lani gbia ti Juda, angbâ na fini ngu 15 na peko ti kuâ ti Joas,+ molenge ti Joachaz so ayeke lani gbia ti Israël.+ 18  Âdu ti tanga ti mbaï ti Amasiah, a sû ni na yâ ti mbeti ti mbaï ti agbia ti Juda. 19  A si na mbeni ngoi, ambeni zo amä terê ti fâ lo+ na Jérusalem, na lo kpe lo gue na gbata ti Lakish. Me ala tokua azo na peko ti lo na Lakish, na azo ni afâ lo kâ. 20  Ala mû kuâ ti lo na ndö ti mbarata ala kiri na ni, na a lu lo na Jérusalem, na terê ti akotara ti lo na Gbata ti David.+ 21  Na pekoni, azo ti Juda kue amû Azariah*+ so ayeke na ngu 16,+ ala zia lo gbia na peko ti babâ ti lo Amasiah.+ 22  Na peko ti so gbia* akui, si lo wu terê ti lo tongana ti akotara ti lo,+ Azariah akiri aleke peko ti gbata ti Élath+ si akiri aga mbage ti sese ti Juda. 23  Na ngu 15 ni ti komandema ti Amasiah molenge ti Joas so ayeke lani gbia ti Juda, Jéroboam,+ molenge ti Joas so ayeke lani gbia ti Israël, aga gbia na Samarie. Lo komande ngu 41. 24  Lo ngbâ ti sara ye so ayeke sioni na lê ti Jéhovah. Siokpari kue so Jéroboam molenge ti Nébat apusu azo ti Israël ti sara, lo zia lege ni pëpe.+ 25  Lo kiri lo leke peko ti katikati ti kodro ti Israël, a londo na Lebo-Hamath*+ juska na Ngu-ingo ti Arabah,*+ a lingbi na tënë ti Jéhovah Nzapa ti Israël so wakua ti lo prophète Jonas,+ molenge ti Amittaï so ayeke zo ti gbata ti Gath-Hépher,+ atene. 26  Jéhovah abâ ye ti vundu so asi na azo ti Israël.+ Mbeni zo so angbâ ti mû maboko na azo ti Israël ayeke dä pëpe, même azo ti mawa. 27  Me Jéhovah amû zendo so a yeke zi iri ti azo ti Israël na ndö ti sese pëpe.+ Tongaso lo mû Jéroboam molenge ti Joas ti sö ala.+ 28  Âdu ti tanga ti mbaï ti Jéroboam, tënë ti aye kue so lo sara, angangu ye so lo sara, lege so lo sara bira nga lege so lo sara si gbata ti Damas+ na ti Hamath+ akiri na gbe ti Juda na sese ti Israël, a sû ni na yâ ti mbeti ti mbaï ti agbia ti Israël. 29  Jéroboam akui, na lo wu terê ti lo tongana ti akotara ti lo, agbia ti Israël. Molenge ti lo Zacharie+ aga gbia na peko ti lo.

Kete tënë

Wala “e bâ terê lê na lê.”
Wala “yangbo.”
Na Hébreu: “tente.”
Mètre 178 tongaso. Bâ na B14.
Wala “yangbo.”
So ti tene Jéroboam II.
Ndani aye ti tene “Jéhovah amû maboko.” Na 2aG 15:13; 2Ch 26:1-23; És 6:1 nga na Zac 14:5, a iri lo Ozias.
So ti tene babâ ti lo Amasiah.
Wala “na lege ti lingo na Hamath.”
So ti tene Mer Morte.