Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 9:1-27

LI TI ATËNË NI

  • Samuel awara terê na Saül (1-27)

9  Mbeni zo ti mara ti Benjamin ayeke dä, iri ti lo ayeke Kish.+ Lo yeke molenge ti Abiel, molenge ti Zéror, molenge ti Bécorath, molenge ti Aphiah, zo ti mara ti Benjamin;+ lo yeke na mosoro mingi.  Kish ayeke na mbeni molenge ti koli so iri ti lo ayeke Saül,+ lo de maseka nga lo yeke pendere mingi. Na popo ti azo ti Israël kue, mbeni koli so ayeke pendere tongana lo ayeke dä pëpe. Lo yo lo hon tanga ti azo kue.*  Mbeni lâ, akororo* ti Kish, babâ ti Saül, agirisa. Tongaso, Kish atene na molenge ti lo Saül, atene: “Pardon, mû mbeni zo ti kua oko, mo gue mo gi akororo ni.”  Tongaso, lo hon na yâ ti ando so ahoto ayeke dä na Éphraïm nga na yâ ti sese ti Shalishah, me ala wara akororo ni pëpe. Ala hon na yâ ti sese ti Shaalim, me akororo ni ayeke kâ pëpe. Lo tambela na yâ ti sese ti mara ti Benjamin kue, me ala wara akororo ni pëpe.  Ala si na kodro ti Zuph, na Saül atene na zo ti kua ni, atene: “Ga e kiri, tongaso pëpe babâ ti mbi ayeke gi bê ti lo mingi na ndö ti e ahon ti gi bê ti lo na ndö ti akororo ni.”+  Me zo ti kua ni atene: “Mbeni zo ti Nzapa ayeke na yâ ti gbata so, so azo ane lo mingi. Ye kue so lo tene ayeke si biani.+ E gue kâ. Peut-être lo yeke fa na e lege ti mungo ni.”  Saül atene na zo ti kua ti lo ni: “Tongana e gue, nyen la e yeke mû na koli so nyen? E yeke na mapa na yâ ti abozo ti e pëpe; mbeni ye ti mungo na matabisi na zo ti Nzapa so ayeke dä pëpe. Nyen la e yeke na ni nyen?”  Zo ti kua ni atene na Saül: “Mbi yeke na quart ti sicle* ti argent na maboko ti mbi. Mbi yeke mû ni na zo ti Nzapa so, na lo yeke fa na e lege ti mungo ni.”  (Ândö na Israël, zo so aye ti hunda Nzapa ayeke tene ka, atene: “Ga e gue e bâ zo ti bango ye”,+ ndali ti so zo so laso a yeke iri lo prophète so, ândö a yeke iri lo zo ti bango ye.) 10  Tongaso, Saül atene na zo ti kua ti lo ni, lo tene: “Nzoni. E gue.” Ala gue na gbata so zo ti tâ Nzapa ayeke dä. 11  Tongana ala yeke monté hoto ti si na gbata ni, ala tingbi na amaseka-wali so asigi ti gue ti tö ngu. Ala hunda ala, atene: “Zo ti bango ye+ ayeke na ndo so?” 12  Amaseka ni atene: “En, lo yeke dä. Lo yeke ge na devant ti ala. Ala gue hio; laso, lo ga na yâ ti gbata ni ndali ti so azo ayeke mû sandaga+ na Nzapa na ndo so ayeke na nduzu.+ 13  Gï na lingo ti ala na yâ ti gbata ni, ala yeke wara lo kozo si lo gue na ndo so ayeke na nduzu ti te ye. Azo ni ayeke te ye pëpe juska lo ga si, ndali ti so lo la lo yeke iri tufa na ndö ti sandaga ni. Tongana lo iri tufa na ndö ni awe si azo so a tisa ala ayeke te ye. Ala gue hio, ala yeke wara lo.” 14  Tongaso, ala mû lege ti gue na gbata ni. Na ngoi so ala si na yâ ti gbata ni, mo ye ti bâ, Samuel, so ayeke gue na ndo so ayeke na nduzu, atingbi na ala. 15  Lango oko kozo si Saül asi, Jéhovah atene na* Samuel: 16  “Kekereke na l’heure tongaso, mbi yeke tokua mbeni koli ti kodro ti Benjamin na mo.+ Mo tuku mafuta na li ti lo si lo ga zo so akomande azo ti mbi Israël;+ lo yeke sö azo ti mbi na maboko ti aPhilistin. Mbi bâ pasi ti azo ti mbi, na dema ti ala aga juska asi na mbi.”+ 17  Na ngoi so Samuel abâ Saül, Jéhovah atene na Samuel: “Bâ zo so mbi sara tënë ti lo na mo so la, so mbi tene: ‘Lo la lo yeke komande azo ti mbi.’”*+ 18  Saül ague na terê ti Samuel na yanga ti gbagba ti gbata ni, lo hunda lo, lo tene: “Pardon, da ti zo ti bango ye ayeke na ndo wa?” 19  Samuel atene na Saül: “Mbi zo ti bango ye ni la. Mû devant, mo gue na ndo so ayeke na nduzu, na mbi na mo e yeke te ye laso.+ A si na ndapre awe, mbi yeke zia mo, mo hon, nga mbi yeke fa na mo ye kue so mo ye ti hinga.* 20  Âdu ti akororo so agirisa a sara lango ota awe so,+ mo gi bê ti mo pëpe, a wara ala awe. Anzoni ye kue so ayeke na Israël ayeke ti zo wa? A yeke ti mo na ti azo kue ti da ti babâ ti mo ape?”+ 21  Me Saül akiri tënë, atene: “Mbi yeke zo ti mara ti Benjamin, mara so ayeke kete ahon tanga ti amara kue na Israël,+ nga na popo ti asewa ti mara ti Benjamin, fami ti mbi la ayeke tâ kete mingi. Mo tene tënë tongaso na mbi ngbanga ti nyen?” 22  Samuel amû Saül nga na zo ti kua ti lo, lo gue na ala na yâ ti da ti tengo ye, lo zia ala na ndo ti duti so ayeke nzoni ahon ti tanga ti azo kue so a tisa ala; li ti azo ni kue ayeke 30 tongaso. 23  Samuel atene na zo ti tongo kobe ni, atene: “Nyama so mbi mû na mo si mbi tene: ‘Mo zia ni nde so’, ga na ni.” 24  Zo ti tongo kobe ni amû gere ti nyama ni, lo zia ni na gbe ti Saül. Samuel atene na Saül: “Ye so a bata ni la a zia na gbe ti mo so. Te ni, ndali ti so azo ni abata ni ndali ti mo laso. Mbi tene na ala, mbi tene, ‘Mbi yeke na agene.’” Tongaso, Saül na Samuel ate ye na lango ni so. 25  Na pekoni, ala londo na ndo so ayeke na nduzu,+ ala gue na yâ ti gbata ni, na Samuel angbâ ti sara lisoro na Saül na li ti da. 26  Ala londo hio na ndapre; na ngoi so ndo ayeke gue ti han. Samuel airi Saül na li ti da ni, lo tene: “Leke terê ti mo ti tene mbi zia mo, mo gue.” Saül aleke terê ti lo, lo na Samuel kue asigi. 27  Na ngoi so ala yeke descend ti gue na yanga ti gbata ni, Samuel atene na Saül: “Tene na zo ti kua ni+ ti hon ti lo kozo. Me mo, mo luti si mbi tene na mo tënë so Nzapa atene.” Tongaso, zo ti kua ni ahon ti lo.

Kete tënë

Na Hébreu: “Ti londo na ndö ti go ti lo ti monté na li ti lo, lo yo lo hon tanga ti azo kue.”
Na Hébreu: “amama ti kororo.”
Sicle oko ane gramme 11,4. Bâ na B14.
Na Hébreu: “azi mê ti.”
Wala “sara si azo ti mbi ayeke ngbâ ndo oko.”
Na Hébreu: “ye kue so ayeke na bê ti mo.”