Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 4:1-22

LI TI ATËNË NI

  • A-Philistin ahon na Sanduku ti mbele ti Jéhovah (1-11)

  • Tënë ti kuâ ti Éli na amolenge ti lo (12-22)

4  Tënë so Samuel ayeke fa amû yâ ti kodro ti Israël kue. Mbeni lâ, azo ti Israël ague ti sara bira na aPhilistin; ala sara camp nduru na Ében-Ézer, na aPhilistin asara ti ala camp na Aphek.  A-Philistin aleke terê ti ala, ala gue ti sara bira na azo ti Israël; bira ni atambela nzoni na azo ti Israël pëpe. Ala tï na gbele aPhilistin; aPhilistin afâ akoli 4 000 tongaso na place so bira ni akporo dä.  Tongana aturugu ni akiri na yâ ti camp awe, a-ancien ti Israël ahunda ndo, atene: “Nyen la si Jéhovah azia aPhilistin asö benda na ndö ti e laso?*+ Zia e mû sanduku ti mbele ti Jéhovah na Shilo,+ e ga na ni na terê ti e, tongaso si a duti na terê ti e nga a sö e na yâ ti maboko ti awato ti e.”  Tongaso, ala tokua ambeni koli na Shilo, ala mû sanduku ti mbele so ayeke kâ ala ga na ni, sanduku ti Jéhovah ti aturugu, lo so aduti na ndö ti* achérubin.+ Amolenge ti Éli use, Hophni na Phinéhas,+ ayeke nga na terê ti sanduku ti mbele ti tâ Nzapa.  Gï so sanduku ti mbele ti Jéhovah asi na yâ ti camp ni, azo ti Israël kue adekongo ngangu juska sese ayengi.  Tongana aPhilistin amä dekongo ni, ala hunda ndo, ala tene: “Nyen la si aHébreu adekongo ngangu na yâ ti camp ti ala kâ tongaso so?” Na pekoni, ala mä so a ga na Sanduku ti Jéhovah na yâ ti camp ni.  Mbeto agbu aPhilistin, si ala tene: “Nzapa aga na yâ ti camp ni.”+ Ala kiri atene: “Mawa na e, ndali ti so mara ti ye so ade ti si lâ oko ape!  Mawa na e! Zo wa la ayeke sö e na yâ ti maboko ti kota Nzapa so zo wa? A yeke Nzapa so la apika lani kodro ti Égypte na mara ti aye nde nde so afâ gbâ ti azo na yâ ti benyama.+  A-Philistin, ala sara mbeto pëpe nga ala sara ye tongana koli, si ala sara kua na aHébreu pëpe tongana ti so aHébreu asara kua na ala.+ Ala sara ye tongana koli, ala tiri!” 10  Tongaso, aPhilistin atiri na ala sö benda na ndö ti azo ti Israël;+ zo oko oko akpe akiri na tente ti lo. Wungo ti azo ti Israël so a fâ ala ayeke mingi; aturugu 30 000 so ayeke tambela na gere la akui. 11  Na ndö ni, a mû Sanduku ti Nzapa, nga amolenge ti Éli use kue, Hophni na Phinéhas, akui.+ 12  Na lango ni so, mbeni koli ti mara ti Benjamin alondo na place ti bira ni, lo kpe lo si na Shilo; bongo ti lo asuru nga sese ayeke na yâ ti li ti lo.+ 13  Na ngoi so koli ni asi, Éli ayeke duti na ndö ti mbeni ye na terê ti lege, lo yeke bâ ndo, ndali ti so bê ti lo agi lo mingi ngbanga ti Sanduku ti tâ Nzapa.+ Koli so alï na yâ ti gbata ni, lo fa peko ti ye so asi, na azo ti gbata ni kue atï na toto ngangu. 14  Tongana Éli amä toto ni, lo hunda ndo, lo tene: “Nda ti wuluwulu so gï nyen?” Oko koli so aga hio na terê ti Éli, lo fa na lo peko ti ye so asi. 15  (Éli ayeke na ngu 98, lê ti lo avuko si lo bâ ndo gï tongaso.)+ 16  Lo tene na Éli: “Mbi londo na place ti bira ni la mbi ga so. Gï laso la mbi kpe mbi ga so.” Éli ahunda lo, atene: “Molenge ti mbi, nyen la apassé nyen?” 17  Koli ni so aga na sango ni so atene: “Azo ti Israël akpe na gbele aPhilistin, a fâ gbâ ti azo.+ Amolenge ti mo use, Hophni na Phinéhas, akui+ nga aPhilistin amû Sanduku ti tâ Nzapa.”+ 18  Gï so koli ni asara tënë ti Sanduku ti tâ Nzapa, Éli alondo na ndö ti ye so lo duti dä, lo tï na mbage ti peko na terê ti yanga ti gbagba ti gbata ni; go ti lo akungbi na lo kui, ndali ti so lo ga mbakoro nga lo ne mingi. Lo duti juge na Israël ngu 40. 19  Kogara ti lo, wali ti Phinéhas, ayeke na ngo nga lo ga nduru ti dü awe. Tongana lo mä so a mû Sanduku ti tâ Nzapa nga so kogara ti lo na koli ti lo akui, gï hio tongaso yâ ti lo ason lo ngangu, si lo ba na sese na lo dü. 20  Tongana lo ga nduru ti kui, awali so ayeke luti na terê ti lo atene na lo: “Sara mbeto pëpe, bâ, mo dü koli.” Lo kiri tënë na ala pëpe na lo zia bê ti lo dä pëpe. 21  Me lo zia iri ti molenge ni Icabod,*+ na lo tene: “Gloire azia Israël ahon na mbeni ndo nde awe,”+ ti fa tënë ti Sanduku ti tâ Nzapa nga ti ye so asi na kogara ti lo nga na koli ti lo.+ 22  Lo tene: “Gloire azia Israël ahon na mbeni ndo nde awe, ndali ti so a mû Sanduku ti tâ Nzapa a hon na ni awe.”+

Kete tënë

Na Hébreu: “Jéhovah asö benda na ndö ti e ngbanga ti nyen?”
A lingbi nga ti tene “na popo ti.”
Ndani aye ti tene “Gloire ni ague na ndo wa?”