Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 30:1-31

LI TI ATËNË NI

  • Azo ti Amalec aga agbi gbata ti Ziclag (1-6)

    • Nzapa akpengba David (6)

  • David akinda azo ti Amalec (7-31)

    • David akiri amû azo ti lo so a gbu ala a hon na ni (18, 19)

    • Ndia so David alu na ndö ti tënë ti ye so a gbu na bira (23, 24)

30  Tongana David na azo ti lo akiri na gbata ti Ziclag+ na ota lango ni, andâ azo ti mara ti Amalec+ aga na bira kozo awe na azo so ayeke na mbage ti sud* nga na Ziclag ni; ala sara bira na Ziclag na ala gbi ni.  Ala gbu awali+ na azo kue so ayeke na yâ ti gbata ni, ala hon na ala; a londo na akete molenge juska na akota zo. Ala fâ zo oko pëpe, me ala mû azo ni kue ahon na ala.  Na ngoi so David na azo ti lo asi na gbata ni, ala bâ so a gbi ni awe, nga a gbu awali ti ala nga na amolenge ti ala ti koli na ti wali ahon na ala.  Tongaso, David na azo ti lo atï na kota toto, ala toto ngbii ngangu ti ala ahunzi.  A gbu nga awali ti David use kue, Ahinoam, zo ti Jizréel, nga na Abigaïl, wali ti wakuâ Nabal, zo ti Carmel, ahon na ala.+  Vundu ahon ndö ti David, ndali ti so azo ni asara tënë ti bongo lo na tênë. Bê ti azo ni kue* ason ngangu ndali ti amolenge ti ala ti koli na ti wali so ayeke dä pëpe. Me David atourné na mbage ti Jéhovah Nzapa ti lo ti tene lo mû na lo ngangu.+  David atene na prêtre Abiathar,+ molenge ti Ahimélec: “Pardon, ga na éphod ni ge.”+ Tongaso, Abiathar aga na éphod ni na David.  David ahunda Jéhovah, atene:+ “A yeke nzoni mbi gue na peko ti azo ti gbungo aye ti azo na ngangu so? Mbi yeke wara ala ande?” Lo kiri tënë na David, lo tene: “Gue na peko ti ala, ndali ti so mo yeke wara ande ala, na mo yeke zi azo ni kue na tïtî ala.”+  Hio, David na azo ti lo 600 alondo,+ ala gue juska na Ngu* ti Bésor; ambeni zo ni angbâ ti ala na ndo ni so. 10  David na azo 400 angbâ ti tomba peko ti azo ni, me azo 200 so ayeke na ngangu pëpe ti fâ Ngu* ti Bésor angbâ ti ala ge.+ 11  Azo ti David awara mbeni zo ti Égypte na yâ ti ngonda na ala ga na lo na David. Ala mû na lo kobe lo te nga ala mû na lo ngu lo nyon. 12  Ala mû nga na lo ahulengo lê ti figue so a pete ni boule boule nga na raisin so a pete ni boule boule. Tongana lo te ye awe, lo wara ngangu* ndali ti so a sara lango ota la lo te ye pëpe nga lo nyon ngu pëpe. 13  David ahunda lo, atene: “Wa ti mo ayeke zo wa? Mo londo na ndo wa?” Lo tene: “Mbi yeke zo ti Égypte, me mbi yeke ngbâa ti mbeni zo ti mara ti Amalec. Wa ti mbi azia mbi ndali ti so a sara lango ota la terê ti mbi ayeke son so. 14  E gue e sara bira na mbage ti sud* ti kodro ti azo ti Kérét,+ e sara bira na sese ti Juda nga e sara bira na mbage ti sud* ti kodro ti azo ti Caleb.+ Me Ziclag, e gbi ni.” 15  Na mango tënë so, David ahunda lo, atene: “Mo peut ti gue na mbi na ndo so azo ti gbungo aye ti azo na ngangu so ayeke dä?” Lo kiri tënë, lo tene: “Tongana mo deba yanga ti mo na iri ti Nzapa so mo yeke fâ mbi pëpe nga mo yeke zia mbi na maboko ti wa ti mbi pëpe, mbi yeke gue na mo juska kâ.” 16  Lo gue na David na ndo so azo ni ayeke dä; ala duti ala mû ndo ni kue. Ala yeke te ye, ala yeke nyon ye nga ala yeke sara matanga ndali ti gbâ ti aye kue so ala gbu na kodro ti aPhilistin nga na sese ti Juda. 17  David afâ ala, a komanse na ndapre, na ngoi so ndo angbâ ti vuko juska na ndade ni na lakui. Zo oko akpe pëpe,+ gï azo 400 so amonté na ndö ti achameau si akpe so. 18  David awara aye kue so azo ti mara ti Amalec amû,+ nga lo zi awali ti lo use kue. 19  Ye oko amanke pëpe nga zo oko amanke pëpe, ti londo na molenge ti si na kota zo. Ala zi amolenge ti ala ti koli na ti wali nga na aye kue so a gbu ni.+ David awara aye kue so azo ni amû ni. 20  David amû angasa na ataba nga na abagara ni kue. Azo ti lo azia anyama ni na devant ti anyama ti ala, na ala tene: “A yeke aye so David agbu na bira la.” 21  David akiri lo wara azo ti lo 200 so ayeke na ngangu pëpe ti gue na lo na so angbâ na terê ti Ngu* ti Bésor.+ Ala mû devant ti David na azo so lo na ala ayeke ga. Tongana David asi nduru na ala, lo hunda ala ti hinga wala ala yeke senge. 22  Me asioni zo kue so li ti ala ayeke nga dä pëpe so, si ayeke na popo ti ala so ague na David, atene: “So ala gue na e pëpe so, aye ni so e mû si e kiri na ni so, e yeke mû na ala pëpe. Zo oko oko ayeke wara gï wali ti lo na amolenge ti lo, na lo kiri.” 23  Me David atene: “Aita ti mbi, a lingbi ala sara ye tongaso pëpe na aye so Jéhovah amû na e so. Lo bata e nga lo zia na maboko ti e azo ti gbungo aye ti e na ngangu so.+ 24  Zo wa la ayeke yeda na tënë so ala tene so? Ye so a mû na zo so ague na bira ayeke duti oko na ye so a mû na lo so angbâ na terê ti akungba.+ Azo kue ayeke wara ye.”+ 25  A komanse na lango ni so ti ga na ni, yanga so David amû so aga mbeni ndia ndali ti azo ti Israël. 26  Na ngoi so David asi na Ziclag, lo tokua ambeni ye so lo gbu na bira na a-ancien ti Juda so ayeke akamarade ti lo. Lo tene: “Aye so e gbu na bira na maboko ti awato ti Jéhovah so, ti ala matabisi* ni la.” 27  Lo tokua ni na ala so ayeke na Béthel,+ ala ti Ramoth ti sese ti Négueb,* ala ti Jattir,+ 28  ala ti Aroër, ala ti Siphmoth, ala ti Eshtémoa,+ 29  ala ti Racal, ala ti agbata ti azo ti Jérahméel,+ ala ti agbata ti azo ti mara ti Kéni,+ 30  ala ti Hormah,+ ala ti Borashan, ala ti Athak, 31  ala ti Hébron+ nga na ando kue so David na azo ti lo asi kozo dä.

Kete tënë

Wala “Négueb.”
Wala “Âme ti azo ni kue.”
Bâ tënë “popo-hoto” na yâ ti kete bakari.
Bâ tënë “popo-hoto” na yâ ti kete bakari.
Na Hébreu: “yingo ti lo akiri dä.”
Wala “Négueb.”
Wala “Négueb.”
Bâ tënë “popo-hoto” na yâ ti kete bakari.
Na Hébreu: “aye ti nzoni.”
Wala “ti sud.”