Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 3:1-21

LI TI ATËNË NI

  • A iri Samuel ti ga prophète (1-21)

3  Samuel so angbâ maseka ayeke sara kua+ ti Jéhovah na gbele Éli, me na ngoi ni so, a yeke ngangu ti tene a mä mbeni tënë so alondo na Jéhovah; nga avision+ ayeke lani mingi pëpe.  Mbeni lâ, Éli ayeke lango na ndo so lo yeke lango ka dä; lê ti lo avuko awe, lo yeke bâ ndo mbeni pëpe.+  Ade a mingo wâ ti lampe ti Nzapa pëpe,+ nga Samuel ayeke lango na yâ ti temple*+ ti Jéhovah so Sanduku ti Nzapa ayeke dä.  Jéhovah airi Samuel. Samuel ayeda, lo tene: “Mbi la.”  Lo gue hio na terê ti Éli, lo tene: “Mbi la. Mo iri mbi?” Me Éli atene: “Ên-ën, mbi iri mo pëpe. Kiri mo lango.” Tongaso, lo kiri lo lango.  Jéhovah akiri airi Samuel, lo tene: “Samuel!” Samuel alondo, lo gue na terê ti Éli, lo tene: “Mbi la. Mo iri mbi?” Me lo tene: “Ên-ën, mbi iri mo pëpe, molenge ti mbi. Kiri mo lango.”  (Ade Samuel ahinga Jéhovah nzoni pëpe, nga ade Jéhovah akomanse ti fa na lo tënë ti lo pëpe.)+  Ti fani ota ni, Jéhovah akiri airi lo, lo tene: “Samuel!” Samuel alondo, lo gue na terê ti Éli, lo tene: “Mbi la. Mo iri mbi?” Ge, Éli ahinga so Jéhovah la ayeke iri molenge ni so.  Tongaso, Éli atene na Samuel: “Gue, mo lango, na tongana lo kiri lo iri mo, mo tene: ‘Jéhovah, sara tënë; mbi wakua ti mo mbi yeke mä mo.’” Tongaso, Samuel akiri alango na place ti lo. 10  Jéhovah akiri airi Samuel, atene: “Samuel! Samuel!” Samuel atene: “Sara tënë; mbi wakua ti mo mbi yeke mä mo.” 11  Jéhovah atene na Samuel: “Mbi yeke sara mbeni ye na yâ ti Israël, mbeni ye so tongana zo amä, mê ti lo use kue ayeke son.+ 12  Na lango ni so, ye kue so mbi tene na ndö ti Éli nga na azo ti da ti lo, mbi yeke sara ni oko na oko kue.+ 13  Lo hinga so amolenge ti lo ayeke zonga Nzapa,+ me lo suku na ala pëpe.+ Tongaso, mo tene na lo mo tene ngbanga so mbi yeke fâ na ndö ti da ti lo, ndali ti siokpari so lo hinga ni,+ ayeke ngbâ ande lakue. 14  Ndani la mbi deba na azo ti da ti Éli so siokpari so ala sara, même tongana a mû asandaga wala a-offrande ndali ni, a lingbi ti zi siokpari ti ala pëpe.”+ 15  Samuel alango juska na ndapre; na pekoni, lo zi ayanga ti da ti Jéhovah. Me Samuel ayeke na mbeto ti fa na Éli vision ni. 16  Éli airi Samuel, lo tene: “Molenge ti mbi, Samuel!” Samuel ayeda, lo tene: “Mbi la.” 17  Éli ahunda lo, atene: “Tënë ti nyen la lo tene na mo? Pardon, honde tënë ni na mbi pëpe. Tongana mo honde même tënë oko na yâ ti atënë kue so Nzapa afa na mo, zia Nzapa abâ lege ti mo, même ahon so.” 18  Tongaso, Samuel afa na lo tënë ni kue, lo honde ye oko na lo pëpe. Éli atene: “So Jéhovah la. Zia lo sara ye so ayeke nzoni na lê ti lo.” 19  Samuel angbâ ti maï, na Jéhovah ayeke na lo;+ tënë kue so lo fa na lo, ye ni asi gï tongaso.* 20  Ti londo na Dan ti si na Béer-Shéba, azo ti Israël kue ahinga so Samuel aga prophète ti Jéhovah awe. 21  Jéhovah angbâ ti si na kodro ti Shilo, ndali ti so na Shilo la si Jéhovah ayeke fa tënë ti lo na Samuel.+

Kete tënë

So ti tene tabernacle.
Na Hébreu: “atï na sese pëpe.”