Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 29:1-11

LI TI ATËNË NI

  • A-Philistin ayeke na confiance na David ape (1-11)

29  A-Philistin+ abungbi aturugu ti ala kue na Aphek, me azo ti Israël asara camp ti ala na li ti ngu so ayeke na Jizréel.+  Aseigneur ti aPhilistin ayeke hon, ala na aturugu ti ala ngbangbo oko ngbangbo oko, na ambeni saki oko saki oko. David na azo ti lo nga na Akish ahon ti ala na ndangba ni.+  Me akota zo ti aPhilistin atene: “A-Hébreu so aga ti sara nyen ge?” Akish akiri tënë na akota zo ti aPhilistin, lo tene: “So ayeke David, zo ti kua ti Saül gbia ti Israël, la. Lo sara ngu oko na ndö ni na ndo ti mbi ge awe.+ Ngbene ye so lo kpe lo ga na ndo ti mbi juska laso so, mbi bâ mbeni ye ti sioni so lo sara pëpe.”  Me bê ti akota zo ti aPhilistin ason na terê ti lo. Ala tene na lo: “Tene na koli so ti kiri.+ Zia lo kiri na ndo so mo mû na lo. Zia lo gue na e na bira ni pëpe, ngbanga ti lo tourné na terê ti e na ngoi ti bira ni.+ Nzoni ye so lo lingbi ti sara ti nzere na lê ti seigneur ti lo ayeke gï ti fâ li ti aturugu ti e.  So David la ape? Lo so lani na ngoi so azo ayeke dodo, ala he bia na iri ti lo, atene: ‘Saül afâ azo saki oko, saki oko, David afâ ti lo azo saki bale-oko, saki bale-oko’, lo la ape?”+  Tongaso, Akish+ airi David, na lo tene na lo: “Ti tâ tënë ni, so Jéhovah ayeke na fini, mo yeke zo ti mbilimbili. Nga, a nzere na mbi ti tene mo na aturugu ti mbi ague na bira+ ndali ti so, ngbene ye so mo ga na ndo ti mbi juska laso,+ mbi bâ mbeni ye ti sioni so mo sara pëpe. Me aseigneur ni ayeke na confiance na mo pëpe.+  Tongaso mo kiri na siriri, na mo sara pëpe mbeni ye so ason bê ti aseigneur ti aPhilistin.”  Me David atene na Akish: “Nyen la mbi sara nyen? Ngbene ye so mbi wakua ti mo mbi ga na ndo ti mo juska laso, sioni ti nyen la mo bâ na mbage ti lo? Ndali ti nyen si mbi yeke gue pëpe na seigneur na gbia ti mbi ti tiri bira na awato ti lo?”  Akish akiri tënë na David, atene: “Ti mbi, mo yeke sara ye nzoni tongana ange ti Nzapa.+ Me akota zo ti aPhilistin atene: ‘Zia lo gue na e na bira ni pëpe.’ 10  Tongaso, kekereke mo zingo na kota ndapre, mo na azo ti kua ti seigneur ti mo so mo na ala aga. Gï so ndo akomanse ti han, ala londo ala gue.” 11  Tongaso, David na azo ti lo alondo na kota ndapre ala kiri na kodro ti aPhilistin; na aPhilistin ague ti ala na Jizréel.+

Kete tënë