Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 28:1-25

LI TI ATËNË NI

  • Wali so ayeke sara tënë na yingo ti akuâ na En-Dor (1-25)

28  Na yâ ti ngoi ni so, aPhilistin abungbi aturugu ti ala ti sara bira na azo ti Israël.+ Akish atene na David: “A yeke nzoni mo hinga so mo na azo ti mo ayeke gue legeoko na mbi ti sara bira.”+  David atene na Akish: “Mo hinga awe ye so mbi wakua ti mo mbi yeke sara ande.” Tongaso Akish atene na David: “Ndani la mbi yeke mû mo ti ga zo ti batango mbi lakue.”*+  Samuel akui lani awe, na azo ti Israël kue atoto kuâ ti lo na ala lu lo na Ramah so ayeke gbata ti lo.+ Saül azi azo ti sarango tënë na yingo ti akuâ nga na azo ti fango aye so ayeke si ande na zo na yâ ti kodro ni kue awe.+  A-Philistin abungbi terê ti ala na ala gue asara camp ti ala na Sunem.+ Saül abungbi azo ti Israël kue na ala gue asara camp ti ala na Guilboa.+  Tongana Saül abâ camp ti aPhilistin, mbeto agbu lo nga bê ti lo afâ ngangu.+  Saül ayeke hunda Jéhovah,+ me Jéhovah akiri tënë na lo oko pëpe, atâa na lege ti bango li, wala na lege ti Urim+ wala na lege ti aprophète.  Saül abâ gbä, lo tene na awakua ti lo: “Ala gi na mbi mbeni wali so ayeke sara tënë na yingo ti akuâ+ si mbi gue mbi bâ lo.” Awakua ti lo atene na lo: “Mbeni wali so ayeke sara tënë na yingo ti akuâ ayeke na kodro ti En-Dor.”+  Tongaso, Saül achangé terê ti lo, lo yü mbeni bongo nde, na lo na ambeni zo ti lo use ague na ndo ti wali so na bï. Lo tene na wali ni, lo tene: “Pardon, mo bâ mbadi,+ mo iri na mbi yingo ti zo so mbi yeke fa iri ti lo na mo.”  Me wali ni atene na lo, atene: “Mo mä tënë ti ye so Saül asara so ape? Lo zi na yâ ti kodro ni kue azo ti sarango tënë na yingo ti akuâ nga na azo ti fango aye so ayeke si ande na zo.+ Ngbanga ti nyen mo ye ti tene mbi tï* na yâ ti kûkû si a fâ mbi?”+ 10  Saül adeba terê ti lo na wali ni na iri ti Jéhovah, lo tene: “Ti tâ tënë ni, so Jéhovah ayeke na fini, mo yeke wara tënë pëpe.” 11  Ge, wali ni atene: “Zo wa la mo ye mbi iri lo na mo?” Lo tene: “Iri na mbi Samuel.” 12  Tongana wali ni abâ “Samuel,”*+ lo dekongo na ngangu ti lo kue. Na pekoni lo tene na Saül: “Mo handa mbi ngbanga ti nyen? Mo Saül la!” 13  Gbia ni atene na lo: “Sara mbeto pëpe; nyen la mo bâ nyen?” Wali ni atene na Saül: “Mbi bâ mbeni zo, lo kpa mbeni nzapa, lo londo na gbe ti sese lo yeke sigi.” 14  Hio lo hunda wali ni, lo tene: “Zo ni ayeke tongana nyen?” Lo tene: “A yeke mbeni mbakoro-koli la ayeke sigi so, lo yü mbeni kota bongo so maboko ni ayeke dä pëpe.”+ Ge, Saül ahinga so a yeke “Samuel” la; Saül akuku, lo kpo li ti lo na sese. 15  “Samuel” atene na Saül: “Mo son li ti mbi ti iri mbi ti sigi ngbanga ti nyen?” Saül atene: “Mbi yeke na yâ ti ngangu kpale. A-Philistin ayeke sara bira na mbi, nga Nzapa azia mbi na lo yeke kiri tënë na mbi encore ape, atâa na lege ti aprophète wala na lege ti bango li.+ Ndani la mbi iri mo ti fa na mbi ye so mbi lingbi ti sara.”+ 16  “Samuel” atene: “So Jéhovah azia mo+ nga lo ga wato ti mo awe so, mo hunda mbi ngbanga ti nyen? 17  Ye so Jéhovah atene tënë ni ândö na lege ti mbi so, lo yeke sara ni ande: Jéhovah ayeke zi royaume ni na ngangu na maboko ti mo na lo yeke mû ni na mbeni mba ti mo, David,+ 18  ndali ti so mo ke yanga ti Jéhovah na mo sara si kota ngonzo ti Jéhovah atï na ndö ti azo ti mara ti Amalec pëpe.+ Ni la si Jéhovah ayeke sara ye so na mo laso. 19  Jéhovah ayeke zia mo nga na azo ti Israël na maboko ti aPhilistin,+ nga kekereke mo+ na amolenge ti mo+ ti koli ayeke ga ti wara mbi. Jéhovah ayeke zia nga aturugu ti Israël na maboko ti aPhilistin.”+ 20  Gï so Saül amä tënë so, lo tï na yongoro terê ti lo kue na sese, mbeto ahon ndö ti lo ndali ti tënë so “Samuel” atene so. Na ndö ni, lo yeke na ngangu pëpe ndali ti so, na kota lâ nga na bï ni kue, lo te ye pëpe. 21  Tongana wali ni aga na terê ti Saül na lo bâ so li ti Saül aga kirikiri, lo tene na lo: “Mbi wakua ti mo mbi mä yanga ti mo, mbi zia fini ti mbi na lê ti kuâ+ mbi sara ye so mo hunda na mbi ti sara. 22  Pardon, mä tënë so mbi wakua ti mo mbi yeke tene na mo. Zia mbi mû na mo mapa, mo te ni mo wara ngangu si mo gue.” 23  Me Saül ake, lo tene: “Mbi yeke te ye pëpe.” Me awakua ti lo nga na wali ni avoro yanga na lo mingi ti tene lo te ye. Lo mä ala, lo londo na lê ti sese ni lo duti na ndö ti gbogbo. 24  Wali ni ayeke na mbeni kete bagara so akono nzoni. Tongaso, hio lo fâ ni,* lo mû farine lo më ni, lo zö na mapa so a sara na levure pëpe. 25  Lo mû ni na Saül na azo ti kua ti lo, ala te ni. Na pekoni, ala londo gï na bï ni so, ala gue.+

Kete tënë

Na Hébreu: “zo so ayeke sara sinziri na ndö ti li ti mbi na yâ ti alango kue.”
Wala “âme ti mbi atï.”
Wala “ye so lo bâ ti lo, lo tene ayeke Samuel.”
Wala “lo mû ni na sandaga.”