Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 22:1-23

LI TI ATËNË NI

  • David na kodro ti Adullam na Mizpéh (1-5)

  • Saül amû yanga si a fâ aprêtre ti Nob (6-19)

  • Abiathar akpe (20-23)

22  Tongaso, David alondo kâ+ lo kpe lo gue lo honde terê ti lo na yâ ti kota dû ti tênë na Adullam.+ Na ngoi so aita ti David ti koli nga na azo kue ti da ti babâ ti lo amä tënë ni, ala kue ague na lo kâ.  Azo kue so ayeke na yâ ti kpale, azo so bon ayeke na li ti ala nga na azo kue so adema ndali ti mbeni tënë* abungbi na terê ti lo, na lo ga mokonzi ti ala. Akoli kue so ayeke na terê ti lo ayeke 400 tongaso.  A si na mbeni ngoi, David alondo kâ lo gue na Mizpéh so ayeke na Moab,+ na lo tene na gbia ti Moab: “Pardon, mo zia babâ na mama ti mbi angbâ na terê ti mo juska mbi hinga ye so Nzapa ayeke sara ande ndali ti mbi.”  Tongaso, David azia ala na ndo ti gbia ti Moab, na ala ngbâ kâ na yâ ti ngoi kue so lo honde terê ti lo na yâ ti ahoto.+  Mbeni lâ, prophète Gad+ atene na David: “Ngbâ na yâ ti ahoto pëpe. Londo kâ, mo gue na sese ti Juda.”+ Tongaso, David alondo kâ lo gue na yâ ti gbako ti Héreth.  A tene na Saül a tene a bâ David na azo ti lo. Na ngoi so Saül amä tënë ni, lo duti na Guibéah+ na gbe ti keke ti tamaris so ayeke na ndö ti mbeni kete hoto. Likongo ti lo ayeke na maboko ti lo, na awakua ti lo kue ayeke na terê ti lo.  Saül atene na awakua ti lo: “Pardon, ala azo ti Benjamin, ala mä mbi si. Eskê molenge ti Jessé+ nga ayeke mû ande na ala kue ayaka na ayaka ti vigne? Lo yeke zia ala kue amokonzi ti azo saki oko saki oko, wala amokonzi ti azo ngbangbo oko ngbangbo oko?+  Ala kue amä terê ti sara sioni na mbi! Tongana molenge ti mbi wani ate mbele na molenge ti Jessé,+ zo oko asara tënë ni na mbi pëpe! Zo oko na popo ti ala abâ mawa ti mbi pëpe na tenengo na mbi so molenge ti mbi apusu zo ti kua ti mbi ti honde terê ti lo ti ku ti sara sioni na mbi, tongana ti so lo yeke sara laso.”  Doëg,+ zo ti Édom, so a zia lo na ndö ti azo ti kua ti Saül, atene:+ “Mbi bâ lani molenge ti Jessé na ngoi so lo gue na kodro ti Nob na ndo ti Ahimélec molenge ti Ahitub.+ 10  Lo hunda Jéhovah ndali ti David nga lo mû na lo kobe. Lo mû même na lo épée ti Goliath, Philistin so.”+ 11  Hio, gbia ni atokua azo ti gue na Nob ti mû prêtre Ahimélec molenge ti Ahitub na azo ti da ti babâ ti lo kue so ayeke aprêtre ti ga na ala. Tongaso ala kue aga na ndo ti gbia. 12  Saül atene: “Molenge ti Ahitub, mä mbi si!” Ahimélec ayeda, lo tene: “Mbi yeke mä mo, seigneur ti mbi.” 13  Saül atene na lo: “Mo na molenge ti Jessé amä terê ti sara sioni na mbi ngbanga ti nyen? Mo mû na lo mapa na épée, nga mo hunda Nzapa ndali ti lo. Lo ke mbi nga lo honde terê ti lo ti ku ti sara sioni na mbi, tongana ti so lo yeke sara laso.” 14  Na mango tënë so, Ahimélec akiri tënë na gbia, atene: “Na popo ti awakua ti mo kue, mbeni zo so ayeke be-ta-zo* tongana David ayeke dä?+ Lo yeke kogara ti gbia,+ lo yeke mokonzi ti agarde ti mo nga lo la a ne lo mingi na yâ ti da ti mo.+ 15  Laso la ayeke ti kozoni ti tene mbi hunda Nzapa ndali ti lo?+ Tënë so mo bi na li ti mbi so, mbi lingbi ti sara mara ti ye so lâ oko ape! Zia gbia abâ mbi wakua ti lo na azo kue ti da ti babâ ti mbi tongana asioni zo pëpe, ndali ti so mbi hinga ye oko dä ape!”+ 16  Me gbia ni atene: “Ahimélec, mo na azo ti da ti babâ ti mo kue,+ ala yeke kui!”+ 17  Tongaso, gbia ni atene na agarde so ayeke na terê ti lo, atene: “Ala gue ala fâ aprêtre ti Jéhovah, ndali ti so ala mû mbage ti David. Ala hinga so lo kpe kpengo me ala sara tënë ni na mbi pëpe!” Me agarde ni* aye pëpe ti sara sioni na aprêtre ti Jéhovah. 18  Tongaso, gbia atene na Doëg:+ “Gue, mo fâ aprêtre!” Hio Doëg, zo ti Édom,+ ague afâ aprêtre ni lo wani. Na lango ni so, lo fâ akoli 85 so ayü éphod ti lin.+ 19  Lo fâ nga na épée azo ti kodro ti Nob,+ gbata ti aprêtre. Lo mû épée lo fâ akoli na awali, lo fâ amolenge na aforoto, lo fâ akoli-bagara, akororo nga na ataba. 20  Ye oko, Abiathar, mbeni molenge ti Ahimélec so ayeke molenge ti Ahitub,+ akpe ague na peko ti David. 21  Abiathar atene na David: “Saül afâ aprêtre ti Jéhovah.” 22  David atene na Abiathar: “Na ngoi so mbi bâ Doëg, zo ti Édom, lani kâ, mbi hinga+ mbi tene lo yeke sara tënë ni ande na Saül. Ndali ti mbi la si azo ti da ti babâ ti mo kue* akui. 23  Ngbâ na terê ti mbi. Sara mbeto pëpe, ndali ti so zo kue so agi ti fâ mo,* lo yeke gi ti fâ mbi* nga; mbi la mbi yeke bata mo.”+

Kete tënë

Wala “so âme ti ala ason ngangu.”
Wala “zo ti confiance.”
Na Hébreu: “azo so ayeke gue tokua na loro.”
Wala “âme oko oko kue ti da ti babâ ti mo.”
Wala “ayeke gi âme ti mo.”
Wala “yeke gi âme ti mbi.”