Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 20:1-42

LI TI ATËNË NI

  • Jonathan azia David lâ oko ape (1-42)

20  David alondo na Naïoth so ayeke na sese ti Ramah lo kpe, lo hon. Lo si na ndo ti Jonathan na lo tene na lo: “Nyen la mbi sara nyen?+ Sioni ti nyen la mbi sara? Siokpari wa la mbi sara na terê ti babâ ti mo si lo gi ti fâ mbi* so?”  Jonathan atene na lo: “Ye ni so ayeke si lâ oko ape!+ Mo yeke kui pëpe. Bâ! Tongana babâ ti mbi aye ti sara mbeni ye, atâa a yeke kota ye wala kete ye, lo yeke sara tënë ni na mbi si. Babâ ti mbi ahonde tënë so na mbi ngbanga ti nyen? Ye ni so ayeke si pëpe.”  Me David adeba yanga, lo tene: “Babâ ti mo ahinga so mo ye tënë ti mbi mingi,+ tongaso lo yeke tene: ‘Zia Jonathan ahinga tënë ni pëpe ndali ti bê ti lo ason.’ Me ti tâ tënë ni, so Jéhovah ayeke na fini nga so mo kue mo yeke na fini,* kuâ ayo na mbi ape!”+  Jonathan atene na David: “Ye kue so mo hunda,* mbi yeke sara ni na mo.”  Tongaso, David atene na Jonathan: “Kekereke ayeke fini nze,+ na gbia ayeke ku ti tene mbi duti na place ti mbi ti te ye na table ti lo. Mo zia mbi mbi hon, mbi honde terê ti mbi na yâ ti ngonda juska mbeni kekereke na lakui.  Tongana babâ ti mo abâ mbi pëpe, tene na lo mo tene: ‘David avoro yanga na mbi ti zia lo ti gue hio na kodro ti lo na Bethléhem,+ ndali ti sandaga so ala na yâ ti sewa ti ala kue ayeke mû ka ngu oko oko.’+  Tongana babâ ti mo atene: ‘So nzoni’, andâ a ye ti tene siriri ndali ti mbi wakua ti mo la. Me tongana lo sara ngonzo, hinga so lo ye gï ti sara sioni na mbi.  Fa tâ ndoye ti mo na mbage ti mbi wakua ti mo,+ ndali ti so mbi na mo e te mbele na gbele Jéhovah.+ Tongana tënë ayeke na li ti mbi,+ mo wani mo fâ mbi. Ndani nyen ti zia mbi na maboko ti babâ ti mo?”  Jonathan atene: “Mbi peut ti sara ye tongaso na mo ape! Tongana mbi hinga so babâ ti mbi aye gï ti sara sioni na mo, mbi yeke tene tënë ni na mo ape?”+ 10  David atene na Jonathan: “Tongana babâ ti mo akiri sioni tënë na mo, zo wa la ayeke tene na mbi tënë ni?” 11  Jonathan atene na David: “Ga e gue na yâ ti ngonda.” Tongaso ala use kue ague na yâ ti ngonda. 12  Jonathan atene na David: “Mbi mû Jéhovah Nzapa ti Israël tongana témoin. Kekereke wala mbeni kekereke, mbi yeke lï yâ ti babâ ti mbi ti hinga tënë ti bê ti lo na ndö ti mo. Tongana lo ye ti sara sioni na mo David pëpe, mbi yeke tokua ndo na mo ti sara tënë ni na mo. 13  Me tongana babâ ti mbi aye gï ti sara sioni na mo, si mbi sara tënë ni na mo pëpe nga mbi zia mo mo hon na siriri pëpe, zia Jéhovah apunir mbi Jonathan ngangu. Zia Jéhovah aduti na mo+ tongana ti so lo duti lani na babâ ti mbi.+ 14  Tongana mbi ngbâ na fini wala même mbi kui, tâ ndoye so Jéhovah ayeke fa na mbage ti azo so, mo yeke fa mara ni na mbage ti mbi ape?+ 15  Ngbâ lakue ti fa tâ ndoye na mbage ti azo ti da ti mbi,+ même na ngoi so Jéhovah azi awato ti David kue na ndö ti sese.” 16  Tongaso, Jonathan ate mbele na David tënë ti azo ti da ti lo, lo tene: “Jéhovah ayeke kiri na awato ti David peko ti sioni so ala sara.” 17  Tongaso, Jonathan asara si David akiri adeba yanga so lo ye lo, ndali ti so lo ye David tongana terê* ti lo wani.+ 18  Jonathan atene na lo: “Kekereke ayeke fini nze,+ na azo ayeke bâ so mo yeke dä pëpe ndali ti so place ti mo ayeke ngbâ senge. 19  Mbeni kekereke nga, azo ayeke kiri ti bâ so mo yeke dä pëpe. A yeke nzoni mo gue na ndo so mo honde terê ti mo dä lani* so, mo luti nduru na terê ti tênë so. 20  Mbi yeke pika alê ti kokora ota nduru na terê ti tênë ni, mo bâ mo tene mbeni ye la mbi yeke pika ni na alê ti kokora ni. 21  Mbi yeke tokua zo ti kua, mbi tene: ‘Gue mo gi alê ti kokora ni.’ Tongana mbi tene na lo, mbi tene: ‘Bâ, alê ti kokora ni la na terê ti mo so, mû ni’, ti tâ tënë ni, so Jéhovah ayeke na fini so, mo David mo lingbi ti kiri, ndali ti so mbi ye ti tene so siriri ayeke dä nga mbeni ye ti sioni ayeke dä pëpe. 22  Me tongana mbi tene na maseka-koli ni, mbi tene: ‘Bâ, alê ti kokora ni angbâ na devant kâ,’ mo hon, ndali ti so Jéhovah atene na mo ti hon la. 23  Âdu ti mbele so mbi na mo e te,+ zia Jéhovah aduti témoin ni na popo ti e teti lakue lakue.”+ 24  Tongaso, David ahonde terê ti lo na yâ ti ngonda. Tongana a si na fini nze, gbia aduti ti te kobe.+ 25  Gbia Saül aduti na place so lo yeke duti ka dä lakue, na terê ti mur. Jonathan aduti lê na lê na lo nga Abner+ aduti na terê ti Saül, me place ti David angbâ senge. 26  Na lango ni so, Saül azi yanga pëpe, ndali ti so lo tene na bê ti lo, lo tene: “Âmanke mbeni ye asi so asara si lo ga sioni.+ Lo ga sioni awe la.” 27  Na use lango ti fini nze ni, place ti David angbâ lakue senge. Tongaso, Saül ahunda molenge ti lo Jonathan, atene: “Biri na laso kue molenge ti Jessé+ aga ti te kobe pëpe ngbanga ti nyen?” 28  Jonathan akiri tënë na Saül, atene: “David avoro yanga na mbi ti zia lo ti gue na Bethléhem.+ 29  Lo tene: ‘Pardon, zia mbi, mbi gue, ndali ti so mbi na azo ti sewa ti mbi e yeke na sandaga ti mungo ni, na ita ti mbi ti koli amû yanga na mbi ti gue. Tongana mbi nzere na lê ti mo, pardon, zia mbi kpe mbi gue na kodro, mbi bâ aita ti mbi.’ Ndani la lo ga na table ti gbia pëpe.” 30  Na mango tënë so, Saül asara ngonzo ngangu na terê ti Jonathan na lo tene na lo, lo tene: “Mo so mama ti mo ayeke zo ti mango ndo pëpe so, mo pensé mo tene mbi hinga ape so mo mû mbage ti molenge ti Jessé? A yeke ye ti kamene ndali ti mo nga na mama ti mo.* 31  Na ngoi kue so molenge ti Jessé so angbâ na fini, mo nga na royaume ti mo ayeke duti nzoni pëpe.+ Tongaso, tokua mbeni zo ague aga na lo na mbi, ndali ti so lo doit ti kui.”*+ 32  Me Jonathan atene na babâ ti lo Saül, atene: “A lingbi a fâ lo ngbanga ti nyen?+ Nyen la lo sara nyen?” 33  Ge, Saül abi likongo ti kpo Jonathan;+ tongaso, Jonathan ahinga so babâ ti lo aye gï ti fâ David.+ 34  Hio, Jonathan alondo na terê ti table ni na ngonzo, lo te kobe na use lango ti fini nze ni pëpe, ngbanga ti so vundu asara lo ndali ti David+ nga ngbanga ti so babâ ti lo azia kamene na lê ti lo. 35  Na ndapre, Jonathan asigi ague na yâ ti ngonda na ndo so lo na David amä terê ti wara terê dä, lo na mbeni maseka-koli so ayeke zo ti kua la ague.+ 36  Lo tene na zo ti kua ti lo ni: “Pardon, kpe mo gi alê ti kokora so mbi yeke pika.” Zo ti kua ni amû loro, na Jonathan apika lê ti kokora ni yongoro kâ na devant ti lo. 37  Tongana zo ti kua ni asi na place so lê ti kokora ni atï dä, Jonathan adekongo na lo, atene: “Lê ti kokora ni ayeke na devant kâ ape?” 38  Jonathan akiri adekongo, atene: “Sara ye hio! Gue hio! Ku ape!” Zo ti kua ti Jonathan ni amû lê ti kokora ni, lo ga na ni na wa ti lo. 39  Zo ti kua ni ahinga ye oko na yâ ti ye so apassé so pëpe; gï Jonathan na David la ahinga ni. 40  Na pekoni, Jonathan amû aye ti bira ti lo na zo ti kua ti lo na lo tene na lo: “Mû ni, mo gue na ni na kodro.” 41  Na ngoi so zo ti kua ni ahon awe, David, so ahonde terê ti lo fade nduru na ala na mbage ti sud, alondo asigi. Lo kuku, lo kpo li ti lo na sese fani ota; ala su ngbangba ti mba na ala toto ndali ti mba, me David la atoto ahon ndö ni. 42  Jonathan atene na David: “So e use kue e deba+ na iri ti Jéhovah awe, e tene: ‘Zia Jéhovah aduti témoin na popo ti mbi na mo nga na popo ti ahale* ti mo na ahale* ti mbi lakue lakue,’+ gue na siriri.” Na pekoni David alondo lo hon, na Jonathan akiri na kodro.

Kete tënë

Wala “âme ti mbi.”
Wala “âme ti mo ayeke na fini.”
Wala “âme ti mo ahunda.”
Wala “âme.”
Na Hébreu: “na mbeni lango ti kua.”
Na Hébreu: “ti mama ti mo so bongo ayeke na terê ti lo pëpe.”
Na Hébreu: “ndali ti molenge so ayeke molenge ti kuâ.”
Na Hébreu: “angongoa.”
Na Hébreu: “angongoa.”