Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 16:1-23

LI TI ATËNË NI

  • Samuel atuku mafuta na li ti David ti ga gbia na peko ti Saül (1-13)

    • “Jéhovah abâ ye so ayeke na yâ ti bê ti zo” (7)

  • Nzapa azi yingo ti lo na ndö ti Saül (14-17)

  • David aga zo ti pikango harpe ti Saül (18-23)

16  A si na mbeni ngoi, Jéhovah atene na Samuel: “So mbi ke ti tene Saül angbâ ti duti gbia na ndö ti Israël awe so,+ mo yeke sara vundu ti lo juska lawa?+ Mo tuku mafuta na yâ ti didi ti mo asi,+ na mo gue. Mbi yeke tokua mo na ndo ti Jessé,+ zo ti Bethléhem, ndali ti so mbi soro mbeni molenge ti lo ti koli ti ga gbia.”+  Me Samuel atene: “Mbi yeke gue tongana nyen? Tongana Saül amä tënë ni, lo yeke fâ mbi.”+ Jéhovah atene: “Mû kete mama ti bagara, mo gue, na mo tene: ‘Mbi ga ti mû sandaga na Jéhovah.’  Mo iri Jessé na ndo ti mungo sandaga ni; na pekoni, mbi yeke fa na mo ye so a lingbi mo sara. Zo so mbi yeke fa lo na mo, mo tuku mafuta ni na li ti lo.”+  Samuel asara ye so Jéhovah atene na lo ti sara. Na ngoi so lo si na Bethléhem,+ a-ancien ti gbata ni aga awara lo, terê ti ala ayeke dö. Ala hunda lo, ala tene: “Mo ga na siriri?”  Lo tene: “Mbi ga na siriri. Mbi ga ti mû sandaga na Jéhovah. Ala zi sioni ye na terê ti ala, na ala ga na ndo ti mungo sandaga ni.” Na pekoni, lo zi sioni ye na terê ti Jessé na amolenge ti lo, na lo iri ala ti ga na mungo sandaga ni.  Na ngoi so ala yeke lï, lo bâ Éliab,+ lo tene: “Zo so Jéhovah asoro lo so la aluti na gbele lo so.”  Me Jéhovah atene na Samuel: “Bâ gï pendere ti lo nga na yongo ti lo pëpe,+ ndali ti so mbi soro lo pëpe. Lege so zo ayeke bâ na ye ayeke nde na ti Nzapa, ndali ti so zo ayeke bâ gï ye so lê ti lo ayeke bâ, me Jéhovah abâ ye so ayeke na yâ ti bê ti zo.”+  Jessé airi Abinadab+ na lo sara si lo hon na gbele Samuel, me Samuel atene: “Lo kue Jéhovah asoro lo pëpe.”  Na pekoni Jessé afa na lo Shammah,+ me lo tene: “Lo nga kue Jéhovah asoro lo pëpe.” 10  Tongaso, Jessé airi amolenge ti lo ti koli mbasambala si ala hon na gbele Samuel; me Samuel atene na Jessé: “Jéhovah asoro zo oko na popo ti ala pëpe.” 11  Samuel ahunda Jessé: “Amolenge ti mo ti koli ni kue la?” Jessé atene: “Tanga ni+ ayeke dä, me lo gue na ataba ti te pere.”+ Samuel atene na Jessé: “Tokua a iri lo, ndali ti so tongana lo si pëpe, e yeke te kobe ti sandaga ni pëpe.” 12  Tongaso, Jessé atokua ndo a ga na lo. Lo yeke bengba bengba, lo yeke na pendere lê nga lo yeke pendere koli mingi.+ Jéhovah atene: “Londo, mo tuku mafuta na li ti lo, ndali ti so lo la mbi soro lo!”+ 13  Samuel amû didi ni,+ lo tuku mafuta ni na li ti lo na lê ti aita ti lo. A to nda ni na lango ni so, yingo ti Jéhovah akomanse ti ga na ndö ti David.+ Na pekoni, Samuel alondo lo kiri na Ramah.+ 14  Yingo ti Jéhovah azia Saül,+ na Jéhovah azia si mbeni sioni pensé* asara lo pasi.+ 15  Azo ti kua ti Saül atene na lo, atene: “Nzapa azia si mbeni sioni pensé ayeke sara mo pasi. 16  Pardon, seigneur ti e, mû yanga ti tene e awakua ti mo e gi mbeni zo so ahinga ti pika harpe nzoni.+ Tongaso, lakue tongana Nzapa azia si mbeni sioni pensé aga na li ti mo, lo yeke pika harpe ni, na yâ ti li ti mo ayeke dë.” 17  Saül atene na azo ti kua ti lo, atene: “Ala gi mbeni zo so ahinga ti pika harpe nzoni, ala ga na lo na mbi.” 18  Mbeni zo ti kua ni atene: “Mbi bâ mbeni molenge ti Jessé, zo ti Bethléhem, so ahinga ti pika mozoko nzoni mingi, lo yeke na mbeto pëpe nga lo yeke mbeni ngangu zo ti bira.+ Lo yeke sara tënë nzoni mingi, lo yeke pendere+ nga Jéhovah ayeke na lo.”+ 19  Saül atokua azo na Jessé, lo tene: “Tokua na mbi molenge ti mo David, so ayeke bata ataba so.”+ 20  Jessé amû mapa nga na bozo ti vin, lo kanga ni na ndö ti kororo, nga lo mû molenge ti ngasa lo mû na molenge ti lo David ti tene lo gue na ni kue na Saül. 21  A yeke tongaso si David asi na ndo ti Saül na lo komanse ti sara kua na lo.+ Saül aye lo mingi na lo ga zo ti yongo aye ti bira ti lo. 22  Tongaso, Saül atokua ndo na Jessé, lo tene: “Pardon, zia David angbâ asara kua na mbi, ndali ti so lo nzere na bê ti mbi.” 23  Lakue tongana Nzapa azia si mbeni sioni pensé aga na li ti Saül, David ayeke mû harpe lo pika ni, na bê ti Saül ayeke dë, li ti lo aduti kpô nga sioni pensé ni azia lo.+

Kete tënë

Na Hébreu: “mbeni sioni yingo so alondo na Jéhovah.”