Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 11:1-15

LI TI ATËNË NI

  • Saül akinda azo ti mara ti Ammon (1-11)

  • A kiri a fa so Saül la ayeke gbia (12-15)

11  Nahash, zo ti mara ti Ammon,+ ague asara camp na terê ti Jabesh+ ti Galaad ti sara bira na azo ni. Tongaso, azo ti Jabesh kue atene na Nahash, ala tene: “Te mbele* na e, na e yeke sara kua na mo.”  Nahash, zo ti mara ti Ammon, atene na ala, atene: “Mbi yeke te mbele na ala gï tongana a kôro lê ti ala ti mbage ti koli si. Mbi yeke sara ni ti zia kamene na lê ti azo ti Israël kue.”  A-ancien ti kodro ti Jabesh akiri tënë na lo, atene: “Mû na e lango mbasambala; e yeke tokua azo na yâ ti kodro ti Israël kue, tongana mbeni zo ti sö e ayeke dä pëpe, e yeke zia terê ti e na maboko ti mo.”  Azo ti tokua ni asi na Guibéah,+ gbata ti Saül, ala bi tënë ni so na mê ti azo ni, na azo ni kue atoto ngangu mingi.  Me tongana Saül alondo na peko ti abagara na ngonda lo ga, lo hunda ndo, lo tene: “Nyen la asara azo ni nyen? Ala yeke toto ngbanga ti nyen?” A fa na lo peko ti yanga ti azo ti Jabesh.  Tongana Saül amä tënë ni, yingo ti Nzapa aga na ndö ti lo,+ na ngonzo agbu lo ngangu.  Tongaso, lo mû akoli-bagara use, lo fâ yâ ti ala, lo zia nyama ni na maboko ti azo ti tokua ni si ala gue na ni na yâ ti kodro ti Israël kue. Azo ti tokua ni afa ni na azo ni, ala tene: “Zo so amû peko ti Saül na Samuel pëpe, ye so a yeke sara na abagara ti lo la.” Me kota mbeto ti Jéhovah asara azo ni, si ala londo tongana zo oko, ala gue.  Saül adiko azo ni na gbata ti Bézec; azo ti Israël ayeke 300 000, na azo ti Juda ayeke 30 000.  Ala tene na azo ti tokua ni, atene: “Ala tene na azo ti Jabesh ti Galaad: ‘Kekereke, na ngoi so lâ ayeke su ngangu, a yeke sö ala.’” Azo ti tokua ni ague asara tënë so na azo ti Jabesh, na terê ti azo ti Jabesh anzere ngangu. 10  Tongaso, azo ti Jabesh atene: “Kekereke, e yeke zia terê ti e na maboko ti ala, na ala lingbi ti sara na e ye kue so bê ti ala aye.”+ 11  Na ndade ni, Saül akangbi yâ ti azo ni na groupe ota; ala lï na yâ ti camp ti azo ti Ammon ambeni ngbonga kozo si ndo ahan,* ala fâ azo ti Ammon+ juska na ngoi so lâ asu ngangu. Ala so angbâ, yâ ti ala akangbi kirikiri, a lingbi ti wara azo use place oko pëpe. 12  Na pekoni, azo ni atene na Samuel: “Azo so lani atene: ‘Saül la ayeke zo ti duti gbia na ndö ti e ni?’,+ ala yeke na ndo wa? Sigi na ala ge e fâ ala.” 13  Me Saül atene: “A yeke fâ zo na lango ti laso pëpe,+ ndali ti so Jéhovah azi azo ti Israël laso awe.” 14  Ambeni ngoi na pekoni, Samuel atene na azo ni: “Ala ga, e gue na Guilgal+ ti tene e kiri e fa biani so Saül la ayeke gbia.”+ 15  Tongaso, azo ni kue ague na Guilgal, kâ, ala zia Saül gbia na gbele Jéhovah. Na pekoni, ala mû asandaga ti beoko na Jéhovah,+ na Saül na azo ti Israël kue asara matanga na yâ ti kota ngia.+

Kete tënë

Wala “Mä terê.”
So ti tene ti londo na 2:00 ti si na 6:00 ti ndapre tongaso.