Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Samuel 1:1-28

LI TI ATËNË NI

  • Elcanah na awali ti lo (1-8)

  • Hannah asambela Nzapa ti mû na lo molenge ti koli (9-18)

  • Hannah adü Samuel na lo mû lo na Jéhovah (19-28)

1  Mbeni koli ayeke na kodro ti Ramathaïm-Zophim*+ so ayeke na Éphraïm na ndo so ahoto ayeke dä.+ Iri ti lo ayeke Elcanah;+ lo yeke molenge ti Jéroham. Jéroham ayeke molenge ti Élihu, Élihu ayeke molenge ti Tohu, na Tohu ayeke molenge ti Zuph, zo ti mara ti Éphraïm.  Lo yeke na awali use; iri ti oko ayeke Hannah, na iri ti mbeni ayeke Péninnah. Péninnah adü, me Hannah adü pëpe.  Ngu oko oko, Elcanah ayeke londo na kodro ti lo, lo gue na Shilo ti voro* Jéhovah ti aturugu, na ti mû asandaga na lo.+ A yeke kâ la si amolenge ti Éli use, Hophni na Phinéhas,+ ayeke sara kua ti prêtre na Jéhovah.+  Mbeni lâ, Elcanah afâ mbeni nyama ti mû na sandaga na Nzapa; lo mû mbeni kasa ti nyama ni na wali ti lo Péninnah nga lo mû ambeni na amolenge ti lo kue ti koli na ti wali.+  Me na Hannah, lo mû na lo mbeni kasa ni so ayeke ti lo nde, ndali ti so Hannah la lo ye lo mingi; me Jéhovah amû na lo molenge pëpe.*  Nga, sambâ ti lo ayeke gi yanga ti lo lakue ti son gï bê ti lo, ndali ti so Jéhovah amû na lo molenge pëpe.  Ngu na ngu gï ye so lo yeke sara ka la; lakue tongana Hannah ague na da ti Jéhovah,+ sambâ ti lo ayeke gi yanga ti lo mingi. Ye so asara si Hannah ayeke toto na lo yeke te ye pëpe.  Me koli ti lo Elcanah ahunda lo, atene: “Hannah, mo toto ndali ti nyen? Mo te ye ape ndali ti nyen? Vundu asara mo tongaso ndali ti nyen?* Mbi yeke nzoni na lê ti mo ahon amolenge-koli bale-oko ape?”  Na peko ti so ala te ye nga ala nyon ye na Shilo kâ awe, Hannah alondo ahon. Andâ na ngoi ni so, prêtre Éli ayeke duti na ndo so lo yeke duti ka dä na terê ti cadre ti porte ti temple*+ ti Jéhovah. 10  Bê ti Hannah ason mingi,* na lo komanse ti sambela Jéhovah+ nga lo toto ngangu mingi. 11  Lo mû zendo, lo tene: “Jéhovah ti aturugu, tongana mo hinga pasi ti mbi, wakua ti mo, na mo dabe ti mo na mbi, nga tongana mo girisa mbi, wakua ti mo, pëpe si mo mû na mbi molenge ti koli,+ mbi yeke mû lo na mo, Jéhovah, ti sara kua ti mo na yâ ti gigi ti lo kue. Nga lame ayeke ndu ande li ti lo pëpe.”+ 12  Lo sambela aninga na gbele Jéhovah; na ngoi ni so Éli ayeke bâ yanga ti lo. 13  Hannah ayeke sara tënë na yâ ti bê ti lo; gï yanga ti lo la ayeke yengi, me a yeke mä go ti lo pëpe. Ni la Éli abâ atene lo soulé. 14  Éli atene na lo: “Sämba ni ayeke ngbâ na lê ti mo juska lawa? Mo zia lege ti vin ma-aa!” 15  Hannah akiri tënë, atene: “Seigneur ti mbi, mbi nyon ye oko pëpe. Mbi yeke wali so kpale ahon ndö ti lo;* mbi nyon vin wala mbeni sämba pëpe, me mbi yeke zi gï bê* ti mbi na Jéhovah.+ 16  Bâ mbi wakua ti mo tongana sioni wali pëpe; tënë kue so mbi tene juska na ndembe so, kota gingo bê nga na kota vundu la apusu mbi ti tene ni.” 17  Éli atene: “Gue na siriri. Zia si Nzapa ti Israël amû na mo ye so mo hunda na lo.”+ 18  Hannah atene: “Zia si mbi wakua ti mo mbi ga nzoni na lê ti mo.” Hannah ague, lo te ye nga lê ti lo ayeke na vundu mbeni pëpe. 19  Elcanah na sewa ti lo alondo hio na ndapre, ala kuku na gbe ti Jéhovah, na pekoni ala kiri na yanga-da ti ala na Ramah.+ Elcanah abungbi na wali ti lo Hannah, na Jéhovah adabe ti lo na Hannah.+ 20  A sara ngu oko pëpe,* Hannah amû ngo, lo dü molenge ti koli na lo zia iri+ ti lo Samuel,* ndali ti so lo tene: “Mbi hunda lo na tïtî Jéhovah.” 21  Mbeni lâ, Elcanah na azo ti da ti lo kue ague ti mû na Jéhovah sandaga so a yeke mû ka ni ngu oko oko,+ na ti mû sandaga ti sara ye alingbi na zendo ti lo. 22  Me Hannah ague ti lo pëpe;+ lo tene na koli ti lo: “Tongana mbi zi molenge ni na me awe, mbi yeke gue na lo kâ, mbi fa lo na Jéhovah na lo yeke ngbâ kâ biani biani.”+ 23  Koli ti lo Elcanah atene na lo: “Sara ye so ayeke nzoni na lê ti mo ti sara. Mo ngbâ juska mo zi lo na me awe si. Zia Jéhovah asara si ye ni aduti tongana ti so mo tene.” Tongaso, Hannah angbâ, lo mû me na molenge ni juska na ngoi so lo zi lo na yanga ni. 24  Gï so lo zi molenge ni na me awe, lo mû lo, lo mû koli-bagara ti ngu ota, lo mû épha oko* ti farine nga na kota ta ti vin,+ na lo gue na Shilo.+ Kâ, lo mû molenge ni, na ala gue na da ti Jéhovah. 25  Ala fâ bagara ni, na pekoni ala gue na molenge ni na Éli. 26  Hannah atene: “Pardon, seigneur ti mbi! Ti tâ tënë ni, so mo yeke na fini,* mbi la mbi yeke wali so aluti lani na terê ti mo ge si mbi sambela Jéhovah so.+ 27  Mbi sambela lani ti wara molenge so, na Jéhovah amû na mbi ye so mbi hunda na lo.+ 28  Fadeso, mbi nga kue mbi mû lo* na Jéhovah. Na yâ ti fini ti lo kue, lo yeke zo so a mû lo na Jéhovah.” Na pekoni lo* kuku na gbe ti Jéhovah kâ.

Kete tënë

Wala “ti Ramah, zo ti Zuph.”
Wala “ti kuku na gbe ti.”
Na Hébreu: “akanga yâ ti lo.”
Wala “Bê ti mo ason ndali ti nyen?”
So ti tene tabernacle.
Wala “âme ti Hannah ayeke na vundu mingi.”
Wala “wali so agi li ti lo gbä na ye so lo lingbi ti sara.”
Na Hébreu: “âme.” Bâ na kete bakari.
A lingbi nga ti tene “Tongana ngoi ni alingbi.”
Ndani aye ti tene “Iri ti Nzapa.”
Litre 22 tongaso. Bâ na B14.
Wala “so âme ti mo ayeke na fini.”
Na Hébreu: “mû lo na bon.”
Na bango ni, a ye ti sara tënë ti Elcanah.