Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Chronique 27:1-34

LI TI ATËNË NI

  • Azo so asara kua na gbe ti gbia (1-34)

27  A diko wungo ti azo ti Israël so asara kua na gbia. Ambeni ayeke amokonzi ti ahale ti akotara ti ala, nga ambeni ayeke amokonzi ti azo saki oko saki oko na amokonzi ti azo ngbangbo oko ngbangbo oko.+ Ambeni ayeke amokonzi so ayeke bâ lege ti akua so gbia+ azia na sese ndali ti abungbi nde nde so ayeke ga tour na tour, nze oko oko na yâ ti ngu ni kue. Na yâ ti bungbi oko oko, a yeke wara azo 24 000.  Jashobéam,+ molenge ti Zabdiel, la ayeke na ndö ti kozo bungbi ti azo so asara kua na kozo nze. Azo 24 000 la ayeke na yâ ti bungbi ti lo.  Na popo ti ahale ti Pérès,+ Jashobéam la a zia lo na ndö ti amokonzi kue ti abungbi so ayeke sara kua na kozo nze ni.  Dodaï,+ zo ti mara ti Ahohi,+ la ayeke na ndö ti bungbi ti azo so ayeke sara kua na use nze ni. Micloth la ayeke mokonzi ti ala. Azo 24 000 la ayeke na yâ ti bungbi ti lo.  Bénaïah,+ molenge ti kota prêtre Jéhoïada,+ la ayeke mokonzi ti ota bungbi ti azo so ayeke sara kua na ota nze ni. Azo 24 000 la ayeke na yâ ti bungbi ti lo.  Bénaïah ayeke mbeni ngangu turugu na popo ti angangu turugu 30 ti gbia, nga lo yeke na ndö ti aturugu 30 so. Molenge ti lo Ammizabad la ayeke na ndö ti azo ti bungbi ti lo.  Asahel,+ ita ti Joab,+ la ayeke na ndö ti osio bungbi ti azo so ayeke sara kua na osio nze ni. Molenge ti lo Zébadiah la aga na peko ti lo. Azo 24 000 la ayeke na yâ ti bungbi ti lo.  Shamhuth, so ayeke zo ti mara ti Jizra, la ayeke mokonzi ti oku bungbi ti azo so ayeke sara kua na oku nze ni. Azo 24 000 la ayeke na yâ ti bungbi ti lo.  Ira,+ molenge ti Ikkesh so ayeke zo ti kodro ti Técoa,+ la ayeke mokonzi ti omene bungbi ti azo so ayeke sara kua na nze omene ni. Azo 24 000 la ayeke na yâ ti bungbi ti lo. 10  Hélez,+ mbeni zo ti Palon nga zo ti mara ti Éphraïm, la ayeke mokonzi ti mbasambala bungbi ti azo so ayeke sara kua na nze mbasambala ni. Azo 24 000 la ayeke na yâ ti bungbi ti lo. 11  Sibbécaï,+ zo ti mara ti Husha nga hale ti Zérah,+ la ayeke mokonzi ti miombe bungbi ti azo so ayeke sara kua na miombe nze ni. Azo 24 000 la ayeke na yâ ti bungbi ti lo. 12  Abiézer,+ zo ti kodro ti Anathoth+ nga zo ti mara ti Benjamin, la ayeke mokonzi ti gumbaya bungbi ti azo so ayeke sara kua na gumbaya nze ni. Azo 24 000 la ayeke na yâ ti bungbi ti lo. 13  Maharaï,+ zo ti kodro ti Nétopha nga hale ti Zérah,+ la ayeke mokonzi ti bungbi bale-oko ni ti azo so ayeke sara kua na nze bale-oko ni. Azo 24 000 la ayeke na yâ ti bungbi ti lo. 14  Bénaïah,+ zo ti kodro ti Pirathon nga zo ti mara ti Éphraïm, la ayeke mokonzi ti bungbi 11 ni ti azo so ayeke sara kua na nze 11 ni. Azo 24 000 la ayeke na yâ ti bungbi ti lo. 15  Heldaï, zo ti kodro ti Nétopha nga hale ti Othniel, la ayeke mokonzi ti bungbi 12 ni ti azo so ayeke sara kua na nze 12 ni. Azo 24 000 la ayeke na yâ ti bungbi ti lo. 16  Amokonzi so ayeke na ndö ti amara ti Israël ayeke so: Ti mara ti Ruben, a yeke Éliézer molenge ti Zicri; ti mara ti Siméon, a yeke Shéphatiah molenge ti Maacah; 17  ti mara ti Lévi, a yeke Hashabiah molenge ti Kémuel; ti ahale ti Aaron, a yeke Zadoc; 18  ti mara ti Juda, a yeke Élihu,+ mbeni ita ti David; ti mara ti Issacar, a yeke Omri molenge ti Michel; 19  ti mara ti Zabulon, a yeke Ishmaïah molenge ti Abdias; ti mara ti Nephtali, a yeke Jérimoth molenge ti Azriel; 20  ti mara ti Éphraïm, a yeke Osée molenge ti Azaziah; ti ndambo ti mara ti Manassé, a yeke Joël molenge ti Pédaïah; 21  ti ndambo ti mara ti Manassé so ayeke na sese ti Galaad, a yeke Iddo molenge ti Zacharie; ti mara ti Benjamin, a yeke Jaasiel molenge ti Abner;+ 22  ti mara ti Dan, a yeke Azarel molenge ti Jéroham. Azo so kue ayeke amokonzi so ayeke na ndö ti amara ti Israël. 23  Azo so ayeke na ngu 20 nga na ala so ngu ti ala ayeke na gbe ti ngu 20, David adiko ala pëpe, ndali ti so Jéhovah amû zendo ti sara si azo ti Israël aga gbani gbani tongana atongoro na lê ti nduzu.+ 24  Joab molenge ti Zéruïah akomanse ti diko wungo ti azo, me lo hunzi ni pëpe. Dikongo azo ni+ asara si Nzapa asara ngonzo na terê ti azo ti Israël, na a zia pëpe wungo ti azo ni na yâ ti mbeti ti mbaï ti Gbia David na ngoi so lo yeke komande. 25  Azmaveth molenge ti Adiel ayeke na ndö ti ando so a bata amosoro ti gbia+ dä. Jonathan molenge ti Ozias ayeke na ndö ti agogoro* so ayeke na yaka, na yâ ti agbata, na yâ ti akete kodro nga na yâ ti atour. 26  Ezri molenge ti Kélub ayeke na ndö ti azo so ayeke dë sese ti yaka. 27  Shiméï zo ti kodro ti Rama ayeke na ndö ti ayaka ti vigne. Zabdi zo ti Shiphmoth ayeke na ndö ti ndo so a yeke bata vin dä. 28  Baal-Hanan zo ti kodro ti Guéder ayeke na ndö ti yaka ti akeke ti olive na ti akeke ti sycomore+ so ayeke na Séphélah.+ Joas ayeke na ndö ti ndo so a yeke bata mafuta dä. 29  Shitraï zo ti sese ti Saron+ ayeke bâ ndo na ndö ti abagara so ate pere na sese ti Saron. Shaphat molenge ti Adlaï ayeke bâ ndo na ndö ti abagara so a bata ala na yâ ti apopo-hoto.* 30  Obil hale ti Ismaël ayeke bâ ndo na ndö ti achameau, na Jehdéïah zo ti kodro ti Méronoth ayeke bâ ndo na ndö ti akororo.* 31  Jaziz zo ti Hagar ayeke bâ ndo na ndö ti ataba na angasa. Azo so kue ayeke amokonzi so ayeke bâ ndo na ndö ti aye ti Gbia David. 32  Jonathan+ molenge ti ita ti David ayeke zo ti mungo wango, zo so ahinga ndo nga wakuasu. Jéhiel molenge ti Hacmoni ayeke bâ ndo na ndö ti amolenge ti gbia ti koli.+ 33  Ahithophel+ ayeke zo ti mungo wango na gbia, nga Hushaï+ zo ti mara ti Arki ayeke kamarade ti gbia.* 34  Na peko ti Ahithophel, azo ti mungo wango na gbia ayeke Jéhoïada molenge ti Bénaïah+ nga na Abiathar.+ Joab+ ayeke mokonzi ti aturugu ti gbia.

Kete tënë

Wala “ando so a bata amosoro dä.”
Wala “akpangbala ndo.”
Na Hébreu: “amama ti kororo.”
Wala “zo so gbia ayeke fa atënë ti bê ti lo kue na lo.”