Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Chronique 23:1-32

LI TI ATËNË NI

  • David aleke yâ ti azo ti mara ti Lévi (1-32)

    • A zia Aaron na amolenge ti lo nde (13)

23  Tongana David aga mbakoro awe na lo ga nduru ti kui,* lo zia molenge ti lo Salomon gbia na ndö ti azo ti Israël.+  Lo bungbi amokonzi kue ti Israël, aprêtre+ nga na azo ti mara ti Lévi kue.+  A diko wungo ti azo ti mara ti Lévi oko oko kue so ayeke na ngu 30 ti gue na ni,+ na wungo ti ala ayeke 38 000.  Azo 24 000 na popo ti ala ayeke bâ ndo na ndö ti akua so a yeke sara na da ti Jéhovah, nga ambeni 6 000 ayeke ajuge nga akota zo na yâ ti kua ti ala.+  A yeke wara nga azo 4 000 so ayeke bata ayanga ti gbagba,+ azo 4 000 so ayeke sepela+ Jéhovah na aye ti mozoko so David asara tënë ni, atene: “Mbi leke agbakuru so ti sepela na Nzapa.”  David azia* azo ti mara ti Lévi na yâ ti abungbi nde nde+ alingbi na akotara ti ala so ayeke amolenge ti Lévi. Amolenge ti Lévi ni ayeke Guershon, Kohath na Mérari.+  Na popo ti ahale ti Guershon, a yeke wara Ladan na Shiméï.  Amolenge ti Ladan ti koli ayeke ota: Jéhiel so ayeke mokonzi, Zétham na Joël.+  Amolenge ti Shiméï ti koli ayeke ota: Shélomoth, Haziel na Haran. Ala yeke amokonzi ti ahale ti Ladan. 10  Amolenge ti Shiméï ti koli ayeke Jahath, Zina, Jéush na Bériah. Azo osio so ayeke amolenge ti Shiméï. 11  Jahath la ayeke mokonzi, na Zizah ayeke use zo na peko ti lo. Me teti so Jéush na Bériah adü amolenge ti koli mingi pëpe, a diko ala tongana fami oko na a zia ala ti sara kua ndo oko. 12  Amolenge ti Kohath ti koli ayeke osio: Amram, Izhar,+ Hébron na Uzziel.+ 13  Amolenge ti Amram ayeke Aaron+ na Moïse.+ Me ti Aaron na amolenge ti lo ti koli, a zia ala nde+ ti sara si Ndo so ayeke nzoni kue kue kue aga sioni pëpe, ti yâa asandaga na gbele Jéhovah, ti sara kua na lo nga ti iri tënë nzoni na ndö ti azo na iri ti lo lakue.+ 14  Âdu ti Moïse, zo ti tâ Nzapa, a zia iri ti amolenge ti lo na popo ti azo ti mara ti Lévi. 15  Amolenge ti Moïse ayeke Guershom+ na Éliézer.+ 16  Na popo ti amolenge ti Guershom ti koli, Shébuel+ la ayeke mokonzi. 17  Na popo ti ahale* ti Éliézer, Réhabiah+ la ayeke mokonzi. Éliézer adü amolenge ti koli mingi pëpe, me amolenge ti Réhabiah ti koli la ayeke gbani. 18  Na popo ti amolenge ti Izhar+ ti koli, Shélomith+ la ayeke mokonzi. 19  Amolenge ti Hébron ti koli ayeke Jériah mokonzi ni, Amariah ayeke use zo na peko ti lo, Jahaziel ayeke ota zo ni na Jécaméam+ osio zo ni. 20  Amolenge ti Uzziel+ ti koli ayeke Michée so ayeke mokonzi, na Isshiah so ayeke use zo na peko ti lo. 21  Amolenge ti Mérari ti koli ayeke Mahli na Mushi.+ Amolenge ti Mahli ti koli ayeke Éléazar na Kish. 22  Éléazar akui, me lo dü amolenge ti koli pëpe; lo dü gï awali. Tongaso, amolenge ti Kish so ayeke afami ti ala* amû ala ti ga awali ti ala. 23  Amolenge ti Mushi ti koli ayeke ota: Mahli, Éder na Jérémoth. 24  Ala so la ayeke ahale ti Lévi alingbi na akotara ti ala, nga ala yeke amokonzi ti ahale ti akotara ti ala. Ala la a diko wungo ti ala nga a sû iri ti ala na mbeti. Ala yeke sara akua so a mû na ala na da ti Jéhovah. Ngu ti ala alondo na 20 ti gue na ni. 25  David atene lani: “Jéhovah Nzapa ti Israël asara si azo ti lo awu terê ti ala awe,+ nga lo yeke sara ande kodro na Jérusalem biani biani.+ 26  A yeke hunda ti tene azo ti mara ti Lévi ayô tabernacle wala akungba ti kua ti tabernacle ni mbeni pëpe.”+ 27  Ti gue oko na tanga ti yanga so David amû, a diko wungo ti azo ti mara ti Lévi so ngu ti ala alondo na 20 ti gue na ni. 28  Kua ti ala ayeke ti mû maboko na ahale ti Aaron+ ti sara kua na da ti Jéhovah, ti bâ ndo na ndö ti alê ti lacour+ na ada ti tengo ye, nga ti sara si aye kue so a zia ni nde ndali ti kua ti Nzapa aga sioni pëpe. Ala yeke sara nga akua kue so a hunda ti sara ni na da ti tâ Nzapa. 29  Ala mû maboko na kua ti mapa so a dö ni na ndö ti terê,*+ pendere farine so a yeke sara na ambeni ye ti mû na sandaga ti lê ti kobe, mapa so a sara ni gï na ngu na farine,+ gâteau so a yôro na yâ ti gbarabuba, mengo farine,+ nga na aye kue so a haka ni ti hinga konongo ni, nengo ni nga na yongo ni. 30  Lakue na ndapre+ nga na lakui, ala yeke luti ti kiri singila na Jéhovah nga ti sepela lo.+ 31  Ala yeke mû maboko na ngoi kue so a yeke zö asandaga na Jéhovah: na alango ti sabbat,+ ti afini nze+ nga na ngoi ti amatanga so a yeke sara na yâ ti ngu oko oko.+ Ala sara ni alingbi na aye so a sû na yâ ti mbeti ti ndia, nga ala yeke sara ni lakue na gbele Jéhovah. 32  Ala yeke bâ nga lege ti akua ti ala so andu tente ti bungbi nga na ndo so ayeke nzoni-kue; ala yeke mû nga maboko na aita ti ala ahale ti Aaron ti sara kua ti da ti Jéhovah.

Kete tënë

Na Hébreu: “aga mbakoro nga lo te gigi.”
Wala “akangbi.”
Na Hébreu: “amolenge.”
Na Hébreu: “aita ti ala ti koli.”
So ti tene mapa ti ziango ni na gbele Nzapa.