Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Chronique 17:1-27

LI TI ATËNË NI

  • A yeke ti David ape ti leke temple (1-6)

  • Mbele so Nzapa ate na David ndali ti mbeni royaume (7-15)

  • David akiri singila na Nzapa na yâ ti mbeni sambela (16-27)

17  Gï so David ague na yâ ti da* ti lo awe, lo tene na prophète Nathan,+ lo tene: “Mbi yeke lango na yâ ti da so a leke na keke ti cèdre,+ me sanduku ti mbele* ti Jéhovah ayeke na yâ ti tente.”+  Nathan atene na David atene: “Mo sara ye kue so mo leke na bê ti mo ti sara, ndali ti so tâ Nzapa ayeke na mo.”  Gï na bï ni so, Nzapa atene na Nathan:  “Gue mo tene na wakua ti mbi David, mo tene: ‘Jéhovah atene: “Mo la mo yeke sara da na mbi ti tene mbi lango dä pëpe.+  Ngbene ye so mbi sigi na azo ti Israël na Égypte juska laso, mbi lango na yâ ti da pëpe, me na yâ ti tambela ti mbi, mbi yeke gï na yâ ti atente nga na yâ ti atabernacle.*+  Na yâ ti angoi kue so mbi na azo ti Israël kue e tambela, mbi zia ajuge ti fa lege na azo ti mbi. Eskê lâ oko mbi hunda mbeni juge ni awe, mbi tene: ‘Mo leke da ti keke ti cèdre ndali ti mbi pëpe ngbanga ti nyen?’”’  “Tongaso mo tene na wakua ti mbi David, mo tene: ‘Jéhovah ti aturugu atene: “Kozoni mo yeke gue na anyama ti te pere; me mbi mû mo kâ mbi zia mo na ndö ti azo ti mbi, azo ti Israël.+  Mbi yeke duti ande na mo na ndo kue so mo yeke gue dä,+ mbi yeke hunzi* awato ti mo kue na gbele mo.+ Mbi yeke sara si iri ti mo awu tongana ti akota zo ti sese so.+  Mbi yeke soro mbeni ndo ndali ti azo ti mbi, azo ti Israël, na mbi yeke zia ala dä ti tene ala sara kodro dä. Mbeni zo ti zia mbeto na yâ ti ala ayeke duti dä pëpe. Azo ti sioni ayeke kiri ti sara pasi na ala pëpe* tongana ti so ala sara ândö+ 10  ngbene ye so mbi zia ajuge na ndö ti azo ti mbi, azo ti Israël.+ Mbi yeke zia awato ti mo kue na gbe ti mo.+ Nga, mbi tene na mo mbi tene: ‘Mbi Jéhovah, mbi yeke leke da na mo.’* 11  “‘“Tongana mo kui na mo wu terê ti mo tongana ti akotara ti mo awe, mbi yeke yâa hale* ti mo na peko ti mo, mbeni molenge ti mo ti koli,+ na mbi yeke sara si royaume ti lo aluti nzoni.+ 12  Lo la lo yeke leke ande da na mbi,+ na mbi yeke sara si trône ti lo angbâ lakue lakue.+ 13  Mbi yeke ga ande babâ ti lo na lo yeke ga molenge ti mbi.+ Mbi yeke zia pëpe ti fa tâ ndoye na mbage ti lo+ tongana ti so mbi zia lani ti fa tâ ndoye na mbage ti zo so ayeke kozo na mo.+ 14  Mbi yeke zia lo na ndö ti da ti mbi nga na ndö ti royaume ti mbi lakue,+ nga trône ti lo ayeke ngbâ lakue.”’”+ 15  Nathan atene atënë so kue na David nga lo fa na lo peko ti vision ni so kue. 16  Na mango atënë so, Gbia David aga aduti na gbele Jéhovah na lo tene: “Jéhovah Nzapa, mbi yeke ti mbi zo wa? Azo ti da ti mbi ayeke azo wa si mo sara aye so kue ndali ti mbi so?+ 17  Na ndö ni, Nzapa, mo sara tënë ti aye so ayeke si ande na ahale ti wakua ti mo na yâ ti angoi so ayeke ga ande kâ.+ Jéhovah Nzapa ti mbi, mo bâ mbi tongana mbeni zo so alingbi ti tene a kiri ayâa iri ti lo mingi.* 18  So mo hinga mbi David wakua ti mo nzoni mingi awe so, tënë ti nyen la mbi lingbi ti kiri ti tene na mo?+ 19  Jéhovah, mo sara akota ye so kue ndali ti mbi wakua ti mo nga ndali ti so a nzere na bê ti mo* ti sara ni, na mo fa kota ti mo.+ 20  Jéhovah, mbeni zo tongana mo ayeke dä pëpe,+ nga mbeni Nzapa nde ayeke dä pëpe, gï mo oko.+ Atënë kue so e mä na ndö ti mo afa so tënë so ayeke tâ tënë. 21  Mbeni mara wa la na ndö ti sese ayeke tongana azo ti mo, azo ti Israël?+ Mo so mo yeke tâ Nzapa, mo gue mo zi azo ti Israël, na mo sara si ala ga azo ti mo.+ Akpengba ye so mo sara na so amû mbeto mingi na zo+ asara si iri ti mo aga kota. Mo tomba azo ti ambeni mara nde na gbele azo ti mo,+ azo ti mo so mo zi ala na Égypte. 22  Mo mû azo ti Israël ti ga azo ti mo teti lakue lakue,+ na mo Jéhovah, mo ga Nzapa ti ala.+ 23  Fadeso, Jéhovah, zendo so mo mû na mbi wakua ti mo nga na ahale ti mbi so, zia mo sara ye alingbi na ni lakue; sara tâ gï tongana ti so mo mû zendo ni so.+ 24  Zia iri ti mo angbâ lakue* nga a gonda+ ni lakue lakue si azo alingbi ti tene: ‘Jéhovah ti aturugu, Nzapa ti Israël, ayeke Nzapa ti azo ti Israël.’ Zia nga si ahale ti mbi David wakua ti mo angbâ ti luti na gbele mo lakue,+ 25  ndali ti so mo, Nzapa ti mbi, mo sara si mbi wakua ti mo mbi hinga so mo leke ti sara mbeni da na mbi.* Ndani la mbi wakua ti mo mbi yeke na mbeto pëpe ti tene sambela so na mo. 26  Jéhovah, mo la mo yeke tâ Nzapa nga mo la mo mû zendo ti sara apendere ye so na mbi wakua ti mo. 27  Tongaso, tongana a nzere na mo, sara tufa na ndö ti da ti wakua ti mo nga zia a ngbâ lakue na gbele mo, ndali ti so mo Jéhovah, mo sara tufa na ndö ni awe na tufa ni ayeke ngbâ na ndö ni lakue lakue.”

Kete tënë

Wala “yangbo.”
Ndani aye peut-être ti tene “mbi londo na mbeni ndo ti ziango atente dä mbi gue na mbeni, nga mbi londo na ndo so mbi duti dä mbi gue na mbeni.”
Na Hébreu: “zi.”
Na Hébreu: “sara pëpe si ala nze kue.”
Wala “mbi yeke sara si ahale ti mo aga gbia na peko ti mo.”
Na Hébreu: “ngongoa.”
Wala “mbeni zo so ayeke na kota ndo.”
Wala “a lingbi na ye so bê ti mo aye.”
Wala “aduti dä lakue.”
Wala “ti sara si ahale ti mbi aga gbia na peko ti mbi.”