Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Chronique 13:1-14

LI TI ATËNË NI

  • A mû Sanduku na Kiriath-Jéarim a ga na ni (1-14)

    • Nzapa apika Uzzah si lo kui (9, 10)

13  David amä terê na amokonzi ti azo saki oko saki oko, amokonzi ti azo ngbangbo oko ngbangbo oko nga na tanga ti amokonzi kue.+  Na pekoni David asara tënë na congrégation ti azo ti Israël kue, lo tene: “Tongana a yeke nzoni na lê ti ala nga tongana Jéhovah Nzapa ti e ayeda, e tokua ndo na tanga ti aita ti e na yâ ti akodro kue ti Israël, na aprêtre nga na azo ti mara ti Lévi, so ayeke na yâ ti agbata ti ala+ so ando ti tengo pere ti anyama angoro ni, ti tene ala ga awara e.  Nga e gue e mû Sanduku+ ti Nzapa ti e, e ga na ni.” Ngbene ye na ngoi ti komandema ti Saül la a bâ lege ni ape so.+  Congrégation ni kue ayeda ti sara ni, ndali ti so ala kue abâ so a yeke na lege ni.  Tongaso, David abungbi azo ti Israël kue, a londo na yanga ti ngu* ti Égypte juska na Lebo-Hamath,*+ ti gue ti mû Sanduku ti tâ Nzapa na gbata ti Kiriath-Jéarim ti ga na ni.+  David na azo ti Israël kue ague na Baalah,+ wala Kiriath-Jéarim, so ayeke ti azo ti mara ti Juda, ti mû sanduku ti tâ Nzapa, Jéhovah, so aduti na ndö* ti achérubin+ ti kiri na ni. Azo ayeke luti na devant ti sanduku ni ti iri ndo na Nzapa na iri ti lo.  Sanduku ti tâ Nzapa ayeke na da ti Abinadab. Ye oko ala zia ni na ndö ti fini puse+ ti gue na ni. Uzzah na Ahio la ayeke fa lege na fini puse ni.+  David na azo ti Israël kue ayeke sara matanga na gbele tâ Nzapa na nzerengo terê. Ala he bia, ala pika aharpe, ambeni ye ti pikango na mozoko so ayeke na kamba, atambourin,+ acymbale+ nga ala hûru atrompette.+  Me tongana ala si na ndo ti pikango alê ti kobe ti Kidon, Uzzah ayôro maboko ti lo, lo gbu Sanduku ni, ndali ti so abagara ni asara si a ngbâ kete a tï. 10  Ngonzo agbu Jéhovah ngangu na terê ti Uzzah, na lo pika Uzzah si lo kui ndali ti so lo yôro maboko ti lo, lo gbu Sanduku ni.+ Lo kui na ndo ni so na gbele Nzapa.+ 11  Me bê ti David ason ngangu* ndali ti so Jéhovah atuku ngonzo ti lo hio na ndö ti Uzzah. Ndani la a iri ndo ni so Pérès-Uzzah* juska laso. 12  Mbeto ti tâ Nzapa asara David na lango ni so, si lo tene: “Mbi lingbi ti ga na sanduku ti tâ Nzapa na mbi ge tongana nyen?”+ 13  David ague na sanduku ni na Gbata ti David pëpe, ndo so lo yeke dä. Me lo hunda ti tene a gue na ni na da ti Obed-Édom, zo ti gbata ti Gath. 14  Sanduku ti tâ Nzapa angbâ nze ota na da ti Obed-Édom. Jéhovah angbâ lakue ti sara tufa na ndö ti Obed-Édom, azo ti da ti lo nga na aye ti lo kue.+

Kete tënë

Wala “a londo na Shihor.”
Wala “na lege ti lingo na Hamath.”
A lingbi nga ti tene “na popo.”
Wala “vundu asara David.”
Ndani aye ti tene “A suru lege a wara Uzzah.”