Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Chronique 11:1-47

LI TI ATËNË NI

  • Amara ti Israël kue asara si David aga gbia (1-3)

  • David amû Sion (4-9)

  • ­Angangu zo ti bira ti David (10-47)

11  A si na mbeni ngoi, amara ti Israël kue aga na ndo ti David na gbata ti Hébron,+ ala tene: “E yeke afami ti mo.*+  Na ngoi so Saül ayeke lani gbia ti e, mo la mo mû li ni na angoi so e gue ti sara bira.*+ Nga, Jéhovah Nzapa ti mo atene na mo: ‘Mo la mo yeke fa lege na azo ti mbi, azo ti Israël, na mo la mo yeke komande na ndö ti azo ti mbi, azo ti Israël.’”+  Tongaso, a-ancien ti Israël kue ague na ndo ti Gbia David na Hébron, na lo te mbele na ala na gbele Jéhovah na Hébron. Na pekoni, ala tuku mafuta na li ti David ti tene lo ga gbia na ndö ti Israël,+ a lingbi na tënë ti Jéhovah so Samuel afa peko ni.+  Mbeni lâ, David na aturugu ti Israël kue alondo ti gue na Jérusalem, so ti tene gbata ti Jébus,+ so azo ti mara ti Jébus+ asara kodro dä.  Azo ti yâ ti gbata ni ahe David, atene: “Mo yeke si ge lâ oko pëpe!”+ Me David amû gbata ti Sion+ so ngangu gbagba ayeke na terê ni. A iri ni fadeso Gbata ti David.+  David atene: “Zo so ague kozo afâ azo ti mara ti Jébus, lo yeke ga mokonzi* nga kota zo.” Joab+ molenge ti Zéruïah la ague kozo, na lo ga mokonzi.  Na pekoni, David asara kodro na yâ ti gbata ni so ngangu gbagba ayeke na terê ni. Ndani la a iri ni Gbata ti David.  Lo komanse ti leke ada na yâ ti gbata ni kue, a londo na ndö ti kota koto* juska na ando so angoro ni. Joab la aleke peko ti tanga ti gbata ni.  A yeke tongaso si David angbâ gï ti ga kota,+ na Jéhovah ti aturugu ayeke na lo. 10  David ayeke na amokonzi so ayeke na ndö ti angangu turugu ti lo. Ala na tanga ti azo ti Israël kue amû maboko na lo ti ga gbia, tongana ti so Jéhovah amû zendo ni na Israël.+ 11  Iri ti angangu zo ti bira ti David ayeke so: Jashobéam,+ molenge ti mbeni zo ti Hacmoni. Na popo ti angangu zo ti bira ota,+ lo la lo yeke na li ti ala. Mbeni lâ, lo mû likongo lo fâ azo 300.+ 12  Zo so aga na peko ti lo ayeke Éléazar+ molenge ti Dodo so ayeke zo ti mara ti Ahohi.+ Lo yeke oko ti angangu zo ti bira ota. 13  Lo yeke lani na terê ti David na Pasdammim,+ ndo so aPhilistin abungbi terê ti ala dä ti sara bira. Mbeni kota yaka ti orge ayeke kâ. Azo ti Israël akpe ndali ti aPhilistin. 14  Me lo luti na milieu ti yaka ni lo bata ni, nga lo ngbâ lo fâ aPhilistin juska Jéhovah aga na kota songo benda.*+ 15  David ayeke na yâ ti kota dû ti tênë na Adullam.+ Amokonzi ota na popo ti amokonzi ti lo 30 ague na peko ti lo kâ. Na ngoi ni so, mbeni bungbi ti aturugu ti aPhilistin asara camp ti ala na yâ ti Popo-hoto* ti Réphaïm.+ 16  David ayeke kâ na yâ ti hoto ni, me aPhilistin azia ambeni turugu ti ala na Bethléhem. 17  Nzara ti ngu agbu David na lo tene: “Tâ tongana mbi peut ti nyon ngu so a bata ni na yâ ti dû so ayeke na terê ti yanga ti gbagba ti Bethléhem, ka a yeke nzoni!”+ 18  Na mango tënë so, angangu zo ti bira ota so alï na ngangu na yâ ti camp ti aPhilistin. Ala tö ngu so ayeke na yâ ti dû ni so ayeke na terê ti yanga ti gbagba ti Bethléhem, ala ga na ni na David. Me David ake ti nyon ngu ni, lo tuku ni na sese na Jéhovah. 19  Lo tene: “Mbi peut ti sara ye so kete pëpe! Nzapa ti mbi apeut ti yeda pëpe! Mbi peut ti nyon mênë ti azo so azia fini* ti ala na lê ti kuâ so tongana nyen?+ Ndali ti so ala zia fini* ti ala na lê ti kuâ la ala ga na ni.” Ni la lo ke ti nyon ngu ni. A yeke aye so angangu zo ti lo ti bira ota so asara la. 20  Abishaï+ ita ti Joab+ la aga mokonzi na popo ti ambeni ngangu zo ti bira ota. Mbeni lâ, lo mû épée ti lo lo fâ azo 300, na iri ti lo awu tongana ti akozo turugu ti David ota so.+ 21  Na popo ti angangu zo ti bira ota so, lo la iri ti lo awu mingi ahon amba ti lo use, nga lo yeke mokonzi ti ala; ye oko, kamba ti lo alingbi na ti akozo ngangu zo ti bira ota so pëpe. 22  Bénaïah,+ molenge ti Jéhoïada, ayeke mbeni zo so ayeke sara ka ye na mbeto pëpe.* Lo sara akpengba ye mingi na Cabzéel.+ Lo fâ amolenge ti Ariel, zo ti Moab, use; nga mbeni lâ tongana neige ayeke tï, lo descend na yâ ti dû ti ngu lo fâ mbeni bamara.+ 23  Lo fâ nga mbeni zo ti Égypte so ayo ngangu. Zo ni ayo coudée 5.*+ Atâa so zo ti Égypte ni ayeke na likongo na maboko ti lo, so keke ni ayeke tongana keke ti azo ti kpongo bongo,+ lo gue na terê ti lo na keke, lo gboto likongo ni na maboko ti zo ti Égypte ni na lo fâ lo na ni.+ 24  So ayeke aye so Bénaïah molenge ti Jéhoïada asara la. Iri ti lo awu tongana ti angangu zo ti bira ota so. 25  Atâa so iri ti lo awu ahon même amokonzi 30 so, kamba ti lo alingbi na ti angangu zo ti bira ota so pëpe.+ Me David azia lo na ndö ti agarde ti lo. 26  Angangu zo ti bira ayeke Asahel+ ita ti Joab, Elhanan molenge ti Dodo so ayeke zo ti Bethléhem;+ 27  Shammoth so ayeke Haror; Hélez zo ti Palon; 28  Ira+ molenge ti Ikkesh zo ti kodro ti Técoa; Abiézer+ zo ti kodro ti Anathoth; 29  Sibbécaï+ zo ti Husha; Ilaï zo ti mara ti Ahoha; 30  Maharaï+ zo ti kodro ti Nétopha; Héled+ molenge ti Baanah zo ti kodro ti Nétopha; 31  Ithaï molenge ti Ribaï zo ti Guibéah, kodro ti azo ti mara ti Benjamin;+ Bénaïah zo ti Pirathon; 32  Huraï so alango na terê ti apopo-hoto* ti Gaash;+ Abiel zo ti mara ti Araba; 33  Azmaveth zo ti mara ti Bahurim; Éliahba zo ti Shaalbon; 34  amolenge ti Hashem zo ti mara ti Guizon; Jonathan molenge ti Shagué zo ti Harar; 35  Ahiam molenge ti Sacar zo ti Harar; Éliphal molenge ti Ur; 36  Hépher zo ti mara ti Mékéra; Ahijah zo ti Palon; 37  Hezro zo ti kodro ti Carmel; Naaraï molenge ti Ezbaï; 38  Joël ita ti Nathan; Mibhar molenge ti Hagri; 39  Zélec zo ti mara ti Ammon; Naharaï, zo ti mara ti Béroth, so ayeke zo ti yongo aye ti bira ti Joab molenge ti Zéruïah; 40  Ira zo ti mara ti Jéther; Gareb zo ti mara ti Jéther; 41  Urie+ zo ti mara ti Heth; Zabad molenge ti Ahlaï; 42  Adina molenge ti Shiza, zo ti mara ti Ruben, so ayeke mokonzi ti azo ti mara ti Ruben; akoli 30 ayeke na terê ti lo; 43  Hanan molenge ti Maacah; Josaphat zo ti Méthen; 44  Uzzia zo ti mara ti Ashtaroth; Shama na Jéïel, amolenge ti Hotham zo ti kodro ti Aroër; 45  Jédiaël molenge ti Shimri; Joha ita ti lo so ayeke zo ti Thizi; 46  Éliel zo ti Mahavim; Jéribaï na Joshaviah, amolenge ti Elnaam; Ithmah zo ti Moab; 47  Éliel, Obed na Jaasiel so ayeke zo ti Zoba.

Kete tënë

Wala “E yeke mênë ti mo.”
Na Hébreu: “mo la mo gue na azo ti Israël ti sara bira nga mo la mo kiri na ala.”
Na Hébreu: “li.”
Wala “Millo.” Na Hébreu, a ye ti tene “sara si yâ ti mbeni ye asi.”
Wala “salut.”
Wala “Kpangbala ndo.”
Wala “âme.”
Wala “âme.”
Na Hébreu: “ayeke molenge ti mbeni zo so ayeke zo ti mbeto pëpe.”
Lo yo mètre 2,23 tongaso. Bâ na B14.