Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 Chronique 10:1-14

LI TI ATËNË NI

  • Tënë ti kuâ ti Saül na ti amolenge ti lo (1-14)

10  A-Philistin asara bira na azo ti Israël, na azo ti Israël akpe na gbele aPhilistin. Gbâ ti azo ti Israël akui na ndö ti Hoto ti Guilboa.+  A-Philistin ayeke tomba Saül na amolenge ti lo, na ala yeke ga gï nduru nduru na ala. Ala fâ Jonathan, Abinadab na Malki-Shua,+ amolenge ti Saül.  Bira ni aga tâ ngangu na Saül; azo ti pikango kokora apika lo na alê ti kokora ti ala na lo wara kä.+  Tongaso, Saül atene na zo ti yongo aye ti bira ti lo: “Gboto épée ti mo, mo kpo mbi na ni si azo so afâ ganza pëpe so aga asara pasi*+ na mbi pëpe.” Me zo ti yongo aye ti bira ni aye pëpe, ndali ti so mbeto asara lo ngangu. Ni la Saül agboto épée ti lo, lo tï na lê ni.+  Tongana zo ti yongo aye ti bira ti Saül abâ so lo kui awe, lo nga kue lo tï na lê ti épée ti lo, lo kui.  Tongaso Saül, amolenge ti lo ota nga na azo kue ti da ti lo so lo na ala ague na bira akui na lango ni so.+  Tongana azo ti Israël kue so ayeke na yâ ti popo-hoto* abâ so azo kue akpe nga so Saül na amolenge ti lo akui, ala komanse ti zia agbata ni ti kpe. A-Philistin aga amû agbata ni na peko ti ala na ala sara kodro dä.  Na ndade ni, tongana aPhilistin aga ti mû aye ti azo so ala fâ ala so, ala wara kuâ ti Saül na ti amolenge ti lo ota na ndö ti Hoto ti Guilboa.+  Ala dë go ti Saül, ala zi aye ti bira so lo yü na terê ti lo nga ala tokua azo na yâ ti akodro kue ti aPhilistin ti fa tënë ni na yâ ti ada so a bata ayanda ti ala+ dä nga ti fa tënë ni na popo ti azo. 10  Ala zia aye ti bira ti Saül ni na yâ ti da* ti nzapa ti ala nga ala kanga li ti lo na terê ti da ti Dagon.+ 11  Gï so azo kue ti Jabesh ti Galaad+ amä tënë ti ye kue so aPhilistin asara na Saül,+ 12  aturugu kue alondo ala gue amû kuâ ti Saül na ti amolenge ti lo. Ala kiri na ni na Jabesh, ala lu abio ti ala na gbe ti kota keke so ayeke na Jabesh+ nga ala mû jeûne lango mbasambala. 13  Tongaso Saül akui, ndali ti so lo fa so lo yeke be-ta-zo na Jéhovah pëpe na lege so lo mä yanga ti Jéhovah pëpe+ nga lo gue lo bâ zo ti sarango tënë na yingo ti akuâ+ 14  ahon ti hunda Jéhovah. Ni la lo fâ Saül nga lo zi komandema ni na maboko ti lo, lo mû ni na David, molenge ti Jessé.+

Kete tënë

Wala “asara ye ti ngangu.”
Wala “kpangbala ndo.”
Wala “temple.”