Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 aGbia 17:1-24

LI TI ATËNË NI

  • Prophète Élie asara tënë ti mbeni kota buru (1)

  • Acorbeau aga na kobe na Élie (2-7)

  • Élie ague na ndo ti mbeni wali-mua ti Zaréphath (8-16)

  • Molenge ti wali-mua ni akui na Élie azingo lo (17-24)

17  Élie,*+ so ayeke zo ti kete kodro ti Tishbé, asara kodro na Galaad.+ Lo tene na Achab, lo tene: “Ti tâ tënë ni, so Jéhovah Nzapa ti Israël so mbi yeke sara na lo* ayeke na fini, na yâ ti angu so ayeke ga, ngu ti pere ayeke duti dä pëpe nga ngu-nzapa ayeke pika pëpe juska mbi mû yanga awe si.”+  Jéhovah atene na Élie:  “Londo, mo gue na mbage ti est mo honde terê ti mo na yâ ti Popo-hoto* ti Kérith, so ayeke na mbage ti est ti Ngu ti Jourdain.  Nyon ngu so ayeke kâ, na mbi yeke mû yanga na acorbeau ti gue na kobe na mo kâ.”+  Hio, lo londo lo gue lo sara tâ gï ye so Jéhovah atene na lo. Lo gue lo duti nduru na Popo-hoto* ti Kérith, na mbage ti est ti Ngu ti Jourdain.  Na ndapre nga na lakui, acorbeau ni ayeke ga na lo mapa na nyama, nga lo yeke nyon ngu+ ti popo-hoto ni.  Me lango mingi na pekoni, ngu ni ahule+ ndali ti so ngu-nzapa apika na yâ ti kodro ni pëpe.  Jéhovah atene na lo:  “Londo mo gue na kodro ti Zaréphath, so ayeke na sese ti Sidon, mo duti kâ. Mbi yeke mû ande yanga na mbeni wali-mua ti mû na mo kobe.”+ 10  Tongaso lo londo lo gue na Zaréphath. Na ngoi so lo si na yanga ti gbata ni, mbeni wali-mua ayeke ro keke ti wâ. Lo iri wali ni na lo tene: “Pardon, ga na mbi ngu kete na yâ ti kopo mbi nyon.”+ 11  Na ngoi so lo yeke gue ti tö ngu ni, Élie airi lo, atene: “Pardon, na gango ti mo, mo ga na mbi mbeni nduru mapa.” 12  Wali ni atene na lo: “Ti tâ tënë ni, so Jéhovah Nzapa ti mo ayeke na fini, mbi yeke na mapa pëpe. Mbi yeke gï na kete farine na yâ ti kota ta nga na kete mafuta na yâ ti kete ta.+ Ti ndembe so, mbi yeke ro keke ti wâ kete ti tene mbi kiri na yanga-da mbi sara mbeni ye ti tengo ni ndali ti mbi na molenge ti mbi ti koli. Tongana e te ni awe, e yeke ku ti kui.” 13  Élie atene na lo: “Sara mbeto pëpe. Gue mo sara gï tongana ti so mo tene so. Me mo mû gï ye so ayeke dä so mo sara na mbeni kete mapa so ayeke ronde ronde, mo ga na ni na mbi kozoni si. Na pekoni mo lingbi ti sara mbeni ye ti tengo ni ndali ti mo na molenge ti mo. 14  Jéhovah Nzapa ti Israël atene: ‘Farine so ayeke na yâ ti kota ta so ayeke hunzi pëpe nga mafuta so ayeke na yâ ti kete ta so ayeke hunzi pëpe juska na lango so Jéhovah ayeke sara si ngu-nzapa apika.’”+ 15  Tongaso, wali ni ague asara ye tâ gï tongana ti so Élie ahunda na lo. Wali ni, sewa ti lo nga na Élie awara kobe ti tengo ni na yâ ti alango mingi.+ 16  Farine so ayeke na yâ ti kota ta ni ahunzi pëpe nga mafuta so ayeke na yâ ti kete ta ni ahunzi pëpe, a lingbi na tënë ti Jéhovah so Élie afa peko ni. 17  Na peko ti aye so, molenge ti wali-mua ni so ayeke wa ti da ni atï kobela, na kobela ni aga ngangu si molenge ni akui.+ 18  Lo tene na Élie: “Zo ti tâ Nzapa, sioni ti nyen la mbi sara na mo?* Mo ga ti dabe ti mbi na sioni ti mbi nga ti fâ molenge ti mbi?”+ 19  Élie atene na wali ni: “Ga na mbi molenge ti mo ni.” Élie amû molenge ni na maboko ti wali ni, lo monté na lo na yâ ti chambre so ayeke na li ti da ni, ndo so lo yeke lango dä. Lo zia molenge ni na ndö ti gbogbo ti lo.+ 20  Lo toto na Jéhovah, lo tene: “Jéhovah Nzapa ti mbi,+ wali so mbi lango na ndo ti lo so, lo nga kue mo sara sioni na lo na lege so mo fâ molenge ti lo?” 21  Na pekoni lo lango na ndö ti molenge ni fani ota, na lo toto na Jéhovah, lo tene: “Pardon, Jéhovah Nzapa ti mbi, zia si fini* ti molenge so akiri dä.” 22  Jéhovah amä toto ti Élie,+ na fini* ti molenge ni akiri dä, na lo zingo.*+ 23  Élie amû molenge ni na yâ ti chambre ni lo descend na lo, lo mû lo na mama ti lo. Lo tene: “Bâ, molenge ti mo akiri na fini awe!”+ 24  Wali ni atene na Élie: “Fadeso mbi hinga so mo yeke biani zo ti Nzapa+ nga so tënë ti Jéhovah so lo zia na yanga ti mo ayeke tâ tënë.”

Kete tënë

Na Hébreu: “Élijah.” Ndani aye ti tene “Nzapa ti mbi ayeke Jéhovah.”
Na Hébreu: “so mbi luti na gbele lo.”
Wala “ti mo nyen na mbi?”
Wala “âme.”
Wala “âme.”
Wala “lo kiri na fini.”