Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

1 aGbia 14:1-31

LI TI ATËNË NI

  • Prophétie so Abijah atene na terê ti Jéroboam (1-20)

  • Roboam akomande na ndö ti Juda (21-31)

    • Shishac aga ti sara bira (25, 26)

14  Na ngoi ni so, Abijah molenge ti Jéroboam atï kobela.  Tongaso, Jéroboam atene na wali ti lo: “Pardon, londo, changé terê ti mo tongaso si azo ahinga pëpe so mo yeke wali ti mbi Jéroboam, na mo gue na Shilo. Prophète Ahijah ayeke kâ. Lo la lani lo tene na mbi so mbi yeke ga gbia na ndö ti azo ti kodro so.+  Mo mû mapa bale-oko, gâteau nga na ngbenda ti mafuta ti otoro, mo gue na ndo ti lo. Lo yeke fa na mo ye so ayeke si ande na molenge ni.”  Wali ti Jéroboam asara ye so lo tene na lo. Lo londo, lo gue na Shilo+ na ndo ti Ahijah. Lê ti Ahijah avuko, na lo yeke bâ ndo pëpe ndali ti so lo ga mbakoro mingi.  Me Jéhovah atene na Ahijah: “Bâ, wali ti Jéroboam ayeke ga ti bâ mo ndali ti molenge ti lo so terê ti lo ason. Mbi yeke fa na mo tënë so mo doit ti tene na lo.* Tongana lo si, lo yeke sara ti tene mo hinga lo pëpe.”  Gï so Ahijah amä go ti gere ti wali ni na ngoi so lo ye ti lï na yâ ti da ni, lo tene: “Wali ti Jéroboam, mo ga! Mo sara ti tene mbi hinga mo pëpe ngbanga ti nyen? A hunda na mbi ti tene na mo mbeni tënë so ayeke son mo mingi.  Gue mo tene na Jéroboam, mo tene: ‘Jéhovah Nzapa ti Israël atene: “Mbi yâa mo na popo ti azo ti mo, mbi zia mo gbia na ndö ti azo ti mbi, azo ti Israël.+  Na pekoni, mbi zi royaume ni na maboko ti ahale ti David mbi mû na mo.+ Me mo sara ye tongana ti wakua ti mbi David pëpe. Ti David, lo bata lani acommandement ti mbi nga lo mû peko ti mbi na bê ti lo kue, lo sara gï ye so ayeke na lege ni na lê ti mbi.+  Me mo, sioni ti mo ahon ti azo kue so ahon kozo na mo. Mo leke mbeni nzapa nde nga na ayanda ti wen* ti son bê ti mbi.+ A yeke mbi la mo tourné peko ti mo na mbi.+ 10  Ndani la mbi yeke ga ande na ye ti ngangu na ndö ti ahale ti Jéroboam, na mbi yeke futi* akoli kue* na popo ti ahale ti Jéroboam, même ala so ayeke azo ti mawa so ayeke na Israël. Mbi yeke balê ahale ti Jéroboam+ kue, tongana ti so zo ayeke zi puru juska mbeni angbâ pëpe. 11  Zo kue so ayeke hale ti Jéroboam so akui na yâ ti gbata ni, ambo la ayeke te kuâ ti lo. Zo kue so ayeke hale ti lo si akui na yâ ti ngonda, andeke la ayeke te kuâ ti lo, ndali ti so Jéhovah la atene ni.”’ 12  “Fadeso londo mo gue na yanga-da ti mo. Na ngoi so gere ti mo ayeke dö yanga ti gbata ni, molenge ni ayeke kui. 13  Azo ti Israël kue ayeke toto lo nga ala yeke lu lo. Na yâ ti sewa ti Jéroboam gï lo oko la a yeke lu lo ndali ti so gï lo la lo sara ambeni nzoni ye, na Jéhovah Nzapa ti Israël abâ ni. 14  Jéhovah ayeke yâa mbeni zo ti zia lo gbia na ndö ti Israël, na zo ni ayeke futi ahale ti Jéroboam+ kue na ngoi so lango ni alingbi, même fadeso. 15  Jéhovah ayeke pika azo ti Israël si ala ga tongana sosongo so aba na yâ ti ngu, nga lo yeke gboto azo ti Israël na ndö ti nzoni sese so lo mû lani na akotara ti ala.+ Lo yeke kangbi yâ ti ala juska ala si na mbage ti Ngu ti Euphrate+ kâ, ndali ti so ala leke ayongoro yanda,*+ na a son bê ti Jéhovah. 16  Lo yeke zia ande azo ti Israël ndali ti siokpari so Jéroboam asara, si lo pusu azo ti Israël ti sara siokpari.”+ 17  Na mango tënë so, wali ti Jéroboam alondo lo mû lege lo kiri na gbata ti Tirzah. Gï so lo ye ti lï na yâ ti da, molenge ni akui. 18  Tongaso ala lu lo, na azo ti Israël kue atoto kuâ ti lo, a lingbi na tënë so Jéhovah atene na wakua ti lo prophète Ahijah si lo fa peko ni. 19  Âdu ti tanga ti mbaï ti Jéroboam, tënë ti abira so lo sara+ nga na ti komandema ti lo, a sû ni na yâ ti mbeti ti mbaï ti agbia ti Israël. 20  Ngoi* so Jéroboam akomande ayeke ngu 22, na pekoni lo kui, na lo wu terê ti lo tongana ti akotara ti lo.+ Molenge ti lo Nadab aga gbia na peko ti lo.+ 21  Âdu ti Roboam, molenge ti Salomon, lo yeke komande na ndö ti Juda. Roboam ayeke na ngu 41 na ngoi so lo ga gbia, na lo komande ngu 17 na Jérusalem, gbata so Jéhovah asoro ni+ na popo ti amara ti Israël kue ti zia iri ti lo dä.+ Iri ti mama ti lo ayeke Naamah, zo ti mara ti Ammon.+ 22  Azo ti Juda asara ye so ayeke sioni na lê ti Jéhovah,+ na siokpari so ala sara ason bê ti Jéhovah ahon ati so akotara ti ala asara.+ 23  Azo ti Juda angbâ nga ti leke ando so ayeke na nduzu, ayanda ti tênë nga na ayongoro yanda*+ na ndö ti kete hoto kue+ nga na gbe ti keke kue so akugbe ni adü pendere.+ 24  A wara nga na yâ ti temple ti kodro ni akoli so azia terê ti ala na amba ti ala akoli si ala lango na ala.+ Azo ti Juda asara asioni ye kue so amara so Jéhovah atomba ala ândö na gbele azo ti Israël asara. 25  Na yâ ti oku ngu ti komandema ti Gbia Roboam, Shishac+ gbia ti Égypte aga na bira na terê ti azo ti Jérusalem.+ 26  Lo mû amosoro ti da ti Jéhovah nga na ti da* ti gbia.+ Lo mû aye kue, même avala ti lor so Salomon asara.+ 27  Tongaso, Gbia Roboam asara avala ti cuivre na place ni na lo mû ni na amokonzi ti agarde,* si ala bata ni, ala so ayeke bata yanga ti da ti gbia. 28  Lakue tongana gbia aga na da ti Jéhovah, agarde ayeke gue na yâ ti kubu so a zia ndali ti ala, ala mû avala ni, na pekoni ala yeke kiri na ni kâ. 29  Âdu ti tanga ti mbaï ti Roboam, tënë ti aye kue so lo sara, a sû ni na yâ ti mbeti ti mbaï ti agbia ti Juda.+ 30  Bira ayeke lani lakue na popo ti Roboam na Jéroboam.+ 31  Na pekoni, Roboam akui, na lo wu terê ti lo tongana ti akotara ti lo. A lu lo na terê ti akotara ti lo na yâ ti Gbata ti David.+ Iri ti mama ti lo ayeke Naamah, zo ti mara ti Ammon.+ Molenge ti lo Abijam*+ aga gbia na peko ti lo.

Kete tënë

Wala “A yeke nzoni mo sara tënë na lo tongaso tongaso.”
Wala “astatue so a tö wen aga ngu si a leke na ni.”
Na Hébreu: “zi.”
Na Hébreu: “mbeni zo so asara inon na terê ti mur.” A yeke mbeni tënë so abâ akoli nga afa so zo ni ake ala.
Na Hébreu: “Alango.”
Wala “yangbo.”
Na Hébreu: “azo so ayeke gue tokua na loro.”
A iri lo nga Abijah.