Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ézéchiel 31:1-18

LI TI ATËNË NI

  • Tingo ti Égypte, keke ti cèdre so ayo na nduzu (1-18)

31  Na kozo lango ti ota nze ti ngu 11 ni, Jéhovah asara tënë na mbi, atene:  “Molenge ti zo, tene na Pharaon, gbia ti Égypte nga na gbâ ti azo ti lo, mo tene:+ ‘Na lege ti kota ti mo ni so, mo kpa zo wa?   Mbeni zo ti Assyrie ayeke dä, mbeni keke ti cèdre ti Liban,amaboko ni ayeke pendere, a kpa gbâ ti akeke so ayeke na ndo oko na so asara gbe ti dê, keke ni so ayo na nduzu mingi. Li ni ayeke na yâ ti ambinda.   Angu asara si keke ni aga kota, angu so alï mingi asara si lo yo na nduzu. Ndo so a lu lo dä, kota ngu angoro ni kue;nga angu ti canal so ayeke na terê ni asua juska na akeke ti ngonda kue.   Ndani la si lo kono lo yo mingi lo hon atanga ti akeke ti ngonda kue. “‘Akota maboko ti keke ni aga gbani, akete maboko ti keke ni ayo,ndali ti so gbâ ti angu asua na terê ni.   Andeke kue ti nduzu aleke ada ti ala na yâ ti akota maboko ti keke ni,anyama ti ngonda kue adü na gbe ti akete maboko ni,nga akota mara kue aga asara kodro na gbe ti dê ni.   Lo ga kota ndali ti pendere ti lo nga ndali ti akete maboko ti lo so ayo,ndali ti so agunda ti lo alï sese na ague juska na terê ti gbâ ti angu.   Mbeni keke ti cèdre ti yâ ti yaka ti Nzapa+ ti haka na lo ayeke dä pëpe. Mbeni keke ti genévrier so akota maboko ni ayeke tongana ti lo ayeke dä pëpe,nga mbeni keke ti platane* ti lingbi na akete maboko ti lo ayeke dä pëpe. Mbeni keke so ayeke na yâ ti yaka ti Nzapa ti lingbi na pendere ti lo ayeke dä pëpe.   Mbi sara lani si lo ga pendere, akugbe ti lo adü gbani,na atanga ti keke kue ti Éden, yaka ti tâ Nzapa, asara kota bê ti pendere ti lo.’ 10  “Tongaso, bâ tënë so Jéhovah, Seigneur ti dunia kue, atene la: ‘Ndali ti so lo yo na nduzu mingi, si li ti lo ayeke na yâ ti ambinda nga baba alï bê ti lo ndali ti yongo ti lo so, 11  mbi yeke zia lo ande na maboko ti ngangu gbia ti amara.+ Gbia ni so ayeke sara ande sioni na lo na mbi yeke ke lo ande ndali ti sioni ti lo. 12  Awande, ala so ayeke sioni mingi na popo ti amara, ayeke dë lo na sese ande, ala yeke zia lo ngbâ na li ti ahoto, akugbe ti lo ayeke tuku na yâ ti apopo-hoto kue, akete maboko ti lo ayeke fâ ti tï na sese na terê ti angu kue so ayeke sua na yâ ti kodro ni.+ Azo kue ti sese ayeke zia gbe ti dê ti lo ti hon. 13  Andeke kue ti nduzu ayeke lango ande na ndö ti keke ni so atï na sese awe so nga anyama ti ngonda kue ayeke lango na ndö ti akete maboko ni.+ 14  Ye ni asi tongaso ti tene mbeni keke so ayeke na terê ti ngu ayo na nduzu mingi tongaso pëpe, na li ti lo asi na yâ ti ambinda pëpe, nga keke so ngu asua na terê ni nzoni alingbi ti yo ti lingbi na ala pëpe. A yeke fâ ande ala kue, ala yeke gue na ndo so ayeke na gbe ti sese, legeoko na amolenge ti azo so ayeke descend na yâ ti dû.’* 15  “Bâ tënë so Jéhovah, Seigneur ti dunia kue, atene la: ‘Na lango so lo yeke descend na yâ ti Dû ti kuâ,* mbi yeke sara ande si azo aduti na vundu. Tongaso, mbi yeke kanga ndö ti angu so alï mingi nga mbi yeke gbanzi angu ti lo so ayeke sua tongaso si gbâ ti angu angbâ place oko. Ndali ti ye so, mbi yeke sara si ndo avuko na Liban nga akeke ti ngonda kue ayeke hule. 16  Na mango totongo ti tingo ti lo, mbi yeke sara si amara adö na mbeto na ngoi so mbi yeke sara si lo descend na yâ ti Dû ti kuâ legeoko na ala so ayeke gue na yâ ni, nga akeke kue ti Éden,+ akeke so ayeke pendere mingi so ayeke ti Liban, akeke kue so ngu asua na terê ti ala nzoni, ande na gbe ti sese kâ bê ti ala ayeke dë. 17  Ala descend na Dû ti kuâ* legeoko na lo, legeoko na ala so a fâ ala na épée,+ ala so amû maboko na lo na so aduti lani na gbe ti dë ti lo na popo ti amara.’+ 18  “‘Keke wa na popo ti akeke ti Éden alingbi lani na gloire ti mo nga na kota ti mo?+ Me a yeke dë mo ande na sese legeoko na akeke ti Éden si ala gue na ndo so ayeke na gbe ti sese. Mo yeke lango ande na popo ti azo so afâ ganza pëpe, ala so a fâ ala na épée. Bâ ye so ayeke si ande na Pharaon nga na gbâ ti azo ti lo la,’ tënë ti yanga ti Jéhovah, Seigneur ti dunia kue, la.”

Kete tënë

A yeke mbeni mara ti keke so amaboko ni akpe ayo na so poro ti peko ti keke ni ayeke zi na bê ti lo wani.
Wala “dû ti kuâ.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “Shéol,” so ti tene dû ti kuâ so azo kue ayeke gue dä. Bâ na kete bakari.