Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ézéchiel 30:1-26

LI TI ATËNË NI

  • Prophétie na terê ti Égypte (1-19)

    • A sara tënë ti bira ti Nébucadnezzar (10)

  • A kungbi yâ ti ngangu ti Pharaon (20-26)

30  Jéhovah akiri asara tënë na mbi, atene:  “Molenge ti zo, tene prophétie, mo tene: ‘Bâ tënë so Jéhovah, Seigneur ti dunia kue, atene la: “Ala toto atene: ‘Aï! Lango ni ayeke ga.’   Lango ni ayeke pusu nduru, biani, lango ti Jéhovah ayeke pusu nduru.+ A yeke duti ande mbeni lango ti ambinda,+ mbeni ngoi ti fango ngbanga na ndö ti amara.+   Épée ayeke ga na terê ti Égypte, mbeto ayeke gbu azo ngangu na yâ ti Éthiopie na ngoi so a yeke fâ azo na Égypte. A mû amosoro ti kodro ni a hon na ni, nga afondation ti kodro ni.+   Éthiopie,+ Put,+ Lud nga na azo ti amara nde nde, Cub, nga na amolenge ti kodro ti mbele ni,* ala kue ayeke kui ande kuâ ti épée ni.”’   Bâ tënë so Jéhovah atene la: ‘Azo so ayeke mû maboko na Égypte ayeke kui nga, ngangu ti lo so lo yeke pika kate ndali ni so ayeke tï.’+ “‘Ti londo na Migdol+ ti si na Syène,+ ala yeke kui ande kuâ ti épée,’ tënë ti yanga ti Jéhovah, Seigneur ti dunia kue, la.  ‘A yeke sara ande si akodro so aga ando so azo ayeke lango dä pëpe, na agbata ni ayeke buba ande ahon agbata kue.+  Na ngoi so mbi yeke bi wâ na yâ ti Égypte na a yeke futi azo kue so amû maboko na lo, ala yeke hinga so mbi yeke Jéhovah.  Na lango ni so, mbi yeke tokua azo na abateau ti sara si azo ti Éthiopie so ala bâ terê ti ala wani so ala lingbi awe so adö na mbeto. Mbeto ayeke gbu ala ngangu na lango so aye so ayeke ga na ndö ti Égypte, lango ni so ayeke si biani.’ 10  “Bâ tënë so Jéhovah, Seigneur ti dunia kue, atene la: ‘Mbi yeke ga na Nébucadnezzar,* gbia ti Babylone,+ ti futi gbâ ti azo ti Égypte. 11  Mbi yeke mû lo na aturugu ti lo so ayeke sioni mingi na popo ti amara+ so ti ga na ala si ala yeke futi ande kodro ni. Ala yeke gboto a-épée ti ala na terê ti Égypte, na akuâ ayeke mû yâ ti kodro ni kue.+ 12  Mbi yeke sara si acanal ti Ngu ti Nil+ aga kuru sese na mbi yeke kä kodro ni na asioni zo. Mbi yeke sara si kodro ni nga na aye kue so ayeke na yâ ni aga mbeni ndo so abuba kue na maboko ti awande.+ Mbi Jéhovah, mbi sara tënë awe.’ 13  “Bâ tënë so Jéhovah, Seigneur ti dunia kue, atene la: ‘Mbi yeke futi nga afungo yanda* ti ala, na mbi yeke futi anzapa ti Noph*+ so ayeke ambumbuse nzapa. A yeke wara ande mokonzi na yâ ti kodro ti Égypte mbeni pëpe, na mbi yeke zia mbeto na yâ ti kodro ti Égypte.+ 14  Mbi yeke sara si azo alango na yâ ti Pathros+ mbeni pëpe, mbi yeke bi wâ na yâ ti Zoan na mbi yeke fâ ngbanga na ndö ti No.*+ 15  Mbi yeke fa ande ngonzo ti mbi kue na ndö ti Sîn, gbata ti Égypte so a yeke ngangu na awato ti kinda ni so, na mbi yeke futi azo ti No. 16  Mbi yeke bi ande wâ na yâ ti kodro ti Égypte. Mbeto ayeke gbu ande azo ti Sîn ngangu, a yeke kôro ande dû na yâ ti mur ti No, na a yeke sara bira na Noph* na kota lâ. 17  Amaseka-koli ti kodro ti On* na ti Pibéseth ayeke kui ande kuâ ti épée, a yeke gbu azo ti agbata ni ti hon na ala na ngbâa. 18  Kâ na Tahpanès, na ngoi so mbi yeke kungbi ande abarre ti joug ti Égypte,+ kota lâ ayeke ga vukongo ndo. Ngangu ti lo so lo yeke pika kate ndali ni so ayeke hunzi ande,+ ambinda ayeke mû ndö ti lo kue nga a yeke gbu azo ti agbata ni ti hon na ala na ngbâa.+ 19  Mbi yeke dë ngbanga ande na ndö ti Égypte, na ala yeke hinga ande atene mbi Jéhovah la.’” 20  Na lango mbasambala ti kozo nze ti ngu 11 ni, Jéhovah asara tënë na mbi, atene: 21  “Molenge ti zo, mbi kungbi maboko ti Pharaon, gbia ti Égypte awe. A yeke zia yorö na lê ti kä ni pëpe ndali ti tene amü wala a yeke kanga ni na bongo pëpe tongaso si lo wara ngangu pëpe ti gbu épée.” 22  “Tongaso, bâ tënë so Jéhovah, Seigneur ti dunia kue, atene la: ‘Bâ, mbi yeke ga na terê ti Pharaon, gbia ti Égypte,+ mbi yeke kungbi ande amaboko ti lo, ti so angbâ nzoni nga na ti so akungbi awe so,+ na mbi yeke sara si épée alondo na maboko ti lo atï.+ 23  Na pekoni, mbi yeke kangbi azo ti Égypte na popo ti amara nga mbi yeke sara si ala hon kirikiri na yâ ti akodro.+ 24  Mbi yeke sara si amaboko ti gbia ti Babylone+ akpengba,* mbi yeke zia épée ti mbi na yâ ti maboko ti lo,+ mbi yeke kungbi amaboko ti Pharaon na lo yeke dema ngangu na devant ti gbia ti Babylone tongana zo so ayeke gue ti kui. 25  Mbi yeke sara si amaboko ti gbia ti Babylone akpengba, me amaboko ti Pharaon ayeke tï. Na ngoi so mbi yeke zia épée ti mbi na yâ ti maboko ti gbia ti Babylone na lo yeke gue na ni na terê ti kodro ti Égypte, ala yeke hinga so mbi yeke Jéhovah.+ 26  Mbi yeke kangbi azo ti Égypte na popo ti amara nga mbi yeke sara si ala hon kirikiri na yâ ti akodro.+ Ala yeke hinga so mbi yeke Jéhovah.’”

Kete tënë

Peut-être a ye ti sara tënë ti azo ti Israël so amû peko ti azo ti Égypte.
Na Hébreu: “Nébucadrezzar,” so mbeni lege ti di iri ni so la.
Tënë ti Hébreu ni ge aye peut-être ti gue oko na mbeni tënë so aye ti tene “puru.” Zo ayeke tene tënë ni so na terê ti mbeni ye ti fa so lo ke ye ni bê oko.
Wala “Memphis.”
So ti tene Thèbes.
Wala “Memphis.”
So ti tene Héliopolis.
Wala “Mbi yeke mû na lo ngangu mingi.”