Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 9:1-21

LI TI ATËNË NI

  • Mbeni kota lumière ndali ti Galilée (1-7)

    • Dungo “Mokonzi ti siriri” (6-7)

  • Maboko ti Nzapa ane na ndö ti Israël (8-21)

9  Ye oko, bingo ni ayeke duti ande pëpe tongana ti ngoi so lani kodro ni ayeke na yâ ti ngoi ti ngangu so, tongana ti ngoi so a zia lani kamene na lê ti azo ti sese ti Zabulon na ti Nephtali.+ Me na yâ ti ngoi so ayeke ga, Nzapa ayeke sara si a ne akodro so. Akodro so ayeke na terê ti lege so ahon na terê ti ngu-ingo, ando so ayeke na terê ti Ngu ti Jourdain, so ti tene Galilée ti amara.   Azo so atambela lani na yâ ti bingo abâ kota lumière. Âdu ti azo so asara kodro na ando so avuko pitipiti, lumière asu na ndö ti ala.+   Mo sara si azo ti mara ni aga gbani gbani; mo sara si terê ti ala anzere mingi. Ala yeke na kota ngia na gbele mo. Ngia ti ala ayeke tongana ti azo na ngoi ti kongo lê ti kobe, mara ti ngia so azo ayeke na ni na ngoi ti kangbingo aye so a gbu na ngoi ti bira.   Nengo joug so ayeke na ndö ti go ti ala, mo fâ yâ ni kete kete. Keke so mokonzi ayeke forcé azo na ni ti tene ala sara kua, mo fâ yâ ni kete kete, tongana ti ngoi so mo sö benda lani na ndö ti azo ti Madian.+   Poro oko oko kue ti aturugu so ayeke yengi sese na ngoi so ala yeke tambela nga na bongo kue so a yôro ni na yâ ti mênë ayeke ga tongana keke ti wâ.   A dü na e mbeni molenge,+ a mû na e mbeni molenge ti koli; komandema* ayeke duti na ndö ti go ti lo.+ A yeke iri lo Zo ti mungo wango ti ndara,+ Nzapa so ayeke ngangu mingi,+ Babâ ti lakue lakue, Mokonzi ti siriri.   Komandema ti lo* so ayeke mû gï ndo ti gue na ni nga na siriri ayeke hunzi ande pëpe, na ndö ti trône ti David+ nga na ndö ti royaume ti lo,+ ti sara si a luti nzoni nga a kpengba+ na lege ti fango ngbanga ti mbilimbili+ nga na sarango ye na lege ni,+ ti londo fadeso ti gue na ni, lakue lakue. Kota nzara ti bê ti Jéhovah ti aturugu ayeke sara ni.   Jéhovah atene mbeni tënë na terê ti Jacob, nga tënë ni aga na ndö ti Israël.+   Azo kue ayeke hinga ni, so ti tene azo ti Éphraïm nga na ti gbata ti Samarie. Baba apusu ala ti tene: 10  “Ada so a sara na brique atï awe, me e yeke kiri ti leke ni na tênë so a dë terê ni pendere.+ A dë akeke ti sycomore na sese awe, me e yeke zia akeke ti cèdre na place ni.” 11  Jéhovah ayeke pusu awato ti Retsin na terê ti lo; lo yeke pusu awato ti lo ti londo ti sara ye. 12  Azo ti Syrie ayeke londo na mbage ti est, na aPhilistin ayeke londo na mbage ti ouest.*+ Ala yeke zi yanga ti ala kota si ala te azo ti Israël.+ Ndali ti asioni ye kue so azo ni asara, ade ngonzo ti lo adë pëpe, na maboko ti lo ayeke lakue nduru ti pika ala.+ 13  Ade azo ni akiri pëpe na mbage ti Nzapa so ayeke pika ala; ala gi Jéhovah ti aturugu pëpe.+ 14  Na yâ ti lango oko, Jéhovah ayeke zi na Israël li na damba, nga fini maboko ti keke na ngala.*+ 15  A-ancien na azo so a ne ala mingi la ayeke li ni; aprophète so ayeke fa tënë ti mvene la ayeke damba ni.+ 16  Azo so ayeke fa lege na azo ni asara si ala fono kirikiri, na li ti azo so azo ni afa lege na ala aga kirikiri. 17  Ndani la Jéhovah ayeke duti na ngia pëpe ndali ti amaseka ti ala ti koli, nga amolenge ti ala so babâ ti ala ayeke dä pëpe* nga na awali-mua, lo yeke bâ mawa ti ala pëpe ndali ti so ala kue ayeke a-apostat na azo ti sioni.+ Zo kue ayeke tene gï abuba tënë. Ndali ti asioni ye kue so azo ni asara, ade ngonzo ti lo adë pëpe, na maboko ti lo ayeke lakue nduru ti pika ala.+ 18  Sioni sarango ye ayeke mû ndo tongana wâ so ayeke gbi ye, a gbi akeke ti sisi nga na apere. A yeke zia wâ na terê ti agbako so yâ ni aserré mingi, na a yeke monté tongana kota guru ti wâ na nduzu. 19  Ngonzo ti Jéhovah ti aturugu asara si wâ agbi sese ni, na azo ni ayeke ga tongana keke ti wâ. Zo oko ayeke bata même ita ti lo na fini pëpe. 20  Ye ti tengo ni so zo awara na mbage ti maboko ti lo ti koli, lo yeke fâ ni ti te, me nzara ayeke ngbâ ti sara lo; zo ayeke te ye so lo wara na mbage ti maboko ti lo ti wali me yâ ti lo ayeke si pëpe. Zo oko oko ayeke te nyama ti maboko ti lo wani. 21  Azo ti mara ti Manassé ayeke te azo ti mara ti Éphraïm, nga azo ti mara ti Éphraïm ayeke te azo ti mara ti Manassé. Ala kue ayeke bungbi oko ti gue na terê ti azo ti Juda.+ Ndali ti asioni ye kue so azo ni asara, ade ngonzo ti lo adë pëpe, na maboko ti lo ayeke lakue nduru ti pika ala.+

Kete tënë

Wala “gouvernement; komandema ti molenge ti gbia.”
Wala “gouvernement; komandema ti molenge ti gbia.”
Na Hébreu: “na mbage ti peko ti lo.”
A lingbi nga ti tene “maboko ti mbûrü na sosongo.”
Wala “anyindu.”