Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 8:1-22

LI TI ATËNË NI

  • Tënë ti gango ti Assyrie ti mû yâ ti kodro ni kue (1-8)

    • Maher-Shalal-Hash-Baz (1-4)

  • Sara mbeto ape—“Nzapa ayeke na e” (9-17)

  • Ésaïe na amolenge ti lo ayeke tongana afä (18)

  • Gi wango na yâ ti ndia, me na mbage ti asioni yingo ape (19-22)

8  Jéhovah atene na mbi: “Mû mbeni kota tableau+ na senge keke-mbeti,* mo sû tënë so na ndö ni: ‘Maher-Shalal-Hash-Baz.’*  Zia si prêtre Urie+ na Zacharie molenge ti Jébérékiah, atémoin so ayeke be-ta-zo, asû maboko ti ala dä ti fa so tënë ni la mo sû so.”*  Na pekoni, mbi bungbi* na prophète-wali,* lo mû ngo na lo dü molenge ti koli.+ Jéhovah akiri atene na mbi, atene: “Zia iri ti lo Maher-Shalal-Hash-Baz,  ndali ti so kozo ti tene molenge ni ahinga ti tene ‘Babâ’ nga ‘Mama’, amosoro ti gbata ti Damas nga na aye ti gbata ti Samarie so azo agbu na peko ti bira, azo ayeke hon na ni na lê ti gbia ti Assyrie+ ti gue na ni na ndo ti lo.”  Jéhovah akiri atene na mbi, atene:   “So azo so ake ngu ti Siloé*+ so ayeke sua yeke yeke so, nga terê ti ala anzere mingi ndali ti Retsin na molenge ti Rémaliah,+   Jéhovah ayeke tokua gbia ti Assyrie+ na yâ ti ngangu ti lo kue nga na angangu turugu ti lo ti sara bira na ala. Lo yeke ga tongana Ngu ti Euphrate so asuku juska na gigi.   Lo yeke mû yâ ti sese ti Juda kue. Lo yeke hon na yâ ti sese ni tongana ngu so asuku asi na go ti zo;+ akpangbi ti lo so yâ ni azi kota ayeke mû largeur ti kodro ti mo kue, Emmanuel!”*+   Azo, ala sara sioni na azo ti kodro ni, me a yeke fâ ande yâ ti ala kete kete. Ala azo so alango na ambage ti sese so ayeke yongoro kâ, ala dengi mê ti ala ala mä. Ala leke terê ti ala ti sara bira,* me a yeke fâ ande yâ ti ala kete kete!+ Ala leke terê ti ala ti sara bira, me a yeke fâ ande yâ ti ala kete kete! 10  Ala leke ye so ala ye ti sara, me a yeke tï na ngu. Ala sara tënë ti ye so ala ye ti sara, me a yeke ga nzoni pëpe, ndali ti so Nzapa ayeke na e.*+ 11  Jéhovah azia ngangu maboko ti lo na ndö ti mbi, na lo gboto mê ti mbi na ndö ti sarango ye ti azo so, lo tene: 12  “Ye so azo ni airi ni mango terê ti sarango mbeni ye ti sioni so, mo iri ni tongaso pëpe. Ye so ala sara mbeto ni so, mo sara mbeto ni pëpe; zia terê ti mo adö na mbeto ndali ni pëpe. 13  Jéhovah ti aturugu la a yeke nzoni mo bâ lo tongana zo so ayeke nzoni-kue,+ lo la a yeke nzoni mo kpe mbeto ti lo. Lo la a yeke nzoni mo dö na gbele lo.”+ 14  Lo yeke ga tongana ndo so zo ayeke kpe dä ti bata terê ti lo, me nga tongana mbeni tênë so zo ayeke gu terê ti lo na ni, mbeni kota tênë so zo ayeke pika gere ti lo dä+ ndali ti aroyaume use ti Israël. Lo yeke ga nga tongana kûkû nga na gbanda ndali ti azo ti Jérusalem. 15  Mingi ti ala ayeke pika gere ti ala, ala yeke tï nga ye ti terê ti ala ayeke kungbi. Ala yeke tï na yâ ti kûkû nga a yeke gbu ala. 16  Mo roulé mbeti so atémoin asû maboko ti ala dä* ti fa so tënë ni la mo sû so; mo kpo nzoroko na ndö ti ndia* so a sû ni ndali ti adisciple ti mbi! 17  Mbi yeke ngbâ ti ku Jéhovah,*+ lo so ahonde lê ti lo si ahale ti Jacob+ abâ lo pëpe, na mbi yeke zia bê ti mbi na lo. 18  Bâ! Mbi na amolenge so Jéhovah amû na mbi,+ e yeke tongana afä+ nga na amiracle na Israël, afä nga na amiracle so alondo na Jéhovah ti aturugu nga so asara kodro na ndö ti Hoto ti Sion. 19  Tongana ala tene na mo, atene: “Mo gue mo hunda azo ti sarango tënë na yingo ti akuâ nga na azo ti fango aye so ayeke si ande na zo so ayeke diko gbâ ti tënë na gbe ti go ti ala”, a yeke nzoni mo gue? A yeke Nzapa ti ala la a lingbi ala hunda lo ape? A yeke nzoni ala hunda azo so akui awe ndali ti azo so angbâ na fini?+ 20  Jamais! A yeke nzoni ala gi wango na yâ ti ndia nga na mbeti so a sû ni si atémoin asû maboko ti ala dä* ti fa so tënë ni la a sû so. Tongana ala sara tënë alingbi na atënë so pëpe, ala yeke na yâ ti lumière* pëpe.+ 21  Zo kue so ahon na yâ ti kodro ni ayeke bâ pasi nga nzara ayeke sara lo.+ So nzara asara lo nga bê ti lo ason, lo yeke bâ ndo na nduzu na lo yeke deba gbia ti lo nga na Nzapa ti lo. 22  Na pekoni, lo yeke bâ ndo na sese, na lo yeke bâ gï aye ti vundu nga na bingo, ngoi ti ngangu, bingo so avuko pitipiti me lumière ayeke dä pëpe.

Kete tënë

Na Hébreu: “keke-mbeti so azo kue ayeke sara na kua.”
Peut-être a ye ti tene: “Guengo na loro na terê ti aye so a gbu ni na ngoi ti bira; Gango hio na terê ti ye so a nzi ni.”
Wala “ala bâ mo na sungo ni.”
Na Hébreu: “ga nduru.”
So ti tene wali ti lo Ésaïe ni.
Siloé ni ayeke canal so ngu ayeke sua dä.
Wala “Ala yü aye ti bira ti ala.”
Tënë ti Hébreu so a kiri peko ni na “Nzapa ayeke na e” ayeke Emmanuel. Bâ na És 7:14; 8:8.
Wala “mbeti so ayeke tongana témoin.”
Wala “fango ye.”
Wala “Mbi yeke ku Jéhovah kungo.”
Wala “mbeti so ayeke tongana témoin.”
Na Hébreu: “lumière ti kota ndapre.”