Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 62:1-12

LI TI ATËNË NI

  • Fini iri ti Sion (1-12)

62  Mbi yeke kanga yanga ti mbi pëpe ndali ti Sion,+ nga mbi yeke duti kpô pëpe ndali ti Jérusalem juska mbilimbili ti lo asu tongana lumière so aza ngangu,+ nga juska salut ti lo aza tongana keke so wâ ayeke za na yanga ni.+   “Wali,+ amara ayeke bâ mbilimbili ti mo, nga agbia kue ayeke bâ gloire ti mo.+ A yeke zia mbeni fini iri na ndö ti mo,+ iri so Jéhovah wani la afa ni na yanga ti lo.   Mo yeke ga tongana couronne ti baba na yâ ti maboko ti Jéhovah, mo yeke ga tongana mbeni turban ti gbia na yâ ti maboko ti Nzapa ti e.   A yeke iri mo encore ape wali so a dö lo a zia,+ nga a yeke iri kodro ti mo encore ape ndo so a dö ni a zia.+ Me a yeke iri mo Wali-so-azia-ngia-na-be-ti-mbi,+ nga a yeke iri kodro ti mo Zo-so-asara-mariage-awe, ndali ti so Jéhovah ayeke duti na ngia ndali ti mo nga kodro ti mo ayeke duti tongana zo so asara mariage awe.   Legeoko tongana ti so mbeni maseka-koli ayeke sara mariage na wali so ade ti hinga koli pëpe, azo ti kodro ti mo ayeke sara mariage na mo. Legeoko tongana ti so koli so amû wali fini fini aduti na ngia ndali ti wali ti lo, Nzapa ayeke duti na ngia ndali ti mo.+   Jérusalem, mbi zia asinziri na ndö ti gbagba ti mo. Lakue na kota lâ nga na bï, ala doit ti duti kpô pëpe. Ala so ayeke sara tënë ti Jéhovah, ala wu terê ti ala pëpe.   Ala zia lo kpô pëpe juska lo sara Jérusalem aluti nzoni awe si, nga juska lo sara si Jérusalem aga ye so azo ti sese kue agonda ni.”+   Jéhovah ayô ngangu maboko ti lo ti koli na nduzu, lo deba, lo tene: “Mbi yeke kiri ti mû alê ti kobe ti mo na awato ti mo ti tene ala te ni pëpe, nga fini vin so mo bâ pasi ti sara ni so, mbi yeke kiri ti mû ni na awande ti tene ala nyon ni pëpe.+   Me azo so abungbi alê ti kobe ni ndo oko la ayeke te ni, nga ala yeke sepela Jéhovah; nga ala so asara vin ni la ayeke nyon ni na lê ti alacour ti mbi so ayeke nzoni-kue.”+ 10  Ala hon, ala hon na yanga ti gbagba. Ala zi aye kue na ndö ti lege ti tene azo ahon dä.+ Ala suru lege, ala suru lege! Ala zi atênë.+ Ala kpo mbeni yongoro keke na nduzu si azo abâ ni.+ 11  Jéhovah ato mbela juska na andangoro ti sese kue, lo tene: “Ala tene na molenge-wali ti Sion: ‘Bâ, salut ti mo ayeke ga.+ Bâ, futa so lo yeke mû na azo ayeke na maboko ti lo; ye so lo ye ti futa na azo ayeke na gbele lo.’”+ 12  A yeke iri azo ni azo so ayeke nzoni-kue, azo so Jéhovah afuta mbeni ye ti zi ala,+ nga a yeke iri mo Gbata-so-a-yeke–gi-peko-ni, Gbata-so-a-do-ni-a-zia-pepe.+

Kete tënë