Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 58:1-14

LI TI ATËNË NI

  • Tâ mungo jeûne na mungo jeûne ti handango lê (1-12)

  • Ala ye gï tënë ti Sabbat (13, 14)

58  Lo tene na mbi: “Mo dekongo na ngangu ti mo kue. Mo ngbâ gï ti sara tongaso. Zia go ti mo atoto tongana didi so a hûru ni. Fa na azo ti mbi tënë ti ngangu-li so ala sara,+ fa na ahale ti Jacob tënë ti siokpari so ala sara.   Ala gi mbi lâ na lâ, ala tene so ala yeke na ngia ti hinga alege ti mbi, mo bâ mo tene ala yeke mbeni mara so asara ye mbilimbili, mbeni mara so adö lege ti mbilimbili ti Nzapa ti lo azia pëpe.+ Ala hunda na mbi ti lu andia so ayeke mbilimbili, a nzere na ala ti ga nduru na Nzapa ti ala.+   Ala tene: ‘Na ngoi so e mû jeûne, mo bâ ni pëpe ngbanga ti nyen?+ Na ngoi so e sara* vundu, mo bâ ni pëpe ngbanga ti nyen?’+ A yeke ngbanga ti so na lango ti mungo jeûne ni, ala yeke gi gï nzoni ti* ala wani, na ala yeke sara pasi na azo so asara ngangu kua ndali ti ala.+   Mungo jeûne ti ala ni ayeke hunzi na papa nga na tiri, nga ala yeke pika mba sioni na gobo. Ala lingbi pëpe ti ngbâ ti mû mara ti jeûne so ala mû laso na ti sara si a mä go ti ala na yayu.   A yeke nzoni mungo jeûne so anzere na mbi aduti tongaso? A nzere na mbi ti tene na lango ni so zo* asara vundu? A nzere na mbi ti tene lo ba li ti lo na sese tongana ngala? A nzere na mbi ti tene lo lango na ndö ti bongo ti vundu nga na yâ ti mburu ti wâ? So la ala iri ni mungo jeûne nga na lango so anzere na mbi Jéhovah?   A nzere na mbi pëpe! Mungo jeûne so anzere na mbi ayeke so: A yeke nzoni ala zi achaîne so a kanga zo na ni na sioni bê, ala zi akamba ti joug na go ti zo,+ ala zi azo so abâ pasi si ala hon+ nga ala fâ yâ ti joug kue so ayeke na go ti zo.   A yeke nzoni ala kangbi kobe ti ala na azo so nzara asara ala,+ ala yamba awayere nga na azo so ayeke na da pëpe na yâ ti da ti ala, ala mû bongo ala yü na zo so ala bâ so terê ti lo ayeke senge+ nga ala tourné peko pëpe na afami ti ala.   Tongaso lumière ti ala ayeke su tongana sigingo ti lâ na ndapre,+ nga ala yeke sava hio. Mbilimbili ayeke tambela na devant ti ala, na gloire ti Jéhovah ayeke duti na mbage ti peko ti ala ti bata ala.+   Na pekoni ala yeke iri ndo, na Jéhovah ayeke yeda. Ala yeke toto ti tene a mû maboko na ala, na lo yeke tene: ‘Mbi la!’ Tongana ala zi joug ti kangango na go ti zo na popo ti ala na ala zia ti yôro maboko na lê ti zo nga ti tene atënë ti mbana na zo,+ 10  tongana ala mû na azo so nzara asara ala ye so ala wani asara nzara ni*+ nga ala zia ngia na bê ti azo so abâ pasi,* lumière ti ala ayeke su même na yâ ti vukongo ndo, na bingo so ala yeke na yâ ni ayeke ga tongana lâ ti midi.+ 11  Jéhovah ayeke fa lege na ala lakue na lo yeke zia ngia na bê ti ala,* même tongana ala yeke na ndo so ahule ngangu.+ Lo yeke sara si bio ti ala akiri akpengba, na ala yeke ga tongana mbeni yaka so awara ngu nzoni,+ nga tongana li ti ngu so ngu ni ahule lâ oko pëpe. 12  Azo ayeke kiri ti leke ndali ti ala angbene ndo so abuba+ nga ala wani ayeke kiri ti leke agere ti da so azo aleke ni ândö giriri.+ Azo ayeke iri ala azo ti lekengo gbagba so akungbi,*+ nga azo ti lekengo alege ti tene azo asara kodro na terê ni. 13  Tongana ala ke ti gi gï nzoni ti ala wani ti bata lango ti sabbat so a zia ni nde ndali ti mbi,+ na ala iri sabbat ni ngoi so azia ngia mingi na bê ti zo, lango so a zia ni nde ndali ti Jéhovah nga so ayeke kota mingi,+ nga tongana ala ne ni mingi ahon ti gi gï nzoni ti ala wani na ti diko asenge tënë, 14  ala yeke duti na ngia mingi ndali ti Jéhovah, na mbi yeke sara si ala komande ando so ayeke na nduzu.+ Mbi yeke sara si ala te kobe so asigi* na ndo so a mû na kotara ti ala Jacob,+ ndali ti so mbi Jéhovah la mbi sara tënë so.”

Kete tënë

Wala “âme ti e asara.”
Wala “ye so anzere na.”
Wala “âme ti zo.”
Wala “âme ti ala asara nzara ni.”
Wala “a-âme so abâ pasi.”
Wala “âme ti ala.”
Na Hébreu: “mbage ti gbagba so akungbi.”
Wala “ala duti na ngia.”