Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 52:1-15

LI TI ATËNË NI

  • Sion, mo zingo! (1-12)

    • Pendere gere ti azo so aga na nzoni tënë (7)

    • Asinziri ti Sion abungbi go ti ala oko, ala dekongo (8)

    • A lingbi azo so ayô akungba ti da ti Jéhovah aga sioni ape (11)

  • Jéhovah ayeke yâa wakua ti lo na nduzu (13-15)

    • Lê ti wakua ti Jéhovah abuba ngangu (14)

52  Sion,+ mo zingo! Zingo, na mo wara ngangu!+ Jérusalem, gbata so ayeke nzoni-kue, yü pendere bongo ti mo,+ ndali ti so zo so afâ ganza pëpe nga zo so aga sioni ayeke lï na yâ ti mo encore ape.+   Jérusalem, londo na yâ ti sese, pika sese na terê ti mo na mû ye mo duti dä. Molenge-wali ti Sion so a gue na mo na ngbâa, zi kamba so a kanga na go ti mo,+   ndali ti so Jéhovah atene: “Na ngoi so a kä ala lani, zo oko afuta mbeni ye pëpe ndali ti ala;+ na ngoi so a yeke zi ala, a yeke futa pëpe nginza ndali ti ala.”+   Jéhovah, Seigneur ti dunia kue, atene: “Ândö azo ti mbi ague na Égypte ti sara kodro kâ tongana awande;+ na pekoni azo ti Assyrie asara pasi na ala senge senge.”   Jéhovah atene: “Ti fadeso, a yeke nzoni mbi sara nyen? so a kiri a kä azo ti mbi na ngbâa sân ti futa mbeni nginza so?” Jéhovah akiri atene: “Azo so akomande na ndö ti ala ayeke dekongo na ngia ndali ti so ala sö benda.+ Lakue na yâ ti lango ni kue, azo ayeke ne iri ti mbi pëpe.+   Ndani la azo ti mbi ayeke hinga iri ti mbi;+ ndani la, na lango ni so, ala yeke hinga so mbi la mbi yeke sara tënë. Ala bâ, a yeke mbi la!”   Gere ti zo so atambela na ndö ti ahoto ti ga na nzoni tënë ayeke tâ pendere mingi!+ Lo yeke fa tënë ti siriri,+ lo yeke ga na nzoni tënë ti mbeni ye so ayeke nzoni mingi so ayeke ga ande, lo yeke fa tënë ti salut nga lo yeke tene na Sion: “Nzapa ti mo aga Gbia awe!”+   Mä si! Asinziri ti mo ayô go ti ala na dekongo. Ala bungbi go ti ala oko ala yeke dekongo na ngia, ndali ti so na ngoi so Jéhovah abungbi azo ti Sion ti kiri na ala, ala yeke bâ ni polele.*   Agbagbara da ti Jérusalem,+ ala duti na ngia, ala bungbi go ti ala oko ti dekongo na ngia, ndali ti so Jéhovah adë bê ti azo ti lo;+ lo zi Jérusalem.+ 10  Jéhovah afa maboko ti lo so ayeke nzoni-kue si amara kue abâ ni;+ andangoro ti sese kue ayeke bâ aye so Nzapa ti e asara ti mû salut na e.*+ 11  Ala azo so ayeke yô akungba ti da ti Jéhovah,+ ala bi lê ti ala yongoro, ala sigi na ndo so,+ ala ndu pëpe mbeni ye so aga sioni awe,+ ala sigi na ndo so,+ ala bata terê ti ala si ala ga sioni pëpe. 12  Mbeto ayeke sara pëpe si ala hon kirikiri, nga ala yeke na bezoin ti kpe pëpe, ndali ti so Jéhovah la ayeke tambela na devant ti ala,+ nga Nzapa ti Israël la ayeke tambela na mbage ti peko ti ala ti bata ala.+ 13  Wakua ti mbi+ ayeke sara ye na ndara. A yeke yâa lo na nduzu; a yeke mû na lo kota ndo nga a yâa lo na nduzu mingi.+ 14  Azo mingi angbâ ti bâ lo, na li ti ala akpe kue ndali ti so na bango lo, lê ti lo abuba ngangu, ade ti bâ mbeni zo so lê ti lo abuba tongaso pëpe; lê ti lo achangé ngangu ahon ti tanga ti azo kue. 15  Legeoko nga, na bango lo, li ti amara mingi ayeke kpe kue.+ Agbia ayeke kanga yanga ti ala* na gbele lo,+ ndali ti so ala yeke bâ mbeni ye so ade a sara tënë ni na ala pëpe nga ala yeke gbu li na ndö ti mbeni ye so ade ala mä tënë ni pëpe.+

Kete tënë

Wala “ala yeke bâ mba lê na lê.”
Wala “ti sö benda.”
Wala “ayeke ga buburu.”