Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 5:1-30

LI TI ATËNË NI

  • Bia na ndö ti yaka ti vigne ti Jéhovah (1-7)

  • Mawa na yaka ti Jéhovah (8-24)

  • Ngonzo ti Nzapa na terê ti azo ti lo (25-30)

5  Mbi ye ti he bia na zo so mbi ye lo mingi, tënë ti bia ni ayeke na ndö ti zo so mbi ye lo mingi nga na yaka ti vigne ti lo.+ Zo so mbi ye lo mingi ayeke na yaka ti vigne na ndö ti mbeni kete hoto so sese ni awoko pendere.   Lo tourné sese ni, lo zi atênë na yâ ni. Lo lu pendere bengba vigne dä, lo leke mbeni tour na milieu ti yaka ni nga lo zi dû ti sarango na vin na yâ ni.+ Na pekoni, lo ku ti tene vigne ni alë, me a lë gï alê ti vigne ti ngonda.+   “Fadeso, ala azo ti Jérusalem na ti Juda, ala fâ yâ ti ngbanga so na popo ti mbi na yaka ti vigne ti mbi.+   Nyen la mbi de mbi sara pëpe so a yeke nzoni mbi sara ni ndali ti yaka ti vigne ti mbi?+ Mbi yeke ku fade ti tene a lë pendere lê ti vigne, me ngbanga ti nyen a lë gï lê ti vigne ti ngonda?   Mbi yeke fa na ala ye so mbi yeke sara ande na yaka ti vigne ti mbi ni: Mbi yeke zi gbagba ti akeke ti sisi so angoro ni, na mbi yeke gbi ni.+ Mbi yeke kungbi gbagba ti atênë so angoro ni si a dö yâ ti yaka ni.   Mbi yeke sara si a ga gï mbeni senge ndo;+ a yeke dë asenge maboko ti keke ni pëpe nga a yeke fâ asaleté na gbe ni pëpe. Akeke ti sisi nga na apere ayeke mû ni kue,+ nga mbi yeke mû yanga na lê ti nduzu ti tene ngu-nzapa apika na ndö ni pëpe.+   Azo ti Israël la ayeke yaka ti vigne ti Jéhovah ti aturugu.+ Azo ti Juda la ayeke yaka ti vigne so lo ye ni mingi. Lo ku ti tene ala sara ye mbilimbili,+ me ala sara gï ye ti kirikiri. Lo ku ti tene ala sara ye na lege ni, me azo ayeke dema na vundu.”+   Mawa na azo so angbâ ti wara ada ngbii ada ni atingbi terê+ nga so angbâ ti wara ayaka ngbii ayaka ni atingbi terê+ na mbeni ndo so angbâ senge ayeke dä pëpe, si ala duti gï ala oko na yâ ti kodro ni.   Na mê ti mbi, Jéhovah ti aturugu adeba atene gbâ ti akota pendere da ayeke ga ande ye so amû mbeto na zo, nga zo ayeke lango na yâ ni pëpe.+ 10  Na yâ ti hectare osio* ti yaka ti vigne, zo ayeke wara gï bath* oko ti vin, nga tongana a mû ngongoa ti kobe na yâ ti kungba so alingbi homer* oko si a lu ni, a yeke wara lengo ni na yâ ti kungba so alingbi gï épha* oko.+ 11  Mawa na azo so alondo na kota ndapre ti nyon sämba,+ ala so angbâ ti nyon ngbii ndo avuko si vin ni asara si ala sara ye kirikiri! 12  Na ngoi ti amatanga ti ala, ala yeke pika harpe nga na ambeni ye ti mozoko so ayeke na kamba, ala yeke pika tambourin, ala yeke hûru flûte nga ala yeke nyon vin; me ala gbu li pëpe na ndö ti akua so Jéhovah asara nga ala bâ pëpe akua ti maboko ti lo. 13  Ndani la, a yeke gbu azo ti mbi ti gue na ala na kodro-wande ngbanga ti so hingango ndo amanke ala.+ Nzara ti kobe ayeke hon ndö ti azo ti ala so a ne ala mingi,+ nga nzara ti ngu ayeke hon ndö ti tanga ti azo ni kue. 14  Dû ti kuâ* aga gï kota* nga lo ngbâ gï ti zi yanga ti lo kota.+ Akota zo ti gbata ni, gbâ ti asenge zo so go ti ala ahon ndö ni nga na azo so viva ti ala ahon ndö ni ayeke gue ande na yâ ti dû ti kuâ ni. 15  Zo ayeke ba ande li ti lo na sese, kamene ayeke hon ndö ti lo, nga kamene ayeke gbu lê ti zo ti fandara. 16  Azo ayeke yâa iri ti Jéhovah ti aturugu ndali ti ngbanga so lo fâ.* Tâ Nzapa, Nzapa so ayeke nzoni-kue,+ ayeke sara si azo ahinga so lo yeke nzoni-kue na lege ti mbilimbili ti lo.+ 17  Akete taba ayeke te pere na ndo ni so tongana ti so ala yeke sara ka na ndo ti tengo pere ti ala. Ando so abuba, so kozo anyama so akono nzoni la ate pere dä so, awande la ayeke te ande ye dä. 18  Mawa na azo so ayeke gboto siokpari ti ala na peko ti ala na lege ti akusala ti mvene, nga ala yeke gboto siokpari ti ala tongana ti so nyama ayeke gboto puse so a kanga kamba na terê ni. 19  Mawa nga na azo so atene: “Zia Nzapa asara kua ti lo ni hio. Zia ye ni aga hio si e bâ ni. Zia si ye so Nzapa ti Israël so ayeke nzoni-kue aye ti sara* so asi tongaso si e hinga ni.”+ 20  Mawa na azo so atene nzoni ye ayeke sioni nga sioni ye ayeke nzoni,+ azo so azia bingo na place ti lumière nga lumière na place ti bingo, azo so atene ye so ase anzere nga ye so anzere ase! 21  Mawa na azo so abâ terê ti ala tongana azo ti ndara nga tongana azo so lê ti ala ahan mingi!+ 22  Mawa na azo so amû ngangu ti ala gï ti nyon na vin, azo so ayeke awa ti sarango asämba so ason,+ 23  azo so ayeke zi tënë na li ti azo ti sioni tongana a pete goro na ala+ nga na azo so ake ti mû raison na azo ti mbilimbili na gbele ngbanga.+ 24  Ndani la, gï tongana ti so wâ ayeke gbi hulengo saleté so angbâ na lê ti yaka nga hulengo pere ayeke ga mburu ti wâ tongana wâ agbi ni, azo ni so ayeke ga tongana agunda ti pere so afun na yâ ti sese. Nga tongana ti so pupu ayeke hon na fuku ti sese, lengo ti ala ayeke hon kirikiri. Ye ni ayeke si tongaso ndali ti so ala ke ndia* ti Jéhovah ti aturugu nga ala bâ tënë ti Nzapa ti Israël so ayeke nzoni-kue tongana mbumbuse ye.+ 25  Ndani la, ngonzo agbu Jéhovah ngangu mingi na terê ti azo ti lo, na lo yeke yôro ande maboko ti lo ti sara sioni na ala nga lo yeke pika ala.+ Ahoto ayeke yengi ande, nga kuâ ti azo ni ayeke duti ande tongana saleté na ndö ti alege.+ Ndali ti asioni ye kue so azo ni asara, ade ngonzo ti lo adë pëpe, na maboko ti lo ayeke lakue nduru ti pika ala. 26  Lo kpo mbeni yongoro keke na nduzu si azo ti mbeni mara so ayeke na yongoro ndo abâ ni, na ala bungbi kâ.+ Lo hûru yanga ti lo na ala ti tene ala londo na nda ti sese kue ala ga.+ Bâ! Ala yeke mû loro ti ga.+ 27  Mbeni zo na popo ti ala afatigué pëpe nga lo pika gere ti lo pëpe. Lango asara mbeni zo pëpe nga zo oko alango pëpe. Ceinture so ala kanga na ndö ti yâ ti ala awoko pëpe, nga kamba ti poro ti ala afâ pëpe.  28  Yanga ti alê ti kokora ti ala kue aza, ala kue agboto kamba ti kokora ti ala.* Gere ti ambarata ti ala akpengba tongana ngangu tênë, na agere ti apuse ti mbarata ti ala ayeke tourné tongana pupu ti ngu-nzapa.+ 29  Toto ti azo ni ayeke tongana toto ti bamara; ala toto tongana abamara so akono awe.*+ Ala yeke suku tongana bamara, ala gbu ye tongana bamara so agbu ye ti tengo ni, ala hon na ni, na mbeni zo ti zi ni na maboko ti ala ayeke dä pëpe. 30  Na lango ni so, ala yeke suku na ndö ti ye so ala gbu; toto ti sukungo ti ala ayeke tongana toto ti ngu-ingo.+ Zo kue so lê ti lo ayeke gï na terê ti kodro ni ti bâ ni ayeke bâ bingo so asara si zo agi bê; même lumière aga bingo ndali ti ambinda so amû ndo ni.+

Kete tënë

Na Hébreu: “empan bale-oko.”
Bâ na B14.
Bâ na B14.
Bâ na B14.
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “Dû ti kuâ aye ti wara gbâ ti azo.”
Wala “fango ngbanga ti mbilimbili.”
Wala “desizion so Nzapa ti Israël amû; ye so Nzapa ti Israël amû wango ti sara.”
Wala “fango ye.”
Wala “ala yeke nduru ti pika kokora.”
Wala “akoli-bamara so akono awe.”