Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 49:1-26

LI TI ATËNË NI

  • Kua so Jéhovah amû na wakua ti lo ti sara (1-12)

    • Lumière ti amara (6)

  • Tënë ti dengo bê ndali ti Israël (13-26)

49  Ala azoa, ala mä mbi. Ala amara so ayeke na yongoro ndo, ala dengi mê ala mä mbi.+ Jéhovah airi mbi lani kozoni si a dü mbi.+ Ngbene ye so mbi ngbâ na yâ ti mama ti mbi, lo di iri ti mbi.   Lo sara si yanga ti mbi aduti tongana épée so yanga ni aza; lo honde mbi na gbe ti dê ti maboko ti lo.+ Lo sara si mbi ga tongana lê ti kokora so a kpaka yanga ni nzoni; lo honde mbi na yâ ti bozo ti kokora ti lo.   Lo tene na mbi: “Israël, mo yeke wakua ti mbi;+ na lege ti mo, mbi yeke sara si a bâ gloire ti mbi.”+   Me mbi tene: “Mbi sara kua ngangu gï senge senge. Mbi mû ngangu ti mbi gï senge senge ti sara ye so ayeke nga tâ ye pëpe. Me ti tâ tënë ni, Jéhovah la ayeke Juge ti mbi,* nga Nzapa la ayeke futa mbi.”+   Fadeso Jéhovah, Lo so aleke mbi ngbene ye so mbi yeke na yâ ti mama ti mbi ti duti wakua ti lo, atene na mbi ti mû Jacob ti kiri na ni na mbage ti lo, si azo ti Israël abungbi na terê ti lo.+ Jéhovah ayeke bâ mbi tongana zo so alingbi na gloire, na mbi yeke wara ande ngangu na mbage ti Nzapa ti mbi.   Lo tene: “Mo yeke wakua ti mbi so mbi mû mo gï ti yâa amara ti Jacob na nduzu pëpe nga gï ti kiri pëpe na tanga ti azo ti Israël so angbâ. Mbi mû mo nga ti duti tongana lumière ti amara,+ tongaso si salut so mbi mû asi juska na anda ti sese.”+   Jéhovah, Zo so afuta ye ti zi mo, Nzapa ti Israël so ayeke nzoni-kue,+ asara tënë na zo so azo azere lo,+ lo so amara ake lo bê oko* nga so lo yeke zo ti kua ti azo so akomande. Lo tene na lo, lo tene: “Agbia ayeke bâ mbeni ye, na ala yeke londo, amokonzi ayeke kuku na sese ti ne Jéhovah, so ayeke be-ta-zo,+ Nzapa ti Israël so ayeke nzoni-kue, lo so asoro mo.”+   Jéhovah atene: “Na mbeni ngoi ti sarango nzoni bê* na zo, mbi kiri tënë na mo lani,+ nga na mbeni lango ti salut, mbi mû lani maboko na mo.+ Mbi ngbâ lani ti bata mo ti tene mo ga tongana mbele ndali ti azo,+ ti tene mo sara si kodro ni akiri aga nzoni, nga ti sara si azo akiri asara kodro na ando ti ala so abuba.+   Mbi tokua mo nga ti tene mo tene na azo ti kanga: ‘Ala sigi!’+ Nga ti tene mo tene na azo so ayeke na yâ ti bingo:+ ‘Ala fa terê ti ala na gigi!’ Ala yeke wara ye ti tengo ni na terê ti alege, nga akete lege kue so azo ayeke hon dä mingi* ayeke ga ando ti tengo pere ti ala. 10  Nzara ti kobe na nzara ti ngu ayeke sara ala pëpe.+ Lâ ayeke su ala ngangu pëpe nga ngangu ndowa ayeke sara ala pëpe,+ ndali ti so Zo so asara nzoni bê na zo ayeke fa lege na ala,+ na lo yeke gue na ala na terê ti ali ti ngu.+ 11  Mbi yeke sara si ahoto ti mbi kue aga alege, nga akota lege ti mbi ayeke duti na nduzu.+ 12  Bâ, azo so alondo na ayongoro ndo si ayeke ga.+ Bâ, azo alondo na mbage ti nord nga na mbage ti ouest ayeke ga; azo alondo nga na kodro ti Sinim ayeke ga.”+ 13  Mo yayu, mo dekongo na ngia; nga sese, mo sara ngia.+ Zia ahoto so ayeke na ngia adekongo na ngia,+ ndali ti so Jéhovah adë bê ti azo ti lo,+ na lo sara nzoni bê na azo ti lo so abâ pasi.+ 14  Me Sion angbâ lani ti tene: “Jéhovah adö mbi azia awe,+ Jéhovah agirisa na ndö ti mbi awe.”+ 15  Eskê mbeni wali alingbi ti girisa molenge ti lo so lo yeke mû me na lo? Mbeni wali alingbi ti ke ti bâ mawa ti molenge ti yâ ti lo? Même tongana awali so agirisa amolenge ti ala, mbi yeke girisa mo lâ oko pëpe.+ 16  Bâ, mbi kpaka iri ti mo na yâ ti maboko ti mbi. Agbagba ti mo ayeke lakue na gbele mbi. 17  Amolenge ti mo ayeke kiri na mbage ti mo na loro. Azo so akungbi agbagba ti mo na sese nga afuti mo ayeke zia mo ti hon. 18  Yô lê ti mo, mo bâ ndo na terê ti mo kue. Ala kue ayeke bungbi ndo oko.+ Ala yeke ga na mbage ti mo. Jéhovah atene: “Mbi so mbi yeke na fini, mbi deba yanga, mbi tene mo yeke mû ala kue na terê ti mo tongana bongo so zo ayeke yü so aye ti pendere ayeke na terê ni. Nga mo yeke kanga ala na terê ti mo tongana ye ti pendere so wali so aye ti sara mariage ayeke kanga na terê ti lo.  19  Atâa so a futi ando ti mo, ando ni angbâ gï senge nga aga gï agbagbara ndo,+ a yeke ga ande kete mingi ndali ti azo so asara kodro dä,+ nga azo so amene ala+ ayeke duti na ando so ayo.+ 20  Amolenge so a dü ala na ngoi so mo sara mua ayeke tene ande na mê ti mo, atene: ‘Ndo so ayeke kete mingi, a lingbi e pëpe. Sara si e wara mbeni ndo si e ngbâ ti sara kodro ge.’+ 21  Mo yeke tene ande na bê ti mo, mo tene: ‘Zo wa la ayeke babâ ti amolenge ni so a mû ala na mbi so? Mbi yeke wali so amolenge ti lo akui awe nga mbi yeke ngombo, a gue na mbi na kodro-wande nga mbi yeke zo ti kanga. Zo wa la abata ala zo wa?+ So gï mbi oko la mbi ngbâ lani so,+ amolenge ni so alondo na ndo wa la aga so?’”+ 22  Jéhovah, Seigneur ti dunia kue, atene: “Bâ, mbi yeke yô maboko ti mbi na nduzu si amara abâ ni, nga mbi yeke kpo yongoro keke na nduzu si azo nde nde abâ ni.+ Ala yeke mû ande amolenge ti mo na maboko* ti ala si ala ga na ala, nga ala yeke yô amolenge ti mo ti wali na ndö ti go ti ala si ala ga na ala.+ 23  Agbia ayeke bâ ande lege ti mo,+ nga amolenge ti agbia ni ti wali ayeke bata ande amolenge ti mo. Ala yeke kuku, ala kpo li ti ala na sese na gbele mo+ nga ala yeke su sese ti gere ti mo,+ na mo yeke hinga so mbi Jéhovah la. Azo so azia bê ti ala ti ku mbi, kamene ayeke sara ala pëpe.”+ 24  Azo so mbeni zo ti ngangu agbu ala awe, mbeni zo alingbi ti zi ala? Nga azo so mbeni zo so akomande na ngangu amû ala na ngbâa, mbeni zo alingbi ti zi ala na maboko ti lo? 25  Me Jéhovah atene: “Même azo so mbeni zo ti ngangu agbu ala na ngbâa, mbi yeke zi ala,+ azo so mbeni zo so akomande na ngangu amû ala na ngbâa, mbi yeke zi ala.+ Mbi yeke kanga lege na azo so agi ti kanga lege na mo,+ nga mbi yeke sö ande amolenge ti mo. 26  Mbi yeke sara si azo so asara pasi lani na mo ate nyama ti terê ti ala wani, nga ala yeke nyon mênë ti ala wani, tongana ti zo so ayeke nyon fini vin. Azo kue* ayeke hinga ande so mbi Jéhovah la,+ Sauveur ti mo+ nga Zo so afuta ye ti zi mo,+ Nzapa ti Jacob so ayeke ngangu mingi.”+

Kete tënë

Wala “Jéhovah la ayeke fâ ngbanga ti mbi.”
Wala “ake âme ti lo bê oko.”
Wala “sarango nzoni.”
A lingbi nga ti tene “akete hoto so ndö ni ayeke senge senge.”
Na Hébreu: “kate.”
Na Hébreu: “Mitele kue.”