Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 48:1-22

LI TI ATËNË NI

  • A suku na Israël nga a sara si lo kiri lo ga nzoni (1-11)

  • Jéhovah ayeke londo na terê ti Babylone (12-16a)

  • Fango ye ti Nzapa asara nzoni na zo (16b-19)

  • “Ala sigi na kodro ti Babylone!” (20-22)

48  Ala mä tënë so, ala ahale ti Jacob, ala so atene iri ti Israël ayeke na ndö ti ala+ nga ala so ayeke ahale ti Juda, ala so adeba na iri ti Jéhovah+ nga ala iri ndo na Nzapa ti Israël, atâa so ala sara ni na lege ti tâ tënë pëpe nga na lege ti mbilimbili pëpe.+   Ala tene so ala yeke sara kodro na yâ ti gbata so ayeke nzoni-kue,+ nga ala gi ti tene Nzapa ti Israël amû maboko na ala,+ lo so iri ti lo ayeke Jéhovah ti aturugu.   “Ândö giriri la mbi tene na ala tënë ti angbene* ye kozo ti tene aye ni asi. Tënë ni asigi na yanga ti mbi na mbi sara si azo ahinga ni.+ Gï hio tongaso mbi sara ye, na aye ni abâ gigi.+   Mbi hinga so li ti ala akpengba, so ti tene kamba ti go ti ala akpengba tongana wen nga ndö ti lê ti ala akpengba tongana cuivre,+   ni la mbi sara tënë ni na ala ândö giriri. Kozo ti tene ye ni asi, mbi sara si ala mä tënë ni, tongaso si ala lingbi pëpe ti tene: ‘Ayanda ti e la asara ye so; astatue ti e so a leke na kode nga na astatue ti e ti wen* la amû yanga ti tene ye ni asi.’   Ala mä tënë ti aye so kue nga ala bâ ni na lê ti ala. Ala yeke sara tënë ni ape?+ Ti londo laso ti gue na ni, mbi yeke fa na ala afini ye,+ aye ti secret so mbi honde ni, si ala hinga ni pëpe.   A yeke gï fadeso la mbi sara si aye so abâ gigi, me ândö giriri pëpe. Ala mä tënë ti aye so kozo na lango ti laso pëpe, tongaso si ala lingbi pëpe ti tene: ‘E hinga ni awe.’   Mvene! Ade ala mä tënë ni pëpe,+ ala hinga ni pëpe. Ândö ala kanga mê ti ala. Mbi hinga so ala yeke sara ye na handa mingi,+ nga ngbene ye so a dü ala, a hinga ala tongana azo ti kengo ndia.+   Me ndali ti iri ti mbi, mbi yeke sara si ngonzo ti mbi asungba pëpe.+ Mbi yeke kanga bê ti mbi na ala ndali ti atënë ti gonda so a yeke gonda na mbi, nga mbi yeke futi ala pëpe.+ 10  Mbi zi saleté na terê ti ala si ala ga nzoni, me mbi sara ni pëpe tongana ti so a yeke sara na argent.+ Mbi zia si ala bâ pasi si mbi hinga ye so ayeke na bê ti ala,* tongana ti so a yeke kporo wen na yâ ti four ti tene aga ngu.+ 11  Ti tâ tënë ni, ndali ti iri ti mbi, mbi yeke sara ye.+ Mbi yeke zia si a buba iri ti mbi ni tongana nyen?+ Mbi yeke mû gloire ti mbi na mbeni zo pëpe.* 12  Mo Jacob, nga mo Israël so mbi iri mo, ala mä mbi. Mbi ngbâ gï mbi.+ Mbi yeke kozoni nga mbi yeke ndangba ni.+ 13  Mbi leke gere ti sese na maboko ti mbi wani,+ nga mbi gbara yâ ti yayu na maboko ti mbi ti koli.+ Na ngoi so mbi iri ala, ala londo aluti legeoko.  14  Ala azo ti mbi kue, ala bungbi ndo oko ala mä tënë so. Zo so mbi, Jéhovah, mbi ye lo mingi+ ayeke sara ye so anzere na mbi ti sara na terê ti Babylone,+ nga maboko ti lo ayeke ga na terê ti azo ti Chaldée.+ Zo wa na popo ti anzapa* asara tënë ti aye so kozoni? 15  Mbi wani la mbi sara tënë ni, nga mbi iri lo.+ Mbi yeke sara si lo ga, nga aye so lo ye ti sara ayeke ga nzoni.+ 16  Ala pusu nduru na mbi, ala mä tënë so. Tâ gï na tongo nda ni, mbi sara tënë na hondengo ni pëpe.+ Na ngoi so ye ni asi, mbi yeke lani dä.” Fadeso Jéhovah, Seigneur ti dunia kue, atokua mbi, yingo ti lo nga kue.* 17  Jéhovah, Lo so afuta ye ti zi mo, Nzapa ti Israël so ayeke nzoni-kue,+ atene: “Mbi Jéhovah, mbi yeke Nzapa ti mo. Mbi la mbi yeke fa ye na mo ti tene mo bâ nzoni dä.*+ Mbi la mbi yeke fa na mo lege so a yeke nzoni mo mû ni.+ 18  Tongana fade mo dengi mê na acommandement ti mbi,+ ka siriri ti mo ayeke ga tongana kota ngu,+ mbilimbili ti mo ayeke duti tongana amapo ti ngu-ingo+ 19  nga ahale* ti mo ayeke ga gbani gbani tongana mbutu na ala yeke ga gbani gbani tongana alê ti mbutu.+ A yeke zi iri ti ala wala a futi ni lâ oko pëpe na gbele mbi.” 20  Ala sigi na kodro ti Babylone!+ Ala kpe na yâ ti maboko ti azo ti Chaldée! Ala dekongo na ngia ti sara tënë ni! Ala fa tënë ni!+ Ala to mbela na tënë ni juska na ndangoro ti sese kue.+ Ala tene: “Jéhovah afuta ye ti zi wakua ti lo Jacob.+ 21  Na ngoi so lo hon na azo ti lo na yâ ti abenyama, nzara ti ngu agbu ala pëpe.+ Lo sara si ngu asigi na yâ ti kota tênë ti tene ala nyon. Lo suru yâ ti tênë, na ngu asigi dä gbani gbani.”+ 22  Jéhovah atene: “Azo ti sioni ayeke na siriri pëpe.”+

Kete tënë

Na Hébreu: “akozo.”
Wala “astatue so a tö wen aga ngu si a leke na ni.”
Wala “mbi gi ti bâ ala nzoni.” A lingbi nga ti tene “mbi soro ala.”
Wala “Mbi yeke kangbi gloire ti mbi na mbeni zo pëpe.”
Na Hébreu: “ala.”
Wala “legeoko na yingo ti lo.”
Wala “ndali ti nzoni ti mo.”
Na Hébreu: “ngongoa.”