Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 45:1-25

LI TI ATËNË NI

  • Nzapa asoro Cyrus ti kinda Babylone (1-8)

  • Popoto ti sarango na ta ake ti woko terê na gbe ti lo so ayeke leke lo (9-13)

  • Amara ayeke hinga so Israël ayeke mara ti Nzapa (14-17)

  • Nzapa oko la apeut ti leke ye kue nga ti fa ye so ayeke si (18-25)

    • Nzapa aleke sese ti tene zo aduti na ndö ni (18)

45  Bâ tënë so Jéhovah atene na lo so lo soro lo, na Cyrus,+ lo so Lo gbu maboko ti lo ti koli+ si lo sö benda na ndö ti amara so ayeke na gbele lo,+ si lo zi aye ti bira na maboko ti* agbia nga si lo zi aporte so lê ni ayeke use, tongaso si ayanga ti gbagba ni akanga pëpe, lo tene:   “Mbi yeke hon na devant ti mo,+ na mbi yeke sara si akete hoto aga akpangbala ndo. Aporte so a sara na cuivre, mbi yeke kungbi yâ ni kete kete, nga abarre so a sara na wen, mbi yeke fâ yâ ni.+   Mbi yeke mû na mo amosoro so a zia na yâ ti vukongo ndo, nga na amosoro so a honde ni na ando so a lingbi zo agi ni gingo,+ si mo hinga so mbi yeke Jéhovah, Nzapa ti Israël, so ayeke iri mo na iri so a zia na ndö ti mo.+   A yeke ndali ti wakua ti mbi Jacob nga na Israël so mbi soro lo la mbi yeke iri mo na iri so a zia na ndö ti mo. Mbi yeke mû na mo iri so azo ane ni mingi, atâa so mo hinga mbi pëpe.   Mbi yeke Jéhovah, mbeni Nzapa nde na mbi ayeke dä pëpe. Gï mbi oko la mbi yeke Nzapa.+ Mbi yeke mû ngangu na* mo, atâa so mo hinga mbi pëpe,   si ti londo na mbage so lâ asigi dä ti si na mbage so lâ alinda dä,* azo ahinga so gï mbi oko la mbi yeke Nzapa.+ Mbi yeke Jéhovah, mbeni Nzapa nde na mbi ayeke dä pëpe.+   Mbi la mbi sara lumière+ nga mbi créé bingo;+ mbi la mbi sara si siriri amû ndo+ nga mbi ga na ye ti ngangu.+ Mbi Jéhovah, mbi la mbi sara aye so kue.   Mo yayu, mo zia si sarango ye mbilimbili alondo na mo kâ atuku tongana ngu-nzapa.+ Zia si sarango ye mbilimbili aga gbani na ndö ti sese tongana ngu-nzapa so apika ngangu. Zia si sese amû lege na salut ti sigi ti mû ndo nga ti sara si sarango ye mbilimbili asigi amû ndo.+ Mbi Jéhovah, mbi sara si ye ni asi tongaso.”   Mawa na zo so atiri* na Zo so asara lo,* ndali ti so lo yeke gï tongana mbeni nduru mbage ti ta so yâ ni afâ kete kete si a zia ni angbâ na sese. Eskê popoto ti sarango na ta alingbi ti hunda Zo ti lekengo* ta, atene: “Nyen la mo yeke leke so?”+ Wala ta so lo leke awe alingbi ti tene: “Maboko ti zo ti sarango mbi ayeke dä ape”?* 10  Mawa na zo so atene na mbeni babâ, atene: “Mara ti molenge ti nyen la mo dü so?” Nga lo tene na mbeni wali, lo tene: “Nyen la mo yeke dü so?”* 11  Jéhovah, Nzapa ti Israël so ayeke nzoni-kue,+ Nzapa so aleke Israël, atene: “Zo akpa ti dë kite na mbi na ndö ti aye so mbi leke ti tene asi ande? Zo akpa ti mû yanga na mbi na ndö ti amolenge ti mbi ti koli+ nga na akusala ti maboko ti mbi? 12  Mbi sara sese+ nga mbi créé zo na ndö ni.+ Mbi gbara yâ ti yayu na maboko ti mbi wani,+ na mbi mû yanga na atongoro nga na aye kue so ayeke kâ.”+ 13  Jéhovah ti aturugu atene: “Mbi yâa mbeni zo na nduzu ndali ti so mbi yeke mbilimbili.+ Mbi yeke sara ande si alege kue so lo mû aduti droit. Lo la lo yeke leke gbata ti mbi+ nga sân ti futa mbeni ye wala ti pete goro,+ lo yeke zi azo ti mbi+ so a mû ala a gue na ala na mbeni kodro nde.” 14  Jéhovah atene: “Mosoro* ti Égypte, akungba* ti Éthiopie nga na azo ti Saba, ayongoro zo, ayeke ga ande na mbage ti mo, na ala yeke ga ti mo. Ala yeke tambela na peko ti mo na yâ ti achaîne. Ala yeke ga na mbage ti mo, na ala yeke kuku na gbe ti mo.+ Ala yeke sara tënë ti mo na yâ ti sambela, atene: ‘Ti tâ tënë ni, Nzapa ayeke na mo;+ mbeni Nzapa nde ayeke dä pëpe, mbeni nde ayeke ti lo dä pëpe.’” 15  Ti tâ tënë ni, mo Nzapa ti Israël so mo yeke Sauveur, mo yeke mbeni Nzapa so ayeke fa lakue pëpe na azo ye so mo leke ti sara.+ 16  Kota kamene ayeke hon ndö ti azo kue so ayeke sara ayanda, ala kue ayeke hon ande na kamene na lê ti ala.+ 17  Me salut so Jéhovah ayeke mû na Israël ayeke ti kpu na kpu.+ A yeke zia ande kamene na lê ti Israël teti lakue lakue pëpe.+ 18  Jéhovah ayeke Nzapa so asara yayu,+ lo yeke tâ Nzapa. Lo la lo leke sese, lo la lo sara ni nga lo sara ni si a luti nzoni.+ Lo leke ni ti tene angbâ gï senge pëpe,* me lo leke ni ti tene azo aduti dä.+ Lo tene: “Mbi yeke Jéhovah, na mbeni Nzapa nde ayeke dä pëpe. 19  Mbi honde terê ti mbi pëpe na mbeni ndo,+ mbeni ndo so ayeke na yâ ti vukongo ndo, si mbi sara tënë. Mbi tene pëpe na ahale* ti Jacob: ‘Ala yeke gi mbi, me ala yeke gi mbi gbä.’* Mbi yeke Jéhovah so tënë ti yanga ti mbi ayeke mbilimbili, nga ye so mbi fa ayeke na lege ni.+ 20  Ala bungbi terê ti ala, ala ga. Ala kue ala pusu nduru ge, ala so akpe na maboko ti amara.+ Azo so ayeke yô astatue so a leke na kode nga asambela mbeni nzapa so alingbi ti sö ala pëpe, ala hinga ndo pëpe.+ 21  Ala fa atënë ti ala so afa so ala yeke na raison, ala fa tënë ti ala ni. Zia ala kue abungbi oko ala pika patara. Ngbene ye giriri, zo wa la asara tënë ti aye so ayeke si so? Ngbene ye ândö, zo wa la afa tënë ni? A yeke mbi Jéhovah ape? Mbeni Nzapa nde ayeke dä pëpe, gï mbi oko. Mbi yeke Nzapa ti mbilimbili nga Sauveur,+ mbeni nde ayeke dä pëpe.+ 22  Azo ti andangoro ti sese kue, ala tourné na mbage ti mbi na mbi yeke sö ala,+ ndali ti so mbi yeke Nzapa, mbeni nde ayeke dä pëpe.+ 23  Mbi wani mbi deba yanga ti mbi. Tënë so asigi na yanga ti mbi ayeke tâ tënë, peko ni ayeke ngbâ senge pëpe:+ genou oko oko kue ayeke kuku ande na gbe ti mbi, langue oko oko kue ayeke deba yanga ti ngbâ be-ta-zo na mbi,+ 24  na ala yeke tene: ‘Ti tâ tënë ni, Jéhovah ayeke Nzapa so ayeke mbilimbili nga lo yeke na ngangu. Azo so asara ngonzo ngangu na terê ti lo ayeke ga ande na gbele lo na kamene na lê ti ala. 25  Ahale* ti Israël kue ayeke bâ so ala yeke na raison ti sara kua na Jéhovah,+ nga ala yeke pika ande kate ti ala ndali ti lo.’”

Kete tënë

Na Hébreu: “zi ceinture na gbe ti yâ ti.”
Na Hébreu: “kanga ceinture nzoni na gbe ti yâ ti.”
Wala “ti londo na mbage ti est ti si na mbage ti ouest.”
Wala “apapa.”
Wala “na Zo so aleke lo.”
Wala “Zo ti sarango.”
A lingbi nga ti tene “Wala a yeke nzoni popoto ti sarango na ta atene: ‘Ye so mo sara ayeke na amaboko ape’?”
Wala “Yâ ti mo ason ti tene mo dü nyen?”
A lingbi nga ti tene “Azo ti sarango akua ti ngangu.”
A lingbi nga ti tene “azo ti kango ye.”
A lingbi nga ti tene “si ndö ni angbâ senge pëpe.”
Na Hébreu: “ngongoa.”
Wala “gï senge senge.”
Na Hébreu: “Ngongoa.”