Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 44:1-28

LI TI ATËNË NI

  • Gbâ ti tufa na ndö ti azo ti Nzapa (1-5)

  • Mbeni nzapa ayeke dä ape, gï Jéhovah oko (6-8)

  • Ayanda so azo asara ni ayeke ye oko ape (9-20)

  • Jéhovah, Lo so afuta mbeni ye ti zi Israël (21-23)

  • Cyrus ayeke kiri ti leke Jérusalem (24-28)

44  “Fadeso, mo wakua ti mbi Jacob, nga mo Israël so mbi soro mo, mä tënë so.+   Jéhovah, so lo yeke Zo so asara mo nga Zo so aleke mo+ na so amû maboko na mo ngbene ye so mo sigi na yâ ti mama ti mo,* atene: ‘Wakua ti mbi Jacob, sara mbeto pëpe,+ nga mo Jéshurun*+ so mbi soro mo, sara mbeto pëpe,   ndali ti so mbi yeke mû ngu na zo so nzara ti ngu asara lo;*+ mbi yeke sara nga si angu asua na ndö ti kuru sese. Mbi yeke tuku yingo ti mbi na ndö ti amolenge* ti mo+ nga mbi yeke sara si ahale ti mo awara tënë nzoni.   Ala yeke sigi gbani tongana afini pere,+ nga tongana akeke ti peuplier so ayeke na terê ti angu.   Mbeni ayeke tene: “Mbi yeke ti Jéhovah.”+ Mbeni nde ayeke tene so iri ti Jacob ayeke na ndö ti lo. Mbeni nde nga ayeke sû tënë so na terê ti maboko ti lo: “Zo ti Jéhovah.” Lo yeke zia iri ti Israël na ndö ti lo wani.’   Jéhovah, so lo yeke Gbia ti Israël,+ Zo so afuta ye ti zi Israël+ nga Jéhovah ti aturugu, atene: ‘Mbi yeke kozoni nga mbi yeke ndangba ni.+ Mbeni Nzapa ayeke dä pëpe, gï mbi oko.+   Zo wa la ayeke tongana mbi zo wa?+ Zia lo dekongo, lo fa ni na gigi nga lo sara si mbi hinga so lo yeke tongana mbi.+ Ngbene ye giriri so mbi sara si azo ti Israël abâ gigi, mbi fa aye so ayeke si ande. Zia lo so lo bâ so lo yeke tongana mbi afa aye so ayeke si na yâ ti kete ngoi nga na ti so ayeke si ande.   Zia si mbeto ahon ndö ti ala pëpe, nga zia si ala woko kue na mbeto pëpe.+ Mbi fa tënë ti aye ni so na ala oko oko kue kozoni awe ape? Mbi sara tënë ni awe ape? Ala yeke atémoin ti mbi.+ Mbeni Nzapa nde na mbi ayeke dä? Ên-ën, mbeni Kota tênë nde ayeke dä pëpe;+ mbi hinga ti mbi mbeni pëpe.’”   Azo kue so aleke astatue na kode ayeke ye oko pëpe, nga aye ti ala so ala ye tënë ni mingi so ayeke mû maboko na ala pëpe.+ Ala bâ ala tongana atémoin ti ala, me ala* bâ ye oko pëpe nga ala hinga ye oko pëpe.+ Ni la kamene ayeke sara azo so aleke ala.+ 10  Zo wa la ayeke sara mbeni nzapa wala aleke mbeni statue ti wen* ti tene amû maboko na lo ape?+ 11  Kamene ayeke gbu amba ti lo kue.+ Azo so ahinga ti sara kua ti maboko nzoni ayeke gï asenge zo. Zia ala kue abungbi terê ti ala, ala luti. Kota mbeto ayeke hon ndö ti ala, nga kamene ayeke gbu lê ti ala kue. 12  Zo so ahinga ti leke aye na wen amû agbakuru ti lo ti pikango na wen so lo zia na lê ti wâ si abe. Lo pika ni na marteau ti tene a kpa image ti mbeni ye. Lo ngbâ ti pika ni na ngangu ti lo kue.+ Na pekoni, nzara asara lo nga ngangu ti lo ahunzi; lo nyon ngu pëpe na lo fatigué ngangu. 13  Zo so ahinga kua ti keke amû kamba, lo mû na mesure ti keke so lo ye ti sara kua na terê ni; lo mû lacraie ti bengba, lo sara na dessin ti modèle so lo ye ti dë ni so. Lo mû ciseau ti fango na keke, lo dë na ni, nga lo mû wen so yanga ni aza, lo tracé dessin so lo ye ti dë ni. Lo sara ni akpa zo,+ lo sara ni pendere tongana zo, ti tene aduti na yâ ti da.*+ 14  Mbeni zo ayeke dä so kua ti lo ayeke ti dengo akeke ti cèdre. Lo soro mbeni mara ti keke, keke ti chêne. Lo zia si keke ni akono aga kota na popo ti akeke ti gbako.+ Lo lu keke ti laurier, na ngu-nzapa apika dä si akono. 15  Na pekoni, lo mû mbage ni ti sara na wâ. Lo mû mbage ni ti sara na wâ, ti chauffé na terê ti lo; Lo mû mbeni, lo tingo na wâ na lo zö mapa dä. Lo mû mbage ni, lo sara na mbeni nzapa lo voro ni. Lo leke mbeni statue, na lo kuku na gbe ni.+ 16  Lo mû ndambo ti keke ni, lo sara na wâ; lo zö nyama dä, lo te ni, na yâ ti lo asi. Lo chauffé nga terê ti lo dä na lo tene: “A-aa! Mbi duti na terê ti wâ, na terê ti mbi achauffé!” 17  Me lo mû tanga ti keke ni, lo sara na mbeni nzapa, mbeni statue so lo leke na kode. Lo kuku na gbe ni na lo voro ni. Lo sambela ni na lo tene: “Sö mbi, ndali ti so mo yeke nzapa ti mbi.”+ 18  Zo tongaso ahinga ye oko pëpe nga lo hinga ndo pëpe,+ ndali ti so lê ti lo akanga, na lo lingbi ti bâ ndo pëpe. Ndara ayeke na yâ ti bê ti lo pëpe.  19  Zo oko ahinga ye pëpe, lo hinga ndo pëpe nga lo tene pëpe na yâ ti bê ti lo: “Mbi mû ndambo ti keke ni, mbi tingo na wâ, mbi zö mapa dä nga mbi zö nyama dä mbi te. Eskê a yeke nzoni mbi mû tanga ni ti sara na mbeni ye so ayeke sioni mingi?+ A yeke nzoni mbi mû mbeni mbage ti keke ni* so mbi voro ni?” 20  Lo zia bê ti lo na ndö ti mburu ti wâ. Bê ti lo so ahanda lo ague na lo yongoro. Lo lingbi ti sö lo wani* pëpe, nga lo tene pëpe: “Gï mbeni buba ye la mbi gbu na yâ ti maboko ti mbi ti koli so ape?” 21  “Jacob, mo dabe ti mo na aye so, na mo Israël nga kue, ndali ti so mo yeke wakua ti mbi. Mbi la mbi leke mo lani, na mo yeke wakua ti mbi.+ Israël, mbi yeke girisa mo pëpe.+ 22  Mbi yeke mbô akengo ndia ti mo, tongana ti so mbinda ahonde mbeni ye.+ Mbi yeke mbô siokpari ti mo, tongana ti so mbinda so ane ahonde mbeni ye. Kiri na mbage ti mbi, na mbi yeke futa mbeni ye ti zi mo.+ 23  Mo yayu, mo dekongo na ngia, ndali ti so Jéhovah alondo, lo sara ye! Ala ambage ti sese so ayeke na gbe ni kâ, ala dekongo tongana azo so asö benda! Ahoto, ala dekongo na ngia!+ Agbako nga na akeke kue so ayeke dä, ala dekongo na ngia, ndali ti so Jéhovah afuta mbeni ye ti zi Jacob, nga lo sara si a bâ gloire ti lo na ndö ti Israël.”+ 24  Jéhovah, lo so afuta mbeni ye ti zi mo+ nga so aleke mo ngbene ye so mo yeke na yâ ti mama ti mo, atene: “Mbi yeke Jéhovah, lo so asara ye kue. Mbi wani mbi gbara yâ ti yayu,+ nga mbi gbara yâ ti sese.+ Zo wa la ayeke lani na terê ti mbi zo wa? 25  Mbi yeke buba yâ ti afä so azo ti dikongo tënë senge senge* asara, nga mbi la mbi yeke sara si azo ti bango mbadi asara ye tongana azo ti fou.+ Mbi la mbi sara si li ti azo ti ndara aga kirikiri nga mbi sara si ye so ala hinga aga ye ti buba.+ 26  Mbi la mbi sara si ye so wakua ti mbi asara tënë ni asi, nga mbi sara si aye kue so awatokua ti mbi asara tënë ni asi.+ Mbi la mbi sara tënë ti Jérusalem, mbi tene: ‘Azo ayeke kiri ti sara kodro dä.’+ Mbi sara tënë ti agbata ti Juda, mbi tene: ‘A yeke kiri ti leke ni,+ nga mbi yeke sara si a kiri a leke agbagbara da so ayeke na yâ ni.’+ 27  Mbi la mbi tene na ngu so alï, mbi tene: ‘Mo hule, nga mbi yeke sara si akota ngu ti mo kue ahule.’+ 28  Mbi la mbi sara tënë ti Cyrus,+ mbi tene: ‘Lo yeke berger so mbi soro lo, nga lo yeke sara ye kue kue kue so bê ti mbi aye.’+ Mbi la mbi sara tënë ti Jérusalem, mbi tene: ‘A yeke kiri ti leke ni.’ Mbi sara tënë ti temple, mbi tene: ‘A yeke zia gere ti mo na sese.’”+

Kete tënë

Wala “ngbene ye so a dü mo.”
Ndani aye ti tene “Zo so ayeke mbilimbili,” a yeke mbeni iri so a mû na Israël ti gonda na lo.
Wala “na sese so ahule ngangu.”
Na Hébreu: “ngongoa.”
So ti tene astatue ni.
Wala “statue so a tö wen aga ngu si a leke na ni.”
Wala “kete da ti nzapa.”
Wala “mbage ti keke ni so ahule.”
Wala “âme ti lo.”
Wala “aprophète ti mvene.”