Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 43:1-28

LI TI ATËNË NI

  • Jéhovah akiri abungbi azo ti lo ndo oko (1-7)

  • A zia anzapa na lê ti tara (8-13)

    • “Ala yeke atémoin ti mbi” (10, 12)

  • A zi Israël na gbe ti Babylone (14-21)

  • “Zia e ga na tënë so e yeke na ni na terê ti mba na gbele ngbanga” (22-28)

43  Ti fadeso, Jéhovah, Nzapa so asara mo Jacob, lo so aleke mo Israël,+ lo tene: “Sara mbeto pëpe, ndali ti so mbi futa ye awe ti zi mo.+ Mbi iri mo na iri ti mo. Mo yeke ti mbi.   Na ngoi so mo hon na yâ ti ngu, mbi yeke duti ande na mo,+ na ngoi so mo hon na yâ ti akota ngu, ngu ni ayeke mene mo pëpe.+ Na ngoi so mo hon na yâ ti wâ, wâ ni ayeke zö mo pëpe, nga zango ti wâ ni ayeke zö mo kete pëpe.   Mbi Jéhovah, mbi yeke Nzapa ti mo, Nzapa ti Israël so ayeke nzoni-kue, mbi yeke Sauveur ti mo. Mbi mû Égypte tongana ye so a futa ti zi mo, mbi mû Éthiopie nga na Séba ti changé na mo.   Mo ga lani ye so ngere ni ayeke kota mingi na lê ti mbi;+ azo ane mo, nga mbi ye mo mingi. Ni la mbi yeke mû azo ti akodro ti changé na mo,+ nga mbi yeke mû amara na place ti fini* ti mo.   Sara mbeto pëpe, ndali ti so mbi yeke na mo.+ Mbi yeke mû ahale* ti mo na mbage ti est ti ga na ni, nga mbi yeke mû ala na mbage ti ouest ti bungbi ala ndo oko.+   Mbi yeke tene ande na nord, mbi tene: ‘Zia ala, ala kiri!’+ Nga mbi yeke tene na sud: ‘Kanga lege na ala pëpe. Mû amolenge ti mbi ti koli so ayeke na ayongoro ndo nga na amolenge ti mbi ti wali so ayeke na andangoro ti sese, mo ga na ala.+   Mû azo kue so iri ti mbi ayeke na ndö ti ala,+ ala so mbi créé ala ndali ti gloire ti mbi nga na ala so mbi leke ala nga mbi sara ala, mo ga na ala.’+   Sigi na azo so ayeke awaziba, atâa so ala yeke na lê, nga na ala so mê ti ala akanga, atâa so ala yeke na mê.+   Zia amara kue abungbi ndo oko, nga azo ti akodro nde nde abungbi terê ti ala.+ Zo wa la na popo ti ala alingbi ti fa ye so ayeke si ande? Eskê ala lingbi ti sara si e mä tënë ti akozo ye?*+ Zia ala ga na atémoin ti ala ti fa so ala yeke na raison, wala zia ala mä tënë ni na ala tene: ‘Tâ tënë la!’”+ 10  Jéhovah atene: “Ala yeke atémoin ti mbi.+ Mo yeke wakua ti mbi so mbi soro mo,+ si mo hinga mbi, mo mä na bê na mbi* nga mo hinga so mbi ngbâ gï mbi.+ Mbeni Nzapa abâ gigi kozo na mbi pëpe nga na peko ti mbi, mbeni ayeke bâ gigi pëpe.+ 11  Mbi, mbi yeke Jéhovah.+ Mbeni sauveur nde ayeke dä pëpe, gï mbi oko.”+ 12  Jéhovah atene: “Na ngoi so lani mbeni nzapa ti awande ayeke na popo ti ala pëpe,+ mbi la mbi tene tënë, mbi sö azo nga mbi sara si azo ahinga ye so mbi ye ti sara. Ni la, ala yeke atémoin ti mbi na mbi yeke Nzapa.+ 13  Nga mbi yeke ngbâ lakue gï mbi.+ Mbeni zo ti zi ye na maboko ti mbi na ngangu ayeke dä pëpe.+ Tongana mbi ye ti sara ye, zo wa la alingbi ti kanga lege na ni?”+ 14  Jéhovah, Zo so afuta ye ti zi mo,+ Nzapa ti Israël so ayeke nzoni-kue,+ atene: “Ndali ti ala, mbi yeke tokua azo na Babylone ti kungbi abarre kue ti ayanga ti gbagba ni.+ Azo ti Chaldée so ayeke na yâ ti abateau ti ala ayeke dekongo ande na vundu.+ 15  Mbi yeke Jéhovah, Nzapa ti ala so ayeke nzoni-kue,+ Nzapa so asara Israël+ nga Gbia ti ala.”+ 16  Jéhovah ayeke lo so asuru lege na yâ ti ngu-ingo nga na kete lege na yâ ti angu so asua ngangu.+ 17  Lo la lo gboto puse ti bira nga na mbarata, lo sigi na ni.+ Lo la lo gboto aturugu nga na angangu turugu, lo sigi na ala. Lo tene: “Ala yeke lango na sese, me ala yeke londo pëpe.+ Legeoko tongana ti so a yeke mingo wâ ti mèche, a yeke futi ala biani biani.” 18  “Ala dabe ti ala na angbene ye pëpe, nga ala ngbâ pëpe ti pensé na ndö ti aye so ahon awe. 19  Ala bâ, mbi yeke sara mbeni fini ye;+ même na ndembe so, ye ni akomanse ti bâ gigi awe. Ala hinga ni ape? Mbi yeke suru lege na yâ ti benyama+ nga mbi yeke sara si akota ngu asua na yâ ti désert.+ 20  Anyama ti ngonda ayeke ne ande mbi, ambo ti ngonda nga na a-autruche* kue, ndali ti so mbi yeke sara si ngu asua na yâ ti benyama,+ nga akota ngu asua na yâ ti désert, si azo ti mbi, zo ti mbi so mbi soro lo, anyon ni.+ 21  Azo ti mbi so mbi leke ala anyon ni, tongaso si ala lingbi ti sepela mbi.+ 22  Me mo Jacob, mo iri mbi pëpe,+ ndali ti so mo Israël, mo fatigué na terê ti mbi awe.+ 23  Mo ga na ataba pëpe ti mû na mbi na sandaga so a zö ni agbi kue, nga mo mû gloire na mbi na lege ti asandaga ti mo pëpe. Mbi forcé mo pëpe ti ga na matabisi na mbi, nga mbi fatigué mo pëpe na hundango mo ti zö na mbi vuru dukane.+ 24  Mo vo ngâako* na nginza ti mo na mbi pëpe, nga mo zö pëpe mafuta ti anyama so mo mû na mbi na sandaga ti dë bê ti mbi na ni.+ Me mo sara si siokpari ti mo ane na ndö ti mbi nga mbi fatigué awe na afaute ti mo.+ 25  Mbi la mbi mbô akengo ndia ti mo*+ ndali ti iri ti mbi,+ nga mbi yeke dabe ti mbi na asiokpari ti mo pëpe.+ 26  Tongana mbi girisa mbeni ye, dabe ti mbi na ni. Zia e ga na tënë so e yeke na ni na terê ti mba na gbele ngbanga. Fa tënë ti mo so afa so mo yeke na raison. 27  Kozo kotara ti mo asara siokpari, nga azo so asara tënë na iri ti mo* asara kpengba-li na mbi.+ 28  Ni la mbi yeke sara si amokonzi so ayeke na ndo so ayeke nzoni-kue aga sioni, mbi yeke sara si a futi Jacob nga mbi yeke sara si a tene atënë ti mbana na Israël.+

Kete tënë

Wala “âme.”
Na Hébreu: “ngongoa.”
Peut-être a ye ti sara tënë ti akozo ye so ayeke si ande na yâ ti ngoi so ayeke ga.
Wala “mo zia bê ti mo kue na mbi.”
Wala “anaamo,” mbeni kota ndeke.
Wala “canne à sucre,” mbeni mara ti sosongo so afun pendere.
Wala “aye so mo sara ti ke mbi.”
Peut-être a ye ti sara tënë ti azo so ayeke fa Ndia na azo.