Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 38:1-22

LI TI ATËNË NI

  • Songo terê ti Ézéchias so lo wara sava na pekoni (1-22)

    • Bia ti singila (10-20)

38  Na yâ ti angoi ni so, terê ti Ézéchias ason ngangu, na a ngbâ kete lo kui.+ Prophète Ésaïe,+ molenge ti Amos, aga atene na lo: “Jéhovah atene: ‘Fa na azo ti da ti mo aye so ala doit ti sara na peko ti mo, ndali ti so mo yeke kui. Mo yeke sava ande pëpe.’”+  Tongana Ézéchias amä tënë so, lo tourné lê ti lo na terê ti mur na lo komanse ti sambela Jéhovah,  lo tene: “Pardon, Jéhovah, mbi gbu gere ti mo. Dabe ti mo+ so mbi yeke be-ta-zo na mo, mbi sara na mo na bê ti mbi kue+ nga mbi sara ye so ayeke nzoni na lê ti mo.” Ézéchias akomanse ti toto ngangu.  Na pekoni Jéhovah atene na Ésaïe:  “Kiri mo tene na Ézéchias,+ mo tene: ‘Jéhovah Nzapa ti kotara ti mo David atene: “Mbi mä sambela ti mo ni awe.+ Mbi bâ ngu ti lê ti mo so ayuru.+ Mbi yeke zia ngu 15 na ndö ti ngu* ti mo,+  mbi yeke zi mo nga na gbata so na maboko ti gbia ti Assyrie. Mbi yeke tiri nga ti bata gbata so.+  Fä so Jéhovah ayeke sara ti fa na mo so lo Jéhovah lo yeke sara ye alingbi na tënë so lo tene ayeke so:+  Mbi yeke sara si gbe ti dê so ayeke na ndö ti escalier* ti Achaz akiri na peko escalier bale-oko.”’”+ Tongaso lo sara si gbe ti dê so ayeke na ndö ti escalier ni akiri na peko escalier bale-oko, atâa so a hon fade ndö ti a-escalier ni so awe.  Tënë so Ézéchias, gbia ti Juda, asû* na ngoi so terê ti lo ason, me na pekoni lo wara sava. 10  Mbi tene: “Atâa so mbi ngbâ ngangu, a lingbi kuâ aga amû mbi* ague na mbi na yâ ti Dû ti kuâ.* A yeke gbanzi mbi na tanga ti angu ti fini ti mbi.” 11  Mbi tene: “Mbi yeke bâ ande Jah* pëpe; mbi yeke ngbâ ande pëpe na popo ti azo so ayeke na fini ti bâ Jah.+ Mbi yeke bâ ande azo encore ape na ngoi so mbi yeke na popo ti azo so ayeke na ndo so ye oko ayeke na fini dä pëpe. 12  Ndo so mbi lango dä ayeke tongana tente ti aberger so a zi ni a hon na ni.+ Mbi roulé fini ti mbi tongana ti so zo ti kpongo bongo ayeke roulé bongo so lo hunzi ti kpo ni; lo zi mbi tongana ti so zo so ahunzi ti kpo bongo ayeke zi ni azia ni nde. Ti londo na ngoi so ndo ahan juska ngoi so ndo avuko, mo sara si fini ti mbi ague ti hunzi.+ 13  Mbi sara si bê ti mbi adë juska ndapre. Tongana ti so bamara ayeke kungbi yâ ti abio ti nyama, lo yeke kungbi yâ ti abio ti mbi kue. Ti londo na ngoi so ndo ahan juska ngoi so ndo avuko, mo sara si fini ti mbi ague ti hunzi.+ 14  Mbi ngbâ ti toto na mawa tongana hirondelle wala tongana ndeke so a iri lo grive;*+ mbi ngbâ ti toto na mawa tongana kolokoto.+ Lê ti mbi ane nengo na ngoi so mbi yeke bâ ndo na nduzu.+ Mbi tene: ‘Jéhovah, mbi yeke na yâ ti kota vundu; Mû ngangu na mbi!’*+ 15  Mbi tene ande nyen? Lo sara lani tënë ni na mbi na lo sara ye alingbi na ni. Na yâ ti tanga ti fini ti mbi kue, mbi yeke sara terê ti mbi kete* ndali ti ye ti ngangu so asi na mbi si ason bê ti mbi ngangu.* 16  Mbi tene: ‘Jéhovah, azo kue angbâ na fini na lege ti mo,* nga mo la mo zia pupu na yâ ti mbi si mbi ngbâ na fini. Mo yeke sara si mbi kiri mbi wara seni, na mo bata fini ti mbi.+ 17  Mbi duti lani na siriri pëpe, na bê ti mbi ason mingi; me so mo ndoye mbi,* mo bata mbi si mbi tï pëpe na yâ ti dû so aye so afuti ayeke dä.+ Mo bi asiokpari ti mbi kue yongoro na peko ti mo.*+ 18  Dû ti kuâ* alingbi ti mû gloire na mo pëpe,+ nga kuâ alingbi ti sepela mo pëpe.+ Azo so ague na yâ ti dû ti kuâ awe alingbi pëpe ti zia bê ti ala na ndö ti azendo ti mo.+ 19  Azo so ayeke na fini, ala la alingbi ti sepela mo, tongana ti so mbi lingbi ti sara laso. Babâ alingbi ti fa na amolenge ti lo so mo yeke be-ta-zo.+ 20  Jéhovah, sö mbi ma! Na pekoni abia so mbi sû, mbi na azo e yeke pika ni na aye ti mozoko so ayeke na kamba;+ e yeke pika ni na yâ ti gigi ti e kue na yâ ti da ti Jéhovah.’”+ 21  Na pekoni, Ésaïe atene: “Ala ga na ahulengo lê ti figue so a pete ni boule boule, ala zia na ndö ti furoncle ni tongaso si lo sava.”+ 22  Ézéchias ahunda ndo, atene: “Fä wa la ayeke fa so mbi yeke gue ande na da ti Jéhovah?”+

Kete tënë

Na Hébreu: “alango.”
Peut-être azo ayeke diko l’heure na lege ti escalier so, a lingbi na tambelango ti lâ.
Wala “Atënë so Ézéchias, gbia ti Juda, asû na kode.”
A sara tënë ti kuâ mo bâ mo tene lo yeke na yâ ti gbagba.
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
“Jah” ayeke nduru iri ti Jéhovah.
A lingbi nga ti tene “grue”, mbeni kota ndeke so gere ti lo ayo mingi.
Na Hébreu: “Ga zo so mbi zia bê ti mbi kue na lo.”
Wala “mbi yeke mû ye na tënë ti ngia pëpe.”
Wala “ye so ason âme ti mbi ngangu.”
So ti tene na lege ti atënë ti yanga ti Nzapa nga na akusala so lo sara.
Wala “âme ti mbi.”
Wala “Mo zi asiokpari ti mbi kue na lê ti mo.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.