Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 33:1-24

LI TI ATËNË NI

  • Fango ngbanga nga beku ndali ti azo ti mbilimbili (1-24)

    • Jéhovah ayeke Juge, Zo ti lungo andia nga Gbia (22)

    • Zo oko ayeke tene ande ape: “Terê ti mbi ason” (24)

33  Mawa na mo so mo yeke futi ye, me so ade a futi mo pëpe!+ Mawa na mo so mo yeke kä zo, me so ade a kä mo pëpe! Tongana mo hunzi ti futi ye awe, a yeke futi mo ande.+ Tongana mo hunzi ti kä zo awe, a yeke kä mo ande.   Aï Jéhovah, sara nzoni bê na e.+ Beku ti e kue ayeke na ndö ti mo. Lakue na ndapre, gbu e na nduzu*+ na ga salut ti e na ngoi ti ye ti vundu.+   Na ngoi so azo amä wuluwulu, ala kpe. Na ngoi so mo londo, yâ ti amara akangbi kirikiri.+   A yeke bungbi ndo oko aye so mo gbu na bira tongana agbadora so abungbi ndo oko ti te aye ti yaka. Azo ayeke tuku na ndö ni tongana gbâ ti agbadora.   A yeke yâa iri ti Jéhovah, ndali ti so lo duti kâ na nduzu. Lo yeke sara si mbilimbili nga na sarango ye na lege ni amû yâ ti Sion kue.   Lo la lo sara si aye atambela nzoni na ngoi ti mo. Lo yeke mû na mo kota salut,+ ndara, hingango ndo nga lo yeke sara si mo kpe mbeto ti Jéhovah.+ So ayeke mosoro so lo yeke na ni.   Bâ, awalombe ti ala ayeke dekongo na ndö ti lege; azo so ague tokua ti siriri ayeke toto ngangu.   Ndö ti akota lege ayeke senge; zo ayeke hon pëpe na ndö ti akete lege so ahon na yâ ti kodro. Lo* fâ yâ ti mbele ni awe; lo ke agbata ni awe; lo bâ mawa ti zo oko pëpe.+   Sese ni asara vundu* nga ahule. Kamene asara Liban,+ nga a fun kue. Saron aga tongana désert, nga Basan na Carmel ayengi, na akugbe ti ala atuku.+ 10  Jéhovah atene: “Ti fadeso, mbi yeke londo, mbi yeke yâa iri ti mbi wani+ nga mbi yeke sara si a hinga kota ti mbi.  11  Ala mû ngo ti hulengo pere, na ala dü hulengo saleté so angbâ na lê ti yaka. Pupu ti yanga ti ala wani ayeke gbi ala tongana wâ.+ 12  Azo ti kodro ni ayeke ga tongana fuku ti chaux. A yeke bi wâ na terê ti ala tongana ti akeke ti sisi so a dë ni awe.+ 13  Ala so ayeke yongoro kâ so, ala dengi mê amä tënë ti ye so mbi yeke sara ande! Ala so ayeke nduru ge so, zia ala hinga so mbi yeke ngangu mingi! 14  Mbeto ayeke hon ndö ti awasiokpari so ayeke na Sion.+ Terê ti a-apostat ayeke dö na mbeto, si ala tene: ‘Zo wa la na popo ti e alingbi ti sara kodro na ndo so wâ ayeke gbi ye dä so?+ Zo wa la na popo ti e alingbi ti sara kodro ndo oko na wâ so zo alingbi ti mingo ni ape so?’ 15  Mbeni zo ayeke dä so asara ye lakue na lege ni,+ lo yeke tene tënë so ayeke na lege ni,+ lo ke sarango ye so ayeke na lege ni pëpe nga na warango ye na lege ti likisi.+ Lo ke ti tene a pete goro na lo nga lo yeda pëpe ti mû ni, lo kanga mê ti lo si lo mä pëpe tënë ti tukungo mênë nga lo kanga lê ti lo si lo bâ pëpe ye so ayeke sioni. 16  Lo yeke sara ande kodro na ndo so ayeke na nduzu. Nzoni ndo ti batango terê ti lo dä* ayeke duti ande na yâ ti angangu gbagba ti tênë. A yeke mû na lo kobe ti lo, nga ngu ti nyongo ti lo ayeke manke lâ oko pëpe.”+ 17  Lê ti mo ayeke bâ mbeni gbia na yâ ti gloire ti lo. Azo ayeke bâ mbeni kodro yongoro kâ. 18  Na yâ ti bê ti mo, mo yeke dabe ti mo* na ye ti mungo kota mbeto na zo, na mo yeke hunda ndo, mo tene: “Wakuasu ayeke na ndo wa? Zo so ayeke pesé lani impôt so a doit ti futa so ayeke na ndo wa?+ Zo ti dikongo atour ayeke na ndo wa?” 19  Mo yeke bâ ande azo ti sioni yanga encore ape. Azo so a yeke tâ ngangu na zo ti mä yanga ti kodro ti ala* nga na azo ti guguma so mo lingbi ti mä yâ ti tënë ti ala pëpe, mo yeke bâ ala encore ape.+ 20  Bâ Sion, gbata so e yeke sara amatanga ti e dä!+ Lê ti mo ayeke bâ ande Jérusalem tongana ndo so ayeke kpô ti tene zo asara kodro dä, tongana mbeni tente so a yeke zi ni pëpe.+ A yeke gboto ande apiquet ti tente ni lâ oko pëpe, nga a yeke fâ yâ ti akamba ni pëpe. 21  Kâ, Jéhovah, so ayeke kota mingi, ayeke ga ande ndali ti e mbeni ndo so akota ngu ayeke dä, ndo so akota canal ayeke dä. Groupe ti abateau ti awato ayeke hon dä pëpe nga apendere bateau ayeke hon dä pëpe. 22  Jéhovah ayeke Juge ti e,+ Jéhovah ayeke Zo ti lungo andia na e,+ Jéhovah ayeke Gbia ti e.+ Lo la lo yeke sö e ande.+ 23  Yâ ti akamba ti abateau ti awato ayeke woko, a lingbi ti gbu yongoro keke ti bateau ni nga na voile ni na nduzu pëpe. Na ngoi ni so, azo ayeke kangbi yâ ti gbâ ti aye so a gbu na ngoi ti bira; même zo so gere ti lo abuba ayeke gbu gbâ ti aye.+ 24  Zo ti kodro ni ayeke tene ande pëpe: “Terê ti mbi ason.”+ A yeke pardonné siokpari ti azo so alango na yâ ti kodro ni.+

Kete tënë

Wala “ga ngangu ti e.”
A ye ti sara tënë ti wato ni.
A lingbi nga ti tene “Ngu ayeke dä encore ape.”
Wala “Nzoni ndo ti batango terê ti lo, so ayeke na nduzu.”
Wala “mo yeke gbu li ti mo.”
Na Hébreu: “so yanga ti kodro ti ala alï mingi.”