Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 32:1-20

LI TI ATËNË NI

  • Mbeni gbia na amokonzi ayeke komande na sarango ye tâ mbilimbili (1-8)

  • A gboto mê ti awali so asara gï sanka ti aye (9-14)

  • Anzoni ye ti peko ti yingo so Nzapa atuku na ndö ti azo ti lo (15-20)

32  Bâ, mbeni gbia+ ayeke komande ande ndali ti mbilimbili,+ nga amokonzi ayeke komande ande ti fâ ngbanga mbilimbili.   Ala oko oko kue ayeke duti ande tongana ndo ti honde terê dä* ndali ti pupu nga tongana ndo ti kpe dä ti bata terê ndali ti ngu-nzapa so apika na kota pupu. Ala yeke duti nga tongana mbeni ngu so asua na yâ ti ndo so ngu ayeke dä pëpe,+ nga tongana gbe ti dê ti mbeni kota tênë na yâ ti ndo so ahule ngangu.   Na pekoni, lê ti azo so ayeke bâ ndo ayeke kanga encore ape, nga azo so ayeke mä ndo ayeke dengi ande mê ti mä tënë nzoni.   Azo so ayeke sara ye na dongo terê ayeke manda ande ti gbu li ti ala nzoni na ndö ti ye so ala hinga, nga azo ti guguma ayeke sara ande tënë nzoni nga polele.+   Zo so li ti lo ayeke dä pëpe, a yeke iri lo encore ape zo so ayeke nduru ti mû ye na zo, nga zo ti kirikiri, a yeke tene encore ape so sarango ye ti lo ayeke nzoni.   Zo so li ti lo ayeke dä pëpe ayeke tene tënë ti buba. Na yâ ti bê ti lo, lo yeke leke ti sara ye ti sioni,+ ti pusu azo ti ga a-apostat,* ti tene atënë so ayeke na lege ni pëpe na terê ti Jéhovah, ti sara si zo so nzara asara lo* ate ye pëpe nga ti kanga lege na zo so nzara ti ngu asara lo ti nyon mbeni ye.   Akode ti zo ti kirikiri ayeke sioni.+ Lo yeke pusu azo ti sara ye ti kamene na tenengo mvene na li ti zo so abâ pasi, gï ti sara sioni na lo,+ atâa so zo ni atene tënë so ayeke na lege ni.   Me nzoni bê apusu zo so maboko ti lo awoko ti mû ye na zo, nga lo yeke gi lakue ti mû ye* na zo.   “Ala awali so ayeke sara gï sanka ti aye, ala londo ala mä mbi! Ala amolenge-wali so agi bê ti ala même kete pëpe,+ ala mä mbi si! 10  A ngbâ gï ngu oko na ambeni lango na ndö ni ti tene ala so agi bê ti ala kete pëpe, terê ti ala ayeke dö na mbeto, ndali ti so tongana ngoi ti kongo alê ti vigne ahunzi, azo ayeke kiri maboko senge.+ 11  Ala awali so ayeke sara sanka ti aye, zia terê ti ala adö na mbeto! Ala so ayeke gi bê ti ala même kete pëpe, zia si terê ti ala adö ngangu! Ala zi bongo kue na terê ti ala na ala kanga bongo ti vundu na ngbonda ti ala.+ 12  Ala pika ndö ti kate ti ala na vundu ndali ti ye so asi na apendere yaka nga na anzoni lê ti vigne.  13  Kodro ti azo ti mbi ayeke si singo na akeke ti sisi na akî; a yeke mû li ti ada kue so azo ayeke sara matanga dä, a yeke mû ndo na yâ ti gbata so azo ayeke sara ngia dä mingi.+ 14  Azo adö angangu tour azia; ala dö gbata so asi singo na bruit azia.+ Ndo so a iri ni Ophel+ nga na ndo so ayo na nduzu so asinziri ayeke luti dä ti bâ ndo ayeke ga ande ando so abuba biani biani. Ando ni so ayeke ga ande mbeni pendere ndo ndali ti akororo ti ngonda, na a yeke ga ndo ti tengo pere ti ataba na angasa,+ 15  juska Nzapa atuku yingo ti lo na ndö ti e,+ na benyama aga yaka ti akeke so a yeke te lê ni nga a bâ yaka ti akeke so a yeke te lê ni tongana gbako.+ 16  Na pekoni, sarango ye mbilimbili ayeke mû ndo na yâ ti benyama nga sarango ye na lege ni ayeke mû ndo na yâ ti yaka ti akeke so a yeke te lê ni.+ 17  Tâ sarango ye na lege ni ayeke sara si siriri aduti dä,+ nga a yeke sara si azo aduti na siriri ti bê nga na siriri aninga.+ 18  Azo ti mbi ayeke sara kodro na ndo so siriri ayeke dä, na yâ ti ada so ayeke bata zo nzoni nga na ando so asara si ala wu terê ti ala nzoni.+ 19  Me ti gbako ni, akota glason ayeke buba ni, nga gbata ni ayeke buba kue kue kue. 20  Ngia ayeke na azo so ayeke lu angongoa ti kobe na terê ti angu kue, nga na azo so azia* akoli-bagara na akororo ti ala asigi ti fono.”+

Kete tënë

Wala “kpangba.”
Wala “ti sara ye na mbeni lege so ane Nzapa pëpe.”
Wala “âme ti zo so nzara asara lo.”
Wala “ti mû ye na nzoni bê.”
Wala “azi.”