Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 30:1-33

LI TI ATËNË NI

  • Mungo maboko ti Égypte ayeke ye oko ape (1-7)

  • Azo ake ti mä tënë ti prophétie so a tene na ala (8-14)

  • Zo ayeke wara ngangu tongana lo zia bê ti lo na Nzapa (15-17)

  • Jéhovah asara nzoni na azo ti lo (18-26)

    • Jéhovah ayeke Kota maître (20)

    • “So ayeke lege ni la” (21)

  • Jéhovah ayeke fâ ngbanga ti Assyrie (27-33)

30  Jéhovah atene: “Mawa na amolenge ti kpengba-li+ so asara aye so ala leke ti sara, me a yeke ye so mbi tene na ala ti sara pëpe,+ nga so ate ambele,* me a yeke yingo ti mbi la afa na ala ti sara ni pëpe. Ala yeke sara siokpari na ndö ti terê.   Ala descend na Égypte+ sân ti hunda mbi.*+ Ala gue kâ ti tene Pharaon abata ala* nga ti tene ala bata terê ti ala na gbe ti dê ti Égypte.   Me batango ndo so ala gi na mbage ti Pharaon ayeke ga ye ti kamene ndali ti ala, nga gbe ti dê ti Égypte so ala gi ti bata terê ti ala dä so ayeke ga ye ti kota kamene ndali ti ala.+   Amokonzi ayeke na Zoan+ nga awatokua asi juska na Hanès.   Azo ti Égypte alingbi ti ga na ye ti nzoni na ala pëpe, me ala yeke zia kamene na lê ti ala kue. Azo ti Égypte ayeke mû maboko na ala pëpe nga ala yeke ga na ye ti nzoni na ala pëpe, me ala yeke zia gï kamene na lê ti ala.”+  Tënë ti ngbanga so Nzapa adë na ndö ti anyama ti ngonda ti sud: Azo ayô aye ti mosoro ti ala na ndö ti akororo nga na akungba ti ala na ndö ti akûtu so ayeke na peko ti achameau. Ala hon na yâ ti ndo so aye ti vundu nga na aye ti ngangu ayeke dä, ndo so bamara ayeke dä, bamara so ayeke dekongo, ndo so sioni ngbo ayeke dä, ngbo so ayeke huru hurungo, nga so ngonzo ti lo ayeke zö zo tongana wâ.* Me akungba ti ala ayeke ga na ye ti nzoni na ala pëpe.   Ye so Égypte ayeke sara ti mû maboko na ala ayeke sara ye oko pëpe.+ Ni la iri so mbi zia na ndö ti lo ayeke: “Rahab,+ lo so aduti gï na sese na lo sara ye oko pëpe.”   Fadeso, gue mo sû tënë ni na ndö ti tableau na lê ti ala nga mo sû ni na yâ ti mbeti,+ si mbeni lâ a ga tongana ye ti témoin so angbâ lakue lakue,+   ndali ti so azo so ayeke azo ti kpengba-li,+ amolenge ti mvene+ nga amolenge so aye pëpe ti mä ndia* so mbi Jéhovah mbi mû ni.+ 10  Ala tene na azo ti bango ye: ‘Ala bâ ye pëpe’, nga ala tene na azo so ayeke fa peko ti avision: ‘Ala tene na e tâ tënë pëpe na ndö ti avision so ala bâ.+ Ala handa e na atënë ti yanga ti ala;* ala imaginé gï ambeni ye so ayeke tâ tënë pëpe si ala tene ni na e.+ 11  Ala ngbâ na ndö ti lege ni pëpe; ala mû mbeni lege nde. Ala zia ti sara na e tënë ti Nzapa ti Israël so ayeke nzoni-kue.’”+ 12  Ndani la Nzapa ti Israël so ayeke nzoni-kue atene: “So ala ke tënë so awe,+ ala ye gï aye ti likisi nga na atënë ti mvene na ala zia bê ti ala na ndö ti aye ni so,+ 13  siokpari ti ala ayeke duti ande tongana mur so akungbi, tongana mbage ti gbagba so ayo na nduzu si aba na gigi na ayeke nduru ti tï. A yeke tï ande gï gbagburu, gï hio tongaso. 14  A yeke fâ yâ ni tongana kota ta ti zo ti lekengo ta. A yeke fâ kue kue kue tongaso si même mbeni nduru ni angbâ pëpe, ti tene zo amû ni amû na lê ti wâ wala lo tö na ngu na yâ ti adû so alï pëpe.”* 15  Jéhovah, Seigneur ti dunia kue nga Nzapa ti Israël so ayeke nzoni-kue, atene: “Tongana ala kiri na mbage ti mbi nga ala wu terê ti ala, ala yeke wara salut; tongana ala duti kpô nga ala zia bê ti ala na mbi,+ ala yeke wara ngangu.” Me ala ye pëpe.+ 16  Ala tene: “Ên-ën! E yeke monté na ndö ti ambarata e kpe!” Ala yeke kpe ande biani. Ala tene nga, atene: “E yeke kpe na ndö ti ambarata so ayapu na loro!”+ Tongaso azo so ayeke tomba ala ayeke mû ande loro mingi.+ 17  Azo saki oko ayeke dö na mbeto ndali ti zo oko so aye ti sara sioni na ala.+ Gï azo oku la ayeke zia loro na gere ti ala juska tanga ti ala so angbâ ayeke tongana mbeni yongoro keke na li ti hoto, tongana yongoro keke so a kpo ni na nduzu na li ti kete hoto si azo abâ ni.+ 18  Me Jéhovah akanga bê ti lo, lo ku* ti sara nzoni na ala,+ na lo yeke londo ti sara nzoni bê na ala,+ ndali ti so Jéhovah ayeke Nzapa ti mbilimbili.+ Ngia ayeke na azo kue so angbâ ti ku lo.*+ 19  Na ngoi so azo asara kodro na Sion, so ti tene na Jérusalem,+ ala yeke toto kete pëpe.+ Gï so ala toto na Nzapa ti mû maboko na ala, lo yeke sara nzoni bê na ala; gï na ngoi so lo mä toto ti ala,+ lo yeke sara ye so ala hunda. 20  Atâa so Jéhovah ayeke sara si ye ti vundu so asi na ala ayeke tongana kobe so zo ayeke te nga pasi+ so ala bâ ayeke tongana ngu so zo ayeke nyon, Kota maître ti ala ayeke honde terê ti lo na ala encore ape, na ala yeke bâ Kota maître ti ala+ na lê ti ala wani. 21  Tongana a hunda ti tene ala gue na mbage ti koli wala na mbage ti wali, ala yeke mä ande mbeni go so asara tënë na peko ti ala, atene: “So ayeke lege ni la. Ala tambela dä.”+ 22  Ala yeke buba argent so ala zia na terê ti ayanda so a leke ni na kode nga ala yeke buba lor so ala zia na terê ti astatue so a sara na wen.*+ Ala yeke bi ni yongoro tongana chiffon ti wali so abâ yâ ti lo, na ala yeke tene: “Hon kâ!”*+ 23  Nzapa ayeke sara si ngu apika na ndö ti ngongoa ti kobe so ala lu,+ na mapa so ala sara na alê ti kobe ayeke duti ande gbani nga nzoni mingi.*+ Na ngoi ni so, anyama ti ala ayeke te pere na ando ti tengo pere so akono mingi.+ 24  Abagara nga na akororo ti ala so afâ yaka ayeke te akobe so a zia anzoni ye dä, aye so a mû pelle nga na râteau si a fû na ni. 25  Na ngoi so a yeke fâ azo gbani gbani nga atour ayeke tuku na sese, a yeke wara na ndö ti ahoto kue so ayo na nduzu mingi nga na ndö ti akete hoto kue angu so ayeke sua+ nga na acanal. 26  Na ngoi so Jéhovah akanga alê ti kä so azo ti lo awara*+ nga lo sara si kota kä so ala wara ni na peko ti pika so lo pika na ala amü,+ lumière ti nze so aga kota ayeke su ande tongana lumière ti lâ;+ sungo ti lumière ti lâ ayeke ga ande fani mbasambala, tongana lumière ti lâ ti lango mbasambala. 27  Iri ti Jéhovah so a hinga ni na yongoro ndo ayeke si ge, a yeke ga na kota ngonzo ti lo nga na mbinda so ane. Gbe ti go ti lo asuku na ngonzo, nga langue ti lo ayeke tongana wâ so ayeke gbi ye kue.+ 28  Yingo* ti lo ayeke tongana ngu so asuku juska agbu zo na go ti lo, ti yengi amara tongana ti so zo ayeke zia alê ti kobe na yâ ti yengere* ti yengere ni. Nga a yeke zia kamba na yanga ti azo ni+ ti tene a gboto ala a gue na ala yongoro. 29  Me bia so ala yeke he ni ayeke tongana bia so ala yeke he na bï na ngoi so ala yeke leke terê ti ala* ti sara mbeni matanga.+ Bê ti ala ayeke duti na ngia tongana ti zo so, na ngoi so a yeke hûru flûte,* lo yeke tambela ti gue na ndö ti hoto ti Jéhovah, na ndö ti Kota tênë ti Israël.+ 30  Jéhovah ayeke sara si azo amä go ti lo so atoto ngangu mingi.+ Na yâ ti kota ngonzo ti lo,+ lo yeke fa maboko ti lo+ na awato ti lo na ngoi so lo yôro ni na terê ti ala na lege ti wâ so agbi ye kue,+ na lege ti kota ngu-nzapa so apika gï hio tongaso,+ na lege ti ngu-nzapa so apika na kota pupu nga na lege ti akota glason.+ 31  Toto ti go ti Jéhovah ayeke sara si mbeto ahon ndö ti azo ti Assyrie;+ lo yeke pika ala na keke.+ 32  Maboko ti Jéhovah ayeke descend na keke ti pika azo ti Assyrie, nga lo yeke yô maboko ti lo ti pika ala na ngoi so lo yeke tiri na ala.+ Na ngoi ti pika oko oko, a yeke mä toto ti atambourin nga na aharpe.+ 33  Lo leke Topheth ti lo*+ awe; ndo ni so lo leke awe ayeke nga ndali ti gbia ni.+ Lo dö gbâ ti keke na ndö ti terê na yâ ti mbeni dû so alï, nga keke ni amû ndo. Lo sara kota wâ, nga keke ti wâ ayeke gbani. Pupu ti yanga ti Jéhovah, so ayeke tongana gbâ ti soufre, ayeke hûru wâ dä.

Kete tënë

Na Hébreu: “atuku sandaga ti sämba.” Na bango ni, a yeke ye so a yeke sara na ngoi ti mango terê.
Wala “sân ti gi ti hinga tënë ti yanga ti mbi.”
Na Hébreu: “na yâ ti ngangu gbagba ti Pharaon.”
Wala “sioni ngbo so amû loro mingi.”
Wala “fango ye.”
Na Hébreu: “anzerengo tënë.”
A lingbi nga ti tene “adû so a yeke bata ngu dä.”
Wala “lo ku kungo.”
Wala “so ayeke ku lo na ngia na bê.”
Wala “astatue so a tö wen aga ngu si a leke na ni.”
A lingbi nga ti tene “na ala iri ni ye ti saleté.”
Na Hébreu: “ayeke suku nga asi singo na mafuta.”
Wala “bio ti ala so akungbi.”
Wala “Pupu.”
Na Hébreu: “yengere so abuba kue.”
Wala “zi sioni ye na terê ti ala.”
Wala “na ngoi ti totongo ti flûte.”
Ge, a sara kua na tënë “Topheth” ti fa mbeni ndo so wâ ayeke gbi ye dä, me a ye ti sara tënë ti futingo.