Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 3:1-26

LI TI ATËNË NI

  • Amokonzi ti Juda ahanda azo (1-15)

  • A fâ ngbanga na li ti amolenge-wali ti Sion (16-26)

3  Seigneur Jéhovah ti aturugu ayeke zi na Jérusalem nga na Juda aye kue so ayeke mû maboko na ala nga so asara si ala wara ye. Lo yeke zi nga aye kue so asara si ala wara kobe na ngu.+   Lo yeke zi angangu koli nga na azo ti bira, ajuge na aprophète,+ azo ti bango mbadi na a-ancien.   Lo yeke zi nga amokonzi ti azo bale-oku bale-oku,+ akota zo ti kodro, awawango, akota zo ti sarango magie nga na azo ti sarango yorö so ahinga ti handa angbo.+   Mbi yeke sara si amolenge-koli la aga akota zo ti kodro ti ala, nga azo so aninga ti changé bango ndo ti ala pëpe* la ayeke komande na ndö ti ala.   Azo ayeke sara ande ye ti ngangu na amba ti ala na popo ti ala,+ zo oko oko ayeke sara ye ti ngangu na mba ti lo. Molenge-koli ayeke pika mbakoro, senge zo ayeke sara ngangu-li na zo so azo ane lo mingi.+   Zo oko oko ayeke gbu ita ti lo ti koli na yâ ti da ti babâ ti lo, na lo tene: “Mo la mo yeke na kota bongo, mo komande na ndö ti e. Mo komande na ndö ti kodro so abuba awe so.”   Me na lango ni so, zo ni ayeke ke, lo tene: “Mbi yeke zo ti kangango kä* ti ala pëpe. Mbi yeke na kobe wala bongo na da ti mbi pëpe. Zia mbi mokonzi na ndö ti azo ni pëpe.”   Jérusalem apika gere ti lo, nga Juda atï, ndali ti so ala sara siokpari na terê ti Jéhovah na lege ti tënë ti yanga ti ala nga na kusala ti ala. Ala sara ngangu-li na lê ti Nzapa so ayeke na gloire.+   Lê ti ala la abi tënë na li ti ala, ala sara tënë ti siokpari ti ala polele tongana ti Sodome.+ Ala gi pëpe ti honde ndö ni. Mawa na ala,* ndali ti so ala yeke ga na ye ti ngangu na ndö ti ala wani! 10  Ala tene na azo ti mbilimbili so ye ayeke ga ande nzoni na ala. Ala yeke wara ande futa ti peko ti ye so ala sara.*+ 11  Mawa na zo ti sioni! Ye ti ngangu ayeke wara lo ande, ndali ti so ye so lo sara la a yeke sara na lo ande! 12  Âdu ti azo ti mbi, amokonzi so ayeke forcé ala ti sara kua ayeke azo so ason ahon ndö ni, nga awali la akomande ala. Ala azo ti mbi, amokonzi ti ala ayeke sara si ala fono kirikiri, amokonzi ni asara si ala hinga pëpe tâ lege so ala doit ti mû.+ 13  Jéhovah aleke terê ti lo ti bï tënë na li ti azo. Lo luti ti dë ngbanga na li ti ala. 14  Jéhovah ayeke gue na a-ancien nga na akota zo ti kodro ti azo ti lo na gbele ngbanga. Lo yeke tene na ala: “Ala zö yaka ti vigne, nga aye ti awayere so ala nzi ayeke na yâ ti da ti ala.”+ 15  Seigneur ti dunia kue, Jéhovah ti aturugu, atene nga atene: “Mvene ti nyen la ague na ala ti neka azo ti mbi so? nga ti sara pasi na awayere ahon ndö ni so?”+ 16  Jéhovah atene: “Amolenge-wali ti Sion ayeke azo ti baba, ala yeke bi yâ ti go* ti ala na ngoi so ala yeke tambela, ala yeke sara lê ti ala ti handa na akoli, ala yeke tambela zê zê zê nga aye so ayeke tongana alenge so ala kanga na gere ti ala ayeke toto. 17  Ndali ni Jéhovah ayeke zia parata na li ti amolenge-wali ti Sion. Jéhovah ayeke sara nga si devant ti li ti ala ate.+ 18  Na lango ni so Jéhovah ayeke zi pendere ti aye ti maboko ti ala, ti ayanga ti bongo so ala yeke kanga na devant ti li ti ala, ti aye ti baba so akpa nze,+ 19  ti aye ti mê,* ti aye ti maboko, ti avoile, 20  ti aye ti baba ti li, ti achaînette ti gere, ti aceinture,* ti angbenda ti yombo* nga ti awaraga.* 21  Lo yeke zi pendere ti abague, ti abague ti hôn, 22  ti arobe ti matanga, ti aboubou, ti afoulard, ti akete bozo, 23  ti atatara,+ ti abongo so a sara na lin,* ti aturban nga na ti avoile. 24  Fion ti ye so afun sioni la ayeke mû place ti mafuta ti keke ti baume;+ senge kamba la ayeke mû place ti ceinture; li-mbombo la ayeke mû place ti li so a sara ni pendere;+ bongo ti vundu+ la ayeke mû place ti bongo ti nginza; place ti kä la ayeke mû place ti pendere terê. 25  Gbata ti Sion, a yeke fâ akoli ti mo na épée, angangu koli ti mo ayeke kui na yâ ti bira.+ 26  Azo ayeke sara vundu nga ala yeke dema na ayanga ti gbagba ti Sion,+ gbata ti Sion ayeke duti na sese na vundu na bê.”+

Kete tënë

Wala “azo so a yeke ngangu ti zia bê kue na ala.”
Wala “zo ti kaïngo kobela.”
Wala “na âme ti ala.”
Na Hébreu: “te lengo ti kusala ti ala.”
Na Hébreu: “ala yôro yâ ti go.”
Wala “aye ti pendere so ayeke na terê ti aye ti mê.”
Wala “a-écharpe; asautoir.”
Na Hébreu: “ada ti âme.”
Wala “acoquille ti sarango na baba.”
Wala “abongo ti gbe ni.”